រាជធានីភ្នំពេញ ៖ បុរសម្នាក់បានដួលសន្លប់ក្នុងថ្លុកឈាមនៅលើចិញ្ចើមផ្លូវកាលពី វេលាម៉ោង៣ និង២០នាទីទៀបភ្លឺថ្ងៃទី២៧ ឧសភា ឆ្នាំ២០១២ តាមបណ្តោយមហាវិថីព្រះនរោត្តម ក្នុងសង្កាត់ចតុមុខ ខណ្ឌដូនពេញ ដោយសារត្រូវក្រុមក្មេងស្ទាវប្រើដុំថ្ម និងដំបងព្រួតគ្នាវាយ ព្រោះតែចូលច្រៀងខារ៉ាអូខេឱ្យលុយថ្លៃច្រៀងមិនគ្រប់ ។ ចំពោះក្រុមក្មេងស្ទាវព្រួតគ្នាវាយបុរសម្នាក់នេះ ភ្លាមៗប៉ូលិសឃាត់ខ្លួនបាន២នាក់ ប៉ុន្តែពួកគេបដិសេធថា មិនបានវាយឡើយ ទោះជាយ៉ាងណាក្តី ប៉ូលិសបាននាំខ្លួនជនទាំង២នាក់នេះទៅសាកសួរផងដែរ ។ នៅនឹងកន្លែងកើតហេតុ បុរសម្នាក់នេះត្រូវបានគេស្គាល់ថាឈ្មោះឡុង សីហា អាយុ៣០ឆ្នាំ ស្នាក់នៅសំណង់១២ ក្នុងសង្កាត់បឹងសាឡាង ខណ្ឌទួលគោក ។
យោងតាមប្រភពព័ត៌មានពីអ្នកឃើញហេតុការណ៍ ខាងលើ ឱ្យដឹងថា មុនពេលមានការវាយតប់ដោយក្រុមក្មេងស្ទាវ គឺមានការជជែកគ្នាជាមួយបុរសម្នាក់នេះដោយទារលុយថ្លៃច្រៀង ខារ៉ាអូខេ ប៉ុន្តែបុរសនេះប្រកែកថា អស់លុយហើយ។ ពេលនោះក្រុមក្មេងស្ទាវដែលជិះម៉ូតូស៊េរីទំនើបៗម៉ាកហុងដាសេ១២៥ ចំនួន២គ្រឿង និងម៉ាកស្ទេប១គ្រឿង មានគ្នា៥ទៅ៦នាក់ បានប្រើដំបង និងដុំថ្មវាយទៅលើក្បាលបុរសនោះគ្មានត្រាប្រណីឡើយ ។
ក្រោយពីធ្វើសកម្មភាពវាយបុរសខាងលើ ឱ្យដួលក្នុងថ្លុកឈាមហើយ ក្រុមក្មេងស្ទាវទាំងនេះក៏បាននាំគ្នារត់គេចខ្លួន ។ ប៉ុន្តែក្រោយពីកើតហេតុបន្តិច ប៉ូលិសប៉ុស្តិ៍ចតុមុខក៏ឃាត់ខ្លួនបាន២នាក់ ដែលនៅមិនឆ្ងាយប៉ុន្មានពីកន្លែងបុរសដួលសន្លប់ តែក្មេងស្ទាវទាំង២នាក់នេះបដិសេធថា ខ្លួនមិនបានវាយបុរសនោះទេ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]