រាជធានីភ្នំពេញ ៖ តារាចម្រៀងកំពុងលេចធ្លោនៅផលិតកម្មរស្មីហង្សមាស ឱក សុគន្ធកញ្ញា បានប្រាប់បណ្តាញសារព័ត៌មានថា នាងនឹងចេញទៅសម្តែងនៅប្រទេសកាណាដា ក្នុងរយៈពេល២ខែ ។ ការចាកចេញនោះអាចក្នុងអំឡុងរដូវភ្លៀងធ្លាក់ ។ នាងចេញទៅសម្តែងលើកនេះ គឺតែម្នាក់ឯងប៉ុណ្ណោះ មិនមានវត្តមានកម្លោះរ៉េត ធីដូណា ទេ ។
ឱក សុគន្ធកញ្ញា គឺជាតារាចម្រៀងល្បី មិនគ្រាន់តែក្នុងផលិតកម្មរស្មីហង្សមាសប៉ុណ្ណោះទេ តែអាចនិយាយថា ក្នុងចំណោមតារាចម្រៀងស្រី គឺឱក សុគន្ធកញ្ញា កំពុងលេចធ្លោក្នុងវិស័យសិល្បៈចម្រៀងសម័យទំនើបនៅកម្ពុជា ។ ទន្ទឹមនឹងកេរ្តិ៍ឈ្មោះល្បីល្បាញក្នុងពិភពបទចម្រៀង ឱក សុគន្ធកញ្ញា ត្រូវបានគេមើលឃើញថា កំពុងត្រូវក្រុមហ៊ុនមួយចំនួនចាប់អារម្មណ៍ និងអញ្ជើញទៅថតស្ប៉តពាណិជ្ជកម្មធំៗ រួមមាន ភេសជ្ជៈ Coca-Cola សាប៊ូកក់សក់ Sunsilk និងបណ្តាញទូរស័ព្ទ Smart Mobile ដែលគេគិតថាមានតម្លៃខ្លួនខ្ពស់រហូតរាប់ម៉ឺនដុល្លារឯណោះ ។ ចំពោះការចេញទៅសម្តែងនៅប្រទេសកាណាដារយៈពេល២ខែតាមគម្រោងនោះ គឺគេប៉ាន់ស្មានថា នាងនឹងរកប្រាក់បានរាប់ម៉ឺនដុល្លារបន្ថែមទៀត ព្រោះនាងមិនគ្រាន់តែល្បីក្នុងប្រទេសប៉ុណ្ណោះទេ ប៉ុន្តែនៅក្រៅប្រទេសនាងក៏ជាតារាល្បីមួយរូបផងដែរ ។
មហាជនបានកត់សម្គាល់ឃើញថា មួយរយៈចុងក្រោយនេះ ឱក សុគន្ធកញ្ញា បង្ហាញទេពកោសល្យទាំងការសម្តែង និងបទចម្រៀងធ្វើឱ្យមានការទាក់ទាញ និងភ្ញាក់ផ្អើលបំផុត សំខាន់បទចម្រៀងដែលចេញថ្មីៗនេះគ្មានបទចម្រៀងមួយណាដែលមិនទទួលបានការគាំទ្រទេ ។ និយាយរួមបទចម្រៀងរបស់តារារូបនេះគឺពេញនិយមតែម្តងសម្រាប់ស្រទាប់យុវវ័យ ។ ជួបសម្ភាសន៍ជាមួយកោះសន្តិភាព កាលពីពេលថ្មីៗនេះ ឱក សុគន្ធកញ្ញា បានបង្ហាញក្តីសប្បាយរីករាយ និងថ្លែងអំណរគុណចំពោះទស្សនិកជនដែលបានគាំទ្រនាង ហើយសន្យាថា នាងខឹតខំបង្កើនទេពកោសល្យ ជំនាញបន្ថែមទៀត ដើម្បីបម្រើសេចក្តីត្រូវការរបស់ទស្សនិកជន និងប្រជាពលរដ្ឋទូទាំងប្រទេស ។
កញ្ញា ឱក សុគន្ធកញ្ញា បកស្រាយពីទំនាក់ទំនងរវាងនាងនិងលោករ៉េត ធីដូណា ថា ពួកនាងគ្មានទំនាក់ទំនងស្នេហាដូចអ្វីដែលគេបានលេចឮទេ ព្រោះរហូតមកដល់ពេលនេះ នាងមិនទាន់បានគិតគូរអំពីបញ្ហាស្នេហា ឬគូអនាគតឡើយទេ ។ អ្វីដែលនាងកំពុងតែគិត និងព្យាយាមធ្វើបន្តទៀតនោះ គឺការបម្រើក្នុងវិស័យសិល្បៈ និងធ្វើឱ្យខ្លួនរក្សាបានការគាំទ្រកាន់តែច្រើនបន្ថែមទៀត។
ផ្ទុយពីតារាចម្រៀង ឱក សុគន្ធកញ្ញា លោករ៉េត ធីដូណា កំពុងតែបង្ហាញទំនាក់ទំនងបេះដូងស្អិតរមួតជាមួយនាង ។
គេនឹងចាំមើលតើការពិតរវាងអ្នកទាំងពីរយ៉ាងណា
ផ្តល់សិទ្ធដោយ កោះសន្តិភាព
បញ្ចូលអត្ថបទ ៖ ស្រីណា
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]