Apple បង្ហាញ iPad សេរ៊ីថ្មី ចំនួន ២ម៉ូឌែល ព្រមជាមួយនឹង កំព្យូទ័រ iMac Retina 5K display (មានវីដេអូ)

សហរដ្ឋអាមេរិក៖ នៅទីស្នាក់ការកណ្តាល របស់អ៊េបផល នាទីក្រុង Cupertino រដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃព្រហស្បហ៍ ម្សិលមិញនេះ នាយកប្រតិបត្តិ របស់ក្រុមហ៊ុន អ៊េបផល លោក Tim Cook បានបង្ហាញជាសាធារណៈ នូវ iPad ជំនាន់ថ្មី ពីរម៉ូឌែល iPad Air 2 និង iPad Mini 3 ព្រមជាមួយ នឹងកំព្យូទ័រ iMac Retina 5K display។

iPad Air 2 នឹងភ្ជាប់មក ជាមួយនូវ CPU ប្រភេទ A8X រួមជាមួយនឹង M8 chip ធ្វើឲ្យវាមានល្បឿន លឿនជាងមុន ដល់ទៅ ៤០% ឯណោះ ខណៈថាមពលថ្ម អាចប្រើប្រាស់ បានរយៈពេល ១០ ម៉ោងដដែល។ ចំណែកឯប្រព័ន្ធ កាមេរ៉ាវិញ ត្រូវបានតំឡើងពី ៥ មេហ្គាភិចសែល ឡើងទៅកាន់ ៨ មេហ្គាភិចសែល និង អាចថតវីដេអូ ទំហំ 1080p។ មិនតែប៉ុណ្ណោះ អ៊េបផល ថែមទាំងបញ្ជូល Sensor ស្កេនក្រយៅដៃ ភ្ជាប់មកជាមួយនឹង ការស្រោបស្រទាប់ anti-reflective ដែលជួយកាត់បន្ថយ reflection ប្រមាណជា ៥៦%។ អ្វីដែលគួរឲ្យអស្ចារ្យនោះ គឺ iPad Air 2 នេះ ជាថេបប្លេតដែលស្តើង ជាងគេបង្អស់ នៅលើពិភពលោក ពោលគឺ ស្តើងជាងម៉ូឌែលមុន ១៨% និង ១២% ស្តើងជាង iPhone 6 ដែលអ៊េបផល ទើបតែបង្ហាញជាសាធារណៈ កាលពីមួយខែមុននេះ។ បើនិយាយពីតម្លៃវិញ គឺប្រមាណជា ៥៩៩ ដុល្លារ ក្នុងទំហំ ៦៤ ជីហ្កាបៃស៍ និង មានពណ៌មាស ផងដែរ។ ងាកទៅ iPad mini 3 វិញ គ្រាន់តែបង្កើត ទំហំផ្ទុក ព្រមជាមួយនឹង ពណ៌មាស ថ្មីតែប៉ុណ្ណោះ។

                                   (iPad mini 3 ឆ្វេង & iPad Air 2 ស្តាំ)

វីដេអូ៖ iPad Air 2

អ៊េបផល ក៏បានបង្ហាញនូវ វត្តមានកំព្យូទ័រ ដែលមាន resolution display ខ្ពស់ជាងគេបង្អស់ នៅលើពិភពលោកផងដែរ នោះគឺ iMac ដែលមានទំហំ អេក្រង់ ២៧ អ៊ីង ប្រភេទ Retina 5K display ដែលមាន ១៤.៧ លានភិចសែល។ បើប្រៀបធៀប ជាមួយនឹង ម៉ូឌែលមុន គឺវាកាន់ថាមពលជាងមុន ដល់ទៅ ៣០%។ បើនិយាយពីតម្លៃរបស់វាវិញ គឺប្រមាណជា ២៤៩៩ ដុល្លារសហរដ្ឋអាមេរិក។

វីដេអូ៖ iMac with Retina 5K display

តើប្រិយមិត្តយល់យ៉ាងណាដែរ?

ប្រភព៖ បរទេស

ដោយ RoMeo

ខ្មែរឡូត