រាជធានីភ្នំពេញ ៖ រថយន្តកាមរីឆ្លាមមួយគ្រឿងបើកបរដោយមន្ត្រីយោធាម្នាក់ស្រវឹងជោកបានបោះពួយយ៉ាងលឿនជ្រុលទៅបុករះអ្នកជិះម៉ូតូពីរគ្រឿងជាបន្តបន្ទាប់បណ្តាលឱ្យអ្នកបើកបរម៉ូតូម្នាក់ស្លាប់ភ្លាមៗនៅនឹងកន្លែង និងម្នាក់ទៀតរងរបួសធ្ងន់ ។ រីឯរថយន្តបានរេចង្កូតឡើងចិញ្ចើមផ្លូវរួចជ្រុលទៅបុកដើមឈើធំមួយដើម បណ្តាលឱ្យក្រពឹតរួញខូចខាតទាំងស្រុង ។ ហេតុការណ៍នេះបានកើតឡើងកាលពីវេលាម៉ោង៨និង២០នាទីយប់ ថ្ងៃទី២៥ មករា ២០១២ នៅលើកំណាត់វិថីសហព័ន្ធរុស្ស៊ីត្រង់ចំណុចផ្លូវកោងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ។
ប្រភពបានឱ្យដឹងថា រថយន្តបង្កដែលបុកមនុស្សស្លាប់ និងរបួសនោះម៉ាកតូយ៉ូតាកាមរីឆ្លាមពណ៌ស្ករ បើកបរដោយមន្ត្រីយោធាម្នាក់ស្រវឹងជោក។ ចំណែកជនរងគ្រោះដែលស្លាប់ឈ្មោះឌុល ផៃ ភេទប្រុស អាយុ៤៥ឆ្នាំ មានស្រុកកំណើតភូមិព្រៃស្និត ឃុំមានជ័យ ស្រុកឧដុង្គ ខេត្តកំពង់ស្ពឺ បច្ចុប្បន្នមានទីលំនៅផ្ទះលេខ៤៨ ផ្លូវជាតិលេខ៤ ភូមិអង្គ សង្កាត់ចោមចៅ ខណ្ឌពោធិ៍សែនជ័យ ជិះម៉ូតូម៉ាកហុងដា C125 ស៊េរីឆ្នាំ២០០៨ ពណ៌ខ្មៅ និងអ្នករងរបួសធ្ងន់ឈ្មោះចេង គឹមហេង ភេទប្រុស អាយុ១៩ឆ្នាំ មានទីលំនៅផ្ទះលេខ១០៦ ភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ជិះម៉ូតូម៉ាកហុងដាគុបជ្រុង C50 ពណ៌ទឹកប៊ិចចាស់ កំពុងសម្រាកព្យាបាលរបួសនៅមន្ទីរពេទ្យ ។ តាមប្រភពព័ត៌មានបានឱ្យដឹងថា នៅមុនពេលកើតហេតុគេឃើញជនរងគ្រោះទាំងពីរនាក់ខាងលើជិះម៉ូតូក្នុងដំណើរពីជើងទៅត្បូងស្របទិសគ្នា ខណៈនោះស្រាប់តែមានរថយន្តម៉ាកកាមរីឆ្លាមបើកយ៉ាងលឿនស្របគ្នាជាមួយអ្នកជិះម៉ូតូទាំងពីរគ្រឿងនោះដែរ ។ ប្រភពដដែលបានបន្តទៀតថា លុះទៅដល់ត្រង់ចំណុចផ្លូវកោងកន្លែងកើតហេតុរថយន្តកាមរីឆ្លាមបានបុករះម៉ូតូទាំងពីរគ្រឿងពីក្រោយពេញទំហឹងជាបន្តបន្ទាប់រួចក៏ជ្រុលឡើងទៅលើចិញ្ចើមផ្លូវ ហើយបុកដើមឈើធំមួយដើម បណ្តាលឱ្យក្រពឹតរួញផ្ទុះពោងសុវត្ថិភាពទាំងអស់ ទើបទៅមុខលែងរួច ។
ក្រោយពេលកើតហេតុអ្នកបើកម៉ូតូឌ្រីម C125 បានខ្ទាតចេញពីម៉ូតូចម្ងាយជាង៥ម៉ែត្រស្លាប់ភ្លាមៗនៅនឹងកន្លែង។ រីឯម៉ូតូគុបជ្រុងជ្រុលទៅមុខចម្ងាយពីរថយន្តជាង១០ម៉ែត្រអ្នកបើកបររងរបួសធ្ងន់ ហើយម៉ូតូទាំងពីរគ្រឿងសុទ្ធតែខ្ទេចមួយកំណាត់ខាងក្រោយដូចគ្នា៕
ដកស្រង់ពី គេហទំព័រ កោះសន្តិភាព
រាល់មតិទាំងអស់ ខាងក្រោម ជាងការសំដែងមតិ តាម Facebook មិនមែនជា ការទទួលខុសត្រូវ របស់កោះសន្តិភាព។
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]