ខេត្តកំពង់ឆ្នាំង ៖ មានការកត់សម្គាល់ថា រៀងរាល់ពេលមានការប្រគំតន្ត្រីនៅពេលរាត្រី គឺតែងតែមានក្រុមក្មេងទំនើងកាប់ចាក់គ្នាឥតឈប់ឈរ ជួនកាលមួយយប់មាន២ ទៅ៣ករណី បណ្តាលឱ្យមានអ្នករបួស និងស្លាប់គួរឱ្យសោកស្តាយណាស់ ។
ជាក់ស្តែងនៅយប់ថ្ងៃទី៤ កុម្ភៈ មានការប្រគំតន្ត្រីដែលរៀបចំដោយក្រុមហ៊ុនស្រាបៀរក្នុងស្រុកមួយនៅបរិវេណកីឡដ្ឋានចាស់(ស្តាតចាស់) ស្ថិតក្នុងភូមិធម្មយុត្ត សង្កាត់ប្អេរ ក្រុងកំពង់ឆ្នាំង។នៅយប់នោះមានករណីកាប់ចាក់គ្នាចំនួន៣ករណី បណ្តាលឱ្យមនុស្ស២នាក់រងរបួសធ្ងន់ ក្នុងនោះម្នាក់បានដឹកទៅសង្គ្រោះនៅមន្ទីរពេទ្យរាជធានីភ្នំពេញ និងម្នាក់ទៀតស្លាប់ ។ ទោះជាយ៉ាងណាក្តីករណីកាប់ចាក់គ្នានេះមិនកើតឡើងក្នុងបរិវេណការប្រគុំតន្ត្រីនោះទេ គឺកើតឡើងនៅខាងក្រៅបរិវេណចម្ងាយពី៥០ម៉ែត្រ ទៅ២០០ម៉ែត្រ គឺខណៈដែលជនរងគ្រោះត្រឡប់ពីទស្សនាការប្រគំតន្ត្រីនោះ ។
លោកសំ សិទ្ធី អធិការនគរបាលក្រុងកំពង់ឆ្នាំង ឱ្យដឹងថា ករណីទី១បានកើតឡើងនៅវេលាម៉ោង៨យប់នៅភូមិដំណាក់ពពូល សង្កាត់កំពង់ឆ្នាំង ។ នៅទីនោះមានក្មេងមួយក្រុមអង្គុយផឹកសុីហើយក្នុងនោះជនរងគ្រោះឈ្មោះលូ វិសាល អយុ២០ឆ្នាំ មានទីលំនៅក្នុងស្រុកជលគិរី តែបានទៅស្នាក់នៅរៀនសូត្រក្នុងក្រុងកំពង់ឆ្នាំង បានងើបទទួលទូរស័ព្ទដោយដើរចេញពីវង់ផឹកសីុទៅឈរនិយាយនៅចិញ្ចើមផ្លូវ ។ ខណៈនោះស្រាប់តែក្មេងមួយក្រុមផ្សេងទៀតជិះម៉ូតូមា៉កអាយខន ទៅដល់យកដាវសាមូរ៉ៃកាប់ជនរងគ្រោះចំនួន២កាំបិត បណ្តាលឱ្យរងរបួសធ្ងន់ រួចហើយជនដៃដល់ក៏ជិះម៉ូតូគេចបាត់ ។ ជនរងគ្រោះត្រូវគេដឹកទៅសង្គ្រោះនៅមន្ទីរពេទ្យ ហើយដោយគ្រូពេទ្យប្រាប់ថា ធ្ងន់ធ្ងរក៏បញ្ជូនបន្តទៅមន្ទីរពេទ្យរាជធានីភ្នំពេញទៀត ។
លោកអធិការបន្តថា ករណីទី២បានកើតឡើងនៅវេលាម៉ោង១០និង៣០នាទីយប់ នៅចំណុចខ្លោងទ្វារវត្តធម្មយុត្ត មានចម្ងាយប្រមាណ១០០ម៉ែត្រពីស្តាតចាស់ ។ ករណីនេះគឺជនរងគ្រោះឈ្មោះទួន ចន្ធី អាយុ១៧ឆ្នាំ មានទីលំនៅក្នុងភូមិអណ្តូងច្រុះ ឃុំអណ្តូងស្នាយ ស្រុករលាប្អៀរ ពេលការប្រគំតន្ត្រីជិតចប់ បានដើរទៅជិតរថយន្តកូរ៉េដែលខ្លួនជិះពីផ្ទះមក មើលការប្រគុំតន្ត្រីច្រើននាក់ ។ ពេលកំពងឈរជិតរថយន្តមានក្មេងទំនើងមួយក្រុមដែលកំពុងអង្គុយផឹកស៊ីក្បែរចេតិយក្នុងវត្ត និងជិតរថយន្តកូរ៉េនោះ សួរថា «តើរថយន្តនេះទៅគោកបន្ទាយដែរឬទេ? »ពេលនោះជនរងគ្រោះឆ្លើយថា «អត់ទេគឺទៅអណ្តូងច្រុះ» ស្រាប់តែមានម្នាក់ក្នុងចំណោមច្រើននាក់ដែលអង្គុយផឹកស៊ីនោះស្ទុះកាប់ជនរងគ្រោះមួយដាវសាមូរ៉ៃ រួចនាំគ្នារត់គេចអស់ទៅ ។ ជនរងគ្រោះរបួសធ្ងន់ត្រូវគេដឹកទៅសង្គ្រោះនៅមន្ទីរពេទ្យខេត្ត ។
ដោយឡែកករណីទី៣ កើតឡើងវេលាម៉ោង១១យប់ នៅខាងត្បូងរបងវត្តធម្មយុត្តចម្ងាយប្រមាណ១០០ម៉ែត្រ ។ ជនរងគ្រោះឈ្មោះសឿង សុផុន អាយុ១៩ឆ្នាំ មានទីលំនៅក្នុងភូមិពោធិ៍ ឃុំពោធិ៍ ស្រុកកំពង់លែង ត្រូវក្រុមជនល្មើសចាក់មួយកាំបិតចុងស្រួច បណ្តាលឱ្យស្លាប់ បន្ទាប់ពីដឹកទៅដល់មន្ទីរពេទ្យ ។
ក្រោយពេលការប្រគំតន្ត្រីចប់មនុស្សមួយក្រុម៥នាក់ ក្នុងនោះស្រី២នាក់ ដើរដល់ជិតចំណុចកើតហេតុ ស្រាប់តែក្រុមជនដៃដល់មានគ្នាពី៣ទៅ៤នាក់ ដើរមកជិត ហើយនិយាយសុំលេខទូរស័ព្ទមនុស្សស្រីម្នាក់ ក្នុងចំណោមមនុស្ស៥នាក់នោះ ។ មិនត្រឹមតែមិនឱ្យលេខទូរស័ព្ទទេ នារីនោះបានប្រើពាក្យសម្តីមិនសមរម្យដាក់ក្រុមជនដៃដល់ធ្វើឱ្យពួកគេខឹងក៏យកកាំបិតស្ទុះដេញចាក់ តែមនុស្សទាំង៥នាក់រត់គេចចូលផ្ទះអស់ ។ បន្ទាប់មកក្រុមជនដៃដល់ទាំង៤នាក់ចាំស្ទាក់ផ្លូវ គាប់ជួនពេលនោះមានមនុស្សមួយក្រុមផ្សេងទៀតមានគ្នា៥នាក់ ក្នុងនោះស្រី២នាក់ដែរ ដើរមកដល់ ម្នាក់ក្នុងចំណោម៤នាក់បានដកកាំបិតចាក់ជនរងគ្រោះចទ្រូងខាងឆ្វេង បណ្តាលឱ្យរបួសធ្ងន់ និងស្លាប់ពេលដឹកដល់មន្ទីរពេទ្យ ប៉ុន្តែគ្រូពេទ្យបញ្ជាក់ថា បានស្លាប់តាំងពីមុនពេលមកដល់មន្ទីរពេទ្យម្លេះ ។
លោកអធិការនគរបាលស្រុកបន្តថា តាំងពីករណីទី១រហូតដល់ទី៣ នគរបាលក្រុងសហការជាមួយនគរបាលខេត្តខិតខំស្រាវជ្រាវរកជនដៃដល់យ៉ាងយកចិត្តទុកដាក់ ទីបំផុតចាប់បានចំនួន៤នាក់រួមទាំងដាវសាមូរ៉ៃជាប់ឈាម និងស្នាប់ដៃមួយផង ។ តាមសាក្សីដែលដើរជាមួយជនរងគ្រោះបានកំណត់អត្តសញ្ញាណ និងភិនភាគដូចមនុស្សដែលសមត្ថកិច្ចចាប់ខ្លួន ។
នៅយប់នោះលោកពេញ វិបុល ព្រះរាជអាជ្ញាអមសាលាដំបូងខេត្តបានទៅពិនិត្យសពជនរងគ្រោះ ព្រមទាំងបញ្ជាឱ្យប៉ូលិសស្វែងរកចាប់ជនដៃដល់ឱ្យបាន ។
បើតាមមន្ត្រីនគរបាលដែលជួយជញ្ជូនសពជនរងគ្រោះទៅលំនៅឋានឯស្រុកកំពង់លែង និយាយថា ជនរងគ្រោះគឺជាកូនគ្រួសារអ្នកក្រីក្របំផុត ហើយត្រូវអង្គការមួយជួយយកមកឱ្យរៀនសូត្រ និងរៀនពូកែទៀតផង ប៉ុន្តែពេលនេះបានស្លាប់ទៅហើយ គួរឱ្យសោកស្តាយយ៉ាងខ្លាំង ។
នៅព្រឹកថ្ងៃទី៥ កុម្ភៈទាំងនគរបាលក្រុងទាំងនគរបាលព្រហ្មទណ្ឌកម្រិតធ្ងន់ខេត្តបានប្រឹងប្រែងស្រាវជ្រាវរកវត្ថុតាង និងសាក្សីបន្ថែមទៀតដែលតាមប្រភពបញ្ជាក់ថា ការចាប់ជនសង្ស័យទាំង៤នាក់នោះ គឺមិនខុសទេ ។
រហូតមកដល់ម៉ោង២រសៀលថ្ងៃទី៥ កុម្ភៈ ជនសង្ស័យទាំង៤នាក់សារភាពកំហុសខ្លះហើយ។ ដែលពួកគេទាំង៤នាក់មាន ១-ឈ្មោះបូ វណ្ណី អាយុ២៦ឆ្នាំ ជាជនដៃដល់ ២-ឈ្មោះបូ ពេជ្រ អាយុ២១ឆ្នាំ ជាអ្នកកាន់ដាវសាមូរ៉ៃ ៣-ឈ្មោះបូ គឹមលី អាយុ១៧ឆ្នាំ អ្នកកាន់ស្នាប់ដៃ និង៤-ឈ្មោះពេជ ពង្សវល័ក្ខ អាយុ២០ឆ្នាំ ។ ពួកគេទាំង៤នាក់មានទីលំនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។
ជនសង្ស័យទាំង៤នាក់ត្រូវនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្ត កសាងសំណុំរឿងបញ្ជូនទៅសាលាដំបូង ៕
ដោយប្រុសកោះ
ដកស្រង់ពីគេហទំព័រកោះសន្តិភាព
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
