ខេត្តកំពង់ចាម ៖ ក្រោយពីកើតមានករណីបាញ់ប្រហារយ៉ាងសាហាវព្រៃផ្សៃពីឪពុកមា ជីដូនមួយលើក្មួយស្រីឈ្មោះណយ លឹមសេង អាយុ៣៨ឆ្នាំ រស់នៅភូមិស្រែរំដួល ឃុំដងក្តារ ស្រុកស្ទឹងត្រែង ចំនួន៣គ្រាប់ បណ្តាលឱ្យស្លាប់ ផ្តើមចេញពីរឿងទំនាស់លក់ដីចម្ការនោះ លោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្ត បានចាត់ប៉ូលិសព្រហ្មទណ្ឌកម្រិតធ្ងន់ខេត្តឱ្យទៅស្រាវជ្រាវ ជាបន្ទាន់ ។ សមត្ថកិច្ចចាប់បានជនសង្ស័យជាអ្នកសមគំនិតម្នាក់ត្រូវជាឪពុកមា ដែរ និងជាអ្នកគួកជេលក់ដីបញ្ជូនទៅកាន់ស្នងការដ្ឋាននគរបាល ខេត្ត ។ នេះបើតាមការឱ្យដឹងពីលោកវរសេនីយ៍ទោ សាន សុភា នាយការិយាល័យព្រហ្មទណ្ឌកម្រិតធ្ងន់ខេត្ត នៅព្រឹកថ្ងៃទី២៥ ឧសភា ។ ចំណែកមេខ្លោងដៃដល់វិញពុំទាន់ត្រូវចាប់ខ្លួននៅឡើយទេ ។
នគរបាលស្រុកស្ទឹងត្រង់រំលឹកថា ឪពុកមាឈ្មោះអ៊ឹម ចាន់ អាយុប្រហែល៥០ឆ្នាំ បានប្រើប្រាស់កាំភ្លើងអាកា បាញ់ស្រោចលើក្មួយស្រីប្រមាណជិត១០គ្រាប់ កាលពីវេលាម៉ោង៦និង២០នាទីព្រឹកថ្ងៃទី២៣ ឧសភា នៅភូមិជ្រៃហាយ ឃុំដងក្តារ ស្រុកស្ទឹងត្រង់ បណ្តាលឱ្យត្រូវចំនួន៣គ្រាប់ស្លាប់ក្នុងថ្លុកឈាម ។ ចំណែកអ្នករត់ម៉ូតូឌុបវិញអាយុថ្លៃមិនត្រូវរបួសបានរត់ចូល ក្នុងព្រៃរួចផុតពីគ្រោះថ្នាក់ ។ ឪពុកមារូបនោះបានប្លន់យកលុយចំនួន៣.១០០ដុល្លារ ថ្លៃលក់ដីពីក្មួយស្រីមកវិញ ព្រមទាំងបានរត់គេចបាត់ស្រមោលតាំងពីថ្ងៃនោះមក ។
មន្ត្រីនគរបាលស្រុកស្ទឹងត្រង់ប្រាប់បន្តថា ទំនាស់ដែលឈានរហូតដល់យកកាំភ្លើងបាញ់ប្រហារសម្លាប់ក្មួយស្រី ដោយសារតែឪពុកមានោះ លក់ដីចម្ការចំនួន៩ហិកតា ឱ្យក្មួយស្រីក្នុង១ហិកតាតម្លៃ៦០០ដុល្លារជាប្រភេទដីព្រៃ ហើយត្រូវក្មួយស្រីជួលគេកាប់រានស្អាត និងដាំដំឡូងបាន១ឆ្នាំ ក៏ត្រូវឪពុកមានោះសុំទិញវិញ តែត្រូវក្មួយស្រីលក់ឱ្យក្នុងតម្លៃ១ហិកតាតម្លៃ១.៤០០ដុល្លារ ។ ការលក់នោះបានឱ្យលុយអស់មួយផ្នែកធំ ហើយនៅខ្វះតែ៣.១០០ដុល្លារប៉ុណ្ណោះ ។ ពេលឪពុកមាទៅវាស់ វែងស្រាប់តែឃើញបាត់១៧អារ ទើបកើតទៅជាការឈ្លោះប្រកែកគ្នាតឹងសរសៃកយកឈ្នះរៀងៗ ខ្លួន ។ ក្នុងពេលនោះឪពុកមាបានគម្រាមសម្លាប់ក្មួយស្រីរូបនោះ។
លោកវរសេនីយ៍ទោ សាន សុភា នាយការិយាល័យព្រហ្មទណ្ឌកម្រិតធ្ងន់ខេត្តឱ្យដឹងថា ក្រោយអំពើឃាតកម្មនោះ លោកស្នងការនគរបាលខេត្ត និងលោកស្នងការរងទទួលផែនកណ្តាលយុត្តិធម៌ បានចាត់កម្លាំងឱ្យទៅកន្លែងកើតហេតុ ។ នៅពេលល្ងាចថ្ងៃទី២៣ ឧសភា បានឃាត់ខ្លួនជនសង្ស័យឈ្មោះហេង រីន ភេទប្រុស អាយុ៤៩ឆ្នាំ រស់នៅភូមិអណ្តូងស្វាយ ឃុំព្រែកកក់ ស្រុកស្ទឹងត្រង់ ជាអ្នកគួកជេដីបញ្ជូនទៅកាន់ស្នងការដ្ឋាននគរបាលខេត្ត ។ ជននោះឆ្លើយសារភាពថា គេជាអ្នកសមគំនិតក្នុងករណីឃាតកម្មគ្រោងទុកជាមុននេះ ។ តាមការសារភាពថា កាលពីល្ងាចថ្ងៃទី២២ ឧសភា ពេលស្រ្តីរងគ្រោះឈ្មោះ លឹម សេង ជិះម៉ូតូឌុបទៅយកលុយនៅភូមិគីឡូ១០ ឃុំអារក្សត្នោត បានជាង២.០០០ដុល្លារ នៅខ្វះមួយចំនួនទៀតណាត់ឱ្យទៅយកនៅផ្ទះរបស់ឈ្មោះរីន នៅភូមិអណ្តូងស្វាយ ឃុំព្រែកកក់ និងតម្រូវឱ្យដេក១យប់ ដើម្បីរៀបគម្រោងសម្លាប់ស្រ្តីរងគ្រោះបំបិទមាត់ ។
លោកវរសេនីយ៍ទោ សាន សុភា នាយការិយាល័យព្រហ្មទណ្ឌកម្រិតធ្ងន់ខេត្តបានបញ្ជាក់ថា នាល្ងាចថ្ងៃទី២២ ឧសភា ជនសង្ស័យរូបនេះ និងមេខ្លោងឈ្មោះអ៊ឹម ចាន់ បានទៅយកកាំភ្លើងអាកា ១ដើមពីក្នុងចម្ការមួយព្រមទាំងផឹកជាមួយគ្នាទៀតផង និងបានដេកនៅក្នុងដីចម្ការរបស់ឈ្មោះរីន ។ នៅវេលាម៉ោងប្រហែលជាង៥ព្រឹក ឈានចូលថ្ងៃទី២៣ ឧសភា ឈ្មោះរីន បានដើរទៅផ្ទះវិញ ព្រមទាំងប្រគល់លុយចំនួន៣.១០០ដុល្លារ ទៅឱ្យស្ត្រីរងគ្រោះហើយក៏បានឱ្យលិខិតទិញលក់ដី ។
ស្របពេលស្ត្រីរងគ្រោះជិះម៉ូតូឌុបទៅដល់ ភូមិជ្រៃហាយ ឃុំដងក្តារ ត្រូវឪពុកមាស្ទាក់បាញ់ប្រហារចំនួនជិត១០គ្រាប់ បណ្តាលឱ្យក្មួយស្រីឈ្មោះលឹម សេង ត្រូវ៣គ្រាប់ស្លាប់នៅក្នុងថ្លុកឈាម ហើយអ្នករត់ម៉ូតូឌុបជីវិតថ្លៃមិនត្រូវរបួសរបួសអ្វីទេ ក៏រត់យករួចខ្លួន ។ ចំណែកមេខ្លោងឃាតកដៃដល់បានយកប្រាក់ថ្លៃលក់ដីចំនួន៣.១០០ ដុល្លារ រត់គេចខ្លួនបាត់ស្រមោលរហូតដល់ម៉ោង២រសៀលថ្ងៃទី២៥ ឧសភា មិនទាន់ចាប់ខ្លួនបាននៅឡើយ ហើយសមត្ថកិច្ចកំពុងតាមស្វែងរកចាប់ខ្លួន ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]