ខេត្តកំពង់ឆ្នាំង ៖ ក្មេងប្រុស២នាក់ក្នុងចំណោមបងប្អូនបង្កើត៣នាក់បានលង់ទឹកស្លាប់ គួរឱ្យអាណោចអាធ័មបំផុត កាលពីវេលាម៉ោងជាង៣រសៀលថ្ងៃទី១៤ មិថុនា នៅទឹកស្ទឹងជ្រៃបាក់ ភូមិជ្រៃបាក់ ឃុំជ្រៃបាក់ ស្រុករលាប្អៀរ ខណៈដែលពួកគេទាំង៣នាក់បងប្អូននាំគ្នាទៅស្ទូចត្រី ។ នេះជាលើកទី២ហើយដែលមានបងប្អូន២នាក់លង់ទឹកស្លាប់ជាមួយគ្នាដែល លើកទី១កើតឡើងកាលពីដើមខែមិថុនានេះមានបងប្អូនប្រុសស្រី២នាក់ ម្នាក់២ឆ្នាំ និងម្នាក់ទៀត៦ឆ្នាំបានលង់ទឹកអណ្តូងស្លាប់រួមគ្នាដូចនេះដែរ ហើយនៅខេត្តតាកែវឯណោះកុមារា២នាក់បងប្អូនក៏បានលង់ទឹកត្រពាំង ស្លាប់ដែរ។
ក្មេងប្រុសរងគ្រោះ២នាក់បង ប្អូនដែលស្លាប់ដោយ សារលង់ទឹក ម្នាក់ឈ្មោះ រ៉េត ណារាជ អាយុ៩ឆ្នាំ និងម្នាក់ទៀតឈ្មោះ រ៉េត កុសល អាយុ១៤ឆ្នាំ ដោយឡែកក្មេងប្រុសម្នាក់ទៀតដែលរួចផុតជីវិតឈ្មោះ រ៉េត ណារ៉ូត អាយុ១១ឆ្នាំ ។ តាមការរៀបរាប់របស់ក្មេងប្រុសណារ៉ូត បាននិយាយថា មុនពេលកើតហេតុ ពួកគេទាំង៣នាក់បងប្អូនបាននាំគ្នាទៅស្ទូចត្រីនៅស្ទឹងជ្រៃបាក់ ។ ពេលកំពុងស្ទូចត្រីនោះ កូនបងឈ្មោះ រ៉េត កុសល អាយុ១៤ឆ្នាំ បានលោតទឹកលេងស្មានតែទឹកនោះរាក់ និងម្យ៉ាងក៏ចេះហែលទឹកតិចៗដែរ ប៉ុន្តែពេលលោតទៅចំទឹកជ្រៅ ហែលមិនរួចបណ្តាលឱ្យលង់ទឹក ឃើញដូចនោះកូនប្អូនឈ្មោះ រ៉េត ណារាជ ចុះទៅជួយក៏លង់ទាំង២នាក់តែម្តង ។ ភ្លាមនោះរូបគេ(រ៉េត ណារ៉ូត) មិនហ៊ានចុះទៅជួយទេព្រោះមិនចេះហែលទឹក ក៏រត់មកផ្ទះប្រាប់អ្នកជិតខាងឱ្យមកជួយមុជរាវរក ប៉ុន្តែទម្រាំរត់ទៅហៅ និងទម្រាំត្រលប់មកមុជរាវរកឃើញវិញ ពួកគេបានលង់ទឹកស្លាប់ទាំង២នាក់បាត់ទៅហើយ ។
ក្នុង លំនៅឋានដ៏តូចដែលធ្វើពីឈើ ប្រក់ និងបាំងជញ្ជាំងស្លឹក ស្ថិតក្នុងភូមិជ្រៃបាក់ សពកុមារទាំង២នាក់ត្រូវបានដាក់ឱ្យដេកទន្ទឹមគ្នា ប្របមាត់ទ្វារ ក្រោមសំឡេងស្រែកទ្រហោយំគួរឱ្យសង្វេគរបស់កូនស្រីជាបងបង្អស់បាន រៀបរាប់ថា ម៉ែឪបានទៅចោលពួកយើងអស់ហើយ ឥឡូវពួកឯងទៅចោលបងគ្មានថ្ងៃត្រលប់ទៀត ពួកយើងមានបងប្អូន៥នាក់ ឯងបានស្លាប់ចោលពួកយើង២នាក់ហើយ មិនគួរពួកឯងមានអាយុខ្លីបែបនេះសោះ ។
លោក មេភូមិ ជ្រៃបាក់បាននិយាយថា គ្រួសារនេះឪពុកម្តាយបានបោះបង់ចោលពួកគេ ក្រោមការគ្រប់គ្រងពីជីដូនអាយុ៦២ឆ្នាំ ឈ្មោះ ឡេង ផេន ដែលមានផ្ទះជាប់គ្នា ។ កូនស្រីបងបង្អស់មានឈ្មោះ រ៉េត ចាន់ឌី អាយុ១៧ឆ្នាំ និងកូនប្រុសពៅមានឈ្មោះ រ៉េត វីរៈ អាយុ៧ឆ្នាំ។
សព កុមារទាំង២នាក់បងប្អូនត្រូវបាន អ្នកភូមិជួយចាត់ចែងធ្វើបុណ្យតាមប្រពៃណី ក្រោមការយំខ្សឹកខ្សួលពីជីដូន និងបងស្រី ព្រមទាំងអ្នកជិតខាងដែលមានការសង្វេគ និងខ្លោចចិត្តជាទីបំផុត ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]