រាជធានីភ្នំពេញ ៖ កញ្ញាកាកា ត្រូវគេស្គាល់តាមរយៈការថតស្ប៉តពាណិជ្ជកម្មជាច្រើនដូចជា ហេឡូ សាប៊ូកក់សក់សាន់ស៊ីល សារាយថៅកែណយ ទស្សនាវដ្តីឡេឌី មិត្តហ្វូន អែមហ្វូន ស្រាបញ្ញាសូ និងស្ប៉តពាណិជ្ជកម្មជាច្រើនទៀត ប៉ុន្តែស្ងាត់មួយរយៈទៅវិញ ដោយសារតែនាងទៅបន្តការសិក្សាផ្នែកអក្សរសាស្ត្រអង់គ្លេស នៅប្រទេសថៃ រយៈពេល១ឆ្នាំ ។ ពេលនេះនាងបានត្រឡប់មកវិញហើយ និងកំពុងតែបោះជំហានចូលពិភពសិល្បៈយ៉ាងសន្សឹមៗ ដើម្បីចង់បានឈ្មោះជាតារាឆ្នើមប្រចាំឆ្នាំនេះ ។
កញ្ញាកាកា ប្រាប់កោះសន្តិភាពឱ្យដឹងថា នាងចូលប្រឡូកសិល្បៈតាំងពីឆ្នាំ២០០៨មកម៉្លេះ ដោយនាងចូលតាមរយៈមិត្តភក្តិ ហើយចាប់ផ្តើមតំបូងគឺថតស្ប៉តពាណិជ្ជកម្ម ។ ថ្មីៗនេះនាងបានថតខារ៉ាអូខេ ឱ្យផលិត កម្មសាន់ដេ និងថតស្ប៉តឱ្យម៉ាកកាមេរ៉ាផងដែរ ។ កាកាត្រូវផលិតកម្មមួយចំនួនទាក់ទងឱ្យថតខារ៉ាអូខេ និងខ្សែភាពយន្តដែរ តែដោយសារនាងមានការមមាញឹកក្នុងការសិក្សាច្រើនពេក ដូច្នេះហើយក៏បដិសេធ ។ ទោះជាយ៉ាងណាក្តីពេលនេះនាងនឹងឆ្លៀតពេលឱ្យបានច្រើននៅក្នុងវិស័យសិល្បៈវិញ ព្រោះអាជីពសិល្បៈនាងមានបំណងប្រាថ្នាតាំងពីកុមារភាពមកម៉្លេះ ។
ស្រីតូចច្រឡឹងរូបនេះបន្ថែមទៀតថា ឆ្នាំនេះនាងមានអាយុ២២ឆ្នាំហើយ ៗនាងកំពុងតែបន្តការសិក្សានៅ២កន្លែង គឺវិទ្យាស្ថានវ៉ាន់ដា និងសាកលវិទ្យាល័យបញ្ញាសាស្ត្រ ផ្នែកអក្សរសាស្រ្តអង់គ្លេស ។ នាងមានបងប្អូនចំនួន៤នាក់ ប្រុសម្នាក់ ស្រី៣នាក់ ចំណែកនាងជាកូនពៅ ។ នៅក្នុងត្រកូលរបស់នាងមិនមានអ្នកណាម្នាក់ជាអ្នកសិល្បៈទេ ដោយឪពុកម្តាយជាអ្នករកស៊ីធម្មតានៅរាជធានីភ្នំពេញ ។
តារារូបនេះចូលចិត្តសម្លៀកបំពាក់បែបសិចស៊ី ប៉ុន្តែគេមិនដឹងថាតើនាងហ៊ានថតស្ប៉ត ឬក៏ចូលចិត្តថតរូបសិចស៊ីបញ្ចេញដើមទ្រូងយ៉ាងស្រស់ស្អាតដូច ជាតារាមួយចំនួននៅក្នុងប្រទេសកម្ពុជាយើងដែរឬក៏យ៉ាងណាទេ ។
ទាក់ទិនទៅនឹងបញ្ហានេះកាកា ប្រាប់ឱ្យដឹងថា «ថ្វីដ្បិតតែខ្ញុំចូលចិត្តស្លៀកពាក់សិចស៊ីបន្តិចមែន ប៉ុន្តែខ្ញុំមិនហ៊ានថតស្ប៉តពាណិជ្ជកម្ម ឬក៏ថតបែបសិចស៊ីបញ្ចេញលើ បញ្ចេញក្រោមទេ ព្រោះខ្ញុំជាកូនខ្មែរ ខ្ញុំស្រលាញ់ប្រពៃណី និងវប្បធម៌ខ្មែរ ។ និយាយរួមខ្ញុំមិនចូលចិត្តសិចស៊ីពេក គឺចូលចិត្តសិចស៊ីបែបធម្មតាៗ» ។
ចំពោះបញ្ហាស្នេហាវិញកាកា ប្រាប់ឱ្យដឹងថា សព្វថ្ងៃនេះនាងមានគេតាមស្រលាញ់ច្រើនណាស់ទាំងបុរសចាស់ និងក្មេង ប៉ុន្តែនាងមិនទាន់ហ៊ានជ្រើសរើសទេ ចង់ទុកពេលសម្រាប់ការសិក្សា និងសិល្បៈឱ្យច្រើនជាងរឿងស្នេហា ។ ក្រៅពីការសិក្សា និងសិល្បៈនាងក៏មានបំណងចង់បើកហាងលក់សម្លៀកបំពាក់មួយកន្លែងផងដែរ៕
ផ្តល់សិទ្ធដោយ កោះសន្តិភាព
បញ្ចូលអត្ថបទ ៖ ស្រីណា
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]