ខេត្តប៉ៃលិន ៖ បុរសម្នាក់ជាបុគ្គលិកបម្រើ ការឱ្យក្រុមហ៊ុនមិត្តហ្វូន ដែលមានទីតាំងនៅតាមបណ្តោយផ្លូវជាតិលេខ៥៧ ស្ថិតក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន បានបាត់ខ្លួន ខណៈយកស៊ីមកាតនិងកាតទូរស័ព្ទ ព្រមទាំងលុយកាក់នៅជាប់នឹងខ្លួនមួយចំនួនដែលគិតជា ទឹកប្រាក់ជាង៥.០០០ដុល្លារអាមេរិក ដោយជិះម៉ូតូមួយគ្រឿងម៉ាកឌ្រីម ស៊េរីឆ្នាំ២០០០ ពណ៌ខ្មៅ ទៅចែកចាយឲ្យម៉ូយជាអតិថិជននៅភូមិទឹកផុស សង្កាត់អូរតាវ៉ៅ ។
បុរសនេះ ចេញពីកន្លែងធ្វើការតាំងពីវេលាម៉ោង៦ លុះដល់ម៉ោង៨និង៣០នាទីព្រឹកក៏ទូរស័ព្ទមកប្រពន្ធឈ្មោះជុំ លក្ខិណា អាយុ២៩ឆ្នាំ ឲ្យរករថយន្តដឹកទឹកយកទៅស្រោចធ្វើផ្ទះថ្មីនៅភូមិអូរតាវ៉ៅ សង្កាត់អូរតាវ៉ៅ ។ ក្រោយមកនៅវេលាម៉ោង៩ព្រឹក មានអ្នកផ្សេងយកទូរស័ព្ទរបស់ជនរងគ្រោះនិយាយមកស្ត្រីជាប្រពន្ធ ប៉ុន្តែបានតែពីរបីម៉ាត់ស្តាប់គ្នាមិនបានក៏បិទទូរស័ព្ទទៅ លុះពេលស្ត្រីជាប្រពន្ធចុចទៅវិញក៏ទាក់ទងមិនចូល ។
ហេតុការណ៍នេះបានកើតឡើងកាលពីវេលាម៉ោង៩ព្រឹកថ្ងៃទី២៨ មិថុនាកន្លងមក នៅភូមិទឹកផុស សង្កាត់ប៉ៃលិន ក្រុងប៉ៃលិន ហើយបុរសដែលបាត់ខ្លួនឈ្មោះយ៉ុង ខឿន អាយុ៣១ឆ្នាំ ជាបុគ្គលិកបម្រើការងារឲ្យក្រុមហ៊ុនទូរស័ព្ទមិត្តហ្វូន រស់នៅភូមិអូរពឺត សង្កាត់ទួលល្វា ក្រុងប៉ៃលិន ។ បុគ្គលិកក្រុមហ៊ុនទូរស័ព្ទមិត្តហ្វូនម្នាក់ឲ្យដឹងថា បុរសឈ្មោះយ៉ុង ខឿន គឺជាបុគ្គលិកបម្រើការនៅក្រុមហ៊ុនទូរស័ព្ទជាមួយគ្នា ហើយនៅថ្ងៃកើតហេតុបុរសរូបនេះបានជិះម៉ូតូរបស់ខ្លួនម៉ាកឌ្រីមពណ៌ខ្មៅ ស៊េរីឆ្នាំ២០០០ ចូលមកយកស៊ីមកាត និងកាតទូរស័ព្ទជាច្រើននៅក្នុងស្នាក់ការក្រុមហ៊ុនតាំងពីម៉ោង៦ព្រឹកដោយ តម្រូវឲ្យយកទៅលក់ចែកចាយឲ្យអតិថិជននៅភូមិទឹកផុស សង្កាត់អូរតាវ៉ៅ ។
ប្រភពដដែលបន្តទៀតថា បន្ទាប់ពីចេញទៅតាំងពីព្រឹករហូតដល់ល្ងាចនៅតែមិនឃើញត្រឡប់មកវិញ ទើបប្រធានសាខាក្រុមហ៊ុន ក្រុងប៉ៃលិនចុះទៅដល់ផ្ទះរបស់គេនៅតែមិនជួប លុះស៊ើបសួរម្តាយក្មេកនិងប្រពន្ធក៏បានប្រាប់ថា មិនអាចទាក់ទងបានតាំងពីព្រឹកមកម៉្លេះ។ ពេលនោះទាំងបុគ្គលិកក្រុមហ៊ុននិងប្រព្ធរបស់គេបានទៅដាក់ពាក្យបណ្តឹងនៅ សមត្ថកិច្ចនគរបាលឲ្យចុះទៅដល់កន្លែងកើតហេតុដើម្បីសួររកជនរងគ្រោះ ប៉ុន្តែទោះបីជាពួកគេខិតខំស្រាវជ្រាវយ៉ាងណាក៏នៅតែមិនបានទទួល ដំណឹងអ្វីទាល់តែសោះ ។
ចំណែកស្រ្តីចំណាស់ឈ្មោះសោម សុជា អាយុ៦៨ឆ្នាំ ជាម្តាយក្មេកបុរសដែលបាត់ខ្លួននិយាយថា នៅព្រឹកថ្ងៃកើតហេតុកូនប្រសារបស់គាត់បានចេញទៅលក់ស៊ីមកាត និងកាតទូរស័ព្ទឲ្យក្រុមហ៊ុនដូចសព្វមួយដង តែរូបគេប្រាប់ថាយកទៅចែកចាយនៅក្នុងភូមិទឹកផុស សង្កាត់អូរតាវ៉ៅ ។ នៅម៉ោង៨និង៣០នាទីព្រឹក កូនប្រសារបស់គាត់បានទូរស័ព្ទមកប្រពន្ធរបស់គេប្រាប់ឲ្យហៅរថយន្តដឹក ទឹកទៅបាញ់ទឹកឲ្យជាងធ្វើផ្ទះរបស់ខ្លួននៅក្នុងភូមិអូរតាវ៉ៅ ព្រោះផ្ទះដែលពួកគាត់សម្រាកនៅសព្វថ្ងៃក្នុងភូមិអូរពឺត ជាផ្ទះជួលគេស្នាក់នៅបណ្តោះអាសន្នប៉ុណ្ណោះ ។
ប្រភពព័ត៌មានពីស្រ្តីចំណាស់រូបនេះ បន្តទៀតថា លុះនៅម៉ោង៩ព្រឹកថ្ងៃដដែល ស្រាប់តែមានជនផ្សេងទៀតយកទូរស័ព្ទកូនប្រសាគាត់និយាយមកប្រពន្ធរបស់គេ បានតែពីរបីម៉ាត់ស្តាប់គ្នាមិនបានក៏បិទទូរស័ព្ទទៅនិងគ្មានដំណឹងរហូតមក ។ ស្រ្តីរូបនេះបានបញ្ជាក់ថា ពួកគាត់កំពុងតែប្តឹងទៅសមត្ថកិច្ចឱ្យស្រាវជ្រាវតាមរក ព្រោះឥឡូវនេះមានតម្រុយថា គេបានជួបនឹងបុរសម្នាក់មានសភាពមិនប្រក្រតី និយាយមិនរួច ដូចជាត្រូវថ្នាំសណ្តំរបស់គេនៅឯស្រុកម៉ាឡៃ ខេត្តបន្ទាយមានជ័យ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]