រាជធានីភ្នំពេញ ៖ ម៉ូតូអាយខន់ ១គ្រឿង ដួលលើម៉ូតូសង់កូរ៉េ នៅចិញ្ចើមផ្លូវ ហើយម្ចាស់ម៉ូតូអាយខន់ ស្រែកថាជាករណីប្លន់យកម៉ូតូ តែតាមការសន្និដ្ឋានរបស់ប៉ូលិសមូលដ្ឋានថាជាគ្រោះថ្នាក់ចរាចរណ៍ ។ ហេតុការណ៍នេះកើតឡើងកាលពីវេលាម៉ោង១២និង១៥នាទីរំលងអធ្រាត្រ ថ្ងៃទី២៤ ឧសភា នៅតាមផ្លូវលេខ៤៨៨កែងផ្លូវលេខ១៤៥ ក្នុងសង្កាត់ផ្សារដើមថ្កូវ ខណ្ឌចំការមន។
ប្រភពព័ត៌មានឱ្យដឹងថា ម៉ូតូអាយខន់ ជិះតាមផ្លូវលេខ៤៨៨ ពីកើតទៅលិច ចំណែកម៉ូតូសង់កូរ៉េ ជិញគ្នា៣នាក់ ជាបុរស ក្នុងទិសដៅផ្ទុយគ្នា លុះដល់ផ្លូវកែងលេខ១៤៥ ម៉ូតូសង់កូរ៉េក៏បត់ឆ្វេងបណ្តាលឱ្យបុកដួលលើគ្នាតែម្តង ។អ្នកបើកម៉ូតូអាយខន់ ឈ្មោះជន សំកាល់ ភេទប្រុស អាយុ២៨ឆ្នាំ ជាជាងជួលជុលរថយន្តនៅយានដ្ឋានពេញចិត្ត ស្នាក់នៅភូមិសន្សំកុសល សង្កាត់បឹងទំពុន សង្កាត់មានជ័យ ឱ្យដឹងថា ខណៈរូបគេជិះម៉ូតូត្រឡប់មកពីដឹកមិត្តភក្តិជាជាងជួសជុល រថយន្តពីស្ទឹងមានជ័យទៅយានដ្ឋាន បានប្រមាណ៣០ម៉ែត្រ ស្រាប់តែត្រូវបុរស៣នាក់ជិះម៉ូតូសង់កូរ៉េ ក្នុងទិសដៅផ្ទុយគ្នា មកដល់ធាក់ម៉ូតូរបស់គេដួល ហើយយកឈើជ្រុងវាយគេបែកចិញ្ចើមខាងឆ្វេង និងវាយខ្លួនប្រាណទៀត ។
ស្របពេលនោះបុរសម្នាក់ជិះម៉ូតូណៃហត មកដល់ឃើញកំពុងតែប្រតាយប្រតប់គ្នាក៏ដកកាំភ្លើងបាញ់ឡើងលើ មួយគ្រាប់ ធ្វើឱ្យបុរស៣នាក់នោះរត់គេចខ្លួនតាមផ្លូវលេខ១៤៥បាត់ស្រមោល ។ ចំណែកបុរសអ្នកបាញ់នោះក៏ជិះម៉ូតូចេញទៅបាត់ដែរ ហើយរូបគេបានរត់សំដៅទៅយានដ្ឋានបណ្តើរស្រែកថាចោរប្លន់បណ្តើរ ។
ទាក់ទិននឹងករណីនេះប៉ូលិសមូលដ្ឋានថា ជាករណីគ្រោះថ្នាក់ចរាចរណ៍ មិនមែនជាករណីប្លន់យកម៉ូតូទេ ។ ម៉ូតូទាំងពីរគ្រឿងត្រូវសមត្ថកិច្ចវាស់វែង និងយកទៅរក្សាទុកនៅអធិការដ្ឋានខណ្ឌចំការមន រង់ចាំម្ចាស់ម៉ូតូសង់កូរ៉េត្រឡប់ទៅដោះស្រាយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]