កំពង់ចាមៈស្ត្រីម្នាក់បានលក់ដីហើយ អ្នកទិញប្រគល់លុយ ឲ្យមិនទាន់គ្រប់ផង ត្រូវអ្នកទិញបាញ់សម្លាប់ យកលុយវិញ រត់គេចខ្លួនបាត់ស្រមោល។
ហេតុការណ៍នេះ បានកើតឡើងកាលពីវេលាម៉ោង ៩ព្រឹកថ្ងៃទី២៣ ខែឧសភា ឆ្នាំ២០១២ នៅភូមិជ្រៃហាយ ឃុំដងក្តារ ស្រុកស្ទឹងត្រង់ ខេត្តកំពង់ចាម។
អធិការនគរបាលស្រុកស្ទឹងត្រង់ លោកជា ធារិទ្ធ បានប្រាប់មជ្ឈមណ្ឌលព័ត៌មាន ដើមអម្ពិលដឹងថា ស្រី្តរងគ្រោះមានឈ្មោះ លឹម សេង អាយុ៣៨ឆ្នាំ រស់នៅភូមិស្រែរំដួល ឃុំដងក្តារ ស្រុកស្ទឹងត្រង់។ ដោយឡែក ជនដៃដល់ដែលប្រើកាំភ្លើងអាកា បាញ់ទៅលើស្រ្តីរងគ្រោះ សមត្ថកិច្ចនគរបាល ស្រុកស្ទឹងត្រង់ បានកំណត់ មុខសញ្ញាបានច្បាស់លាស់ ហើយជនល្មើសនោះ មានឈ្មោះ សុខ ចាន់ ភេទប្រុស អាយុ៥០ឆ្នាំ ស្នាក់នៅភូមិជាមួយជនរងគ្រោះដែរ ។
លោកអធិការបានឲ្យដឹងទៀតថា ក្នុងករណីខាងលើដើមឡើយ ស្រ្តីរងគ្រោះបានទិញដីពីឈ្មោះ ចាន់ នោះ ទំហំ៩ហិកតា ក្នុងតម្លៃ៦០០ដុល្លារ ជាប្រភេទដី ស្ថិតនៅចំណុចទទឹងថ្ងៃ ឃុំអារក្សត្នោត ស្រុកស្ទឹងត្រង់។ លុះកន្លងមកជាច្រើនឆ្នាំ ស្រ្តីរងគ្រោះបានកាប់ព្រៃរានធ្វើចំការ រហូតមកសព្វថ្ងៃ។ លុះហើយដីចំការនោះល្អ ជនល្មើសឈ្មោះ ចាន់ បានសុំទិញពីស្រ្តីរងគ្រោះវិញ ដោយព្រមគ្នាក្នុងតម្លៃ ១២.១០០ដុល្លារ លុះដល់ពេលនាំគ្នាទៅវាស់ដី ឃើញថា ទំហំដីនោះមិនគ្រប់៩ហិកតាទេ ពោលគឺខ្វះ ១៧អារ ក្រោយពីដឹងថា ខ្វះអ្នកទិញឈ្មោះចាន់បានប្រកែកគ្នា ជាមួយស្ត្រីរងគ្រោះ បន្ទាប់មកឈ្មោះ ចាន់ បានប្រគល់លុយឲ្យ ទៅស្រ្តីរងគ្រោះ ចំនួន៩.០០០ដុល្លារសិន នៅខ្វះច្រាក់ចំនួន ៣១០០ដុល្លារទៀត។ លុះនៅព្រឹកថ្ងៃកើតហេតុ ស្រ្តីរងគ្រោះបានទៅភូមិអណ្តូងស្វាយ ដើម្បីយកលុយ ដែលនៅខ្វះ ៣១០០ដុល្លារ នោះ ប៉ុន្តែពេលនោះ អ្នកទិញឈ្មោះ ចាន់ បានប្រគល់លុយឲ្យតែចំនួន ២.៨៦០ដុល្លារ ហើយបន្ទាប់មកស្រ្តីរងគ្រោះ បានជិះម៉ូតូជាមួយប្អូនធម៌ ត្រឡប់មកផ្ទះវិញ លុះជិះចេញពីភូមិអណ្តូងស្វាយ បានប្រហែល ២គីឡូម៉ែត្រ ស្រាប់តែអ្នកទិញដីឈ្មោះចាន់ បានយកកាំភ្លើងម៉ាកអាកា បាញ់ទៅលើស្រ្តីរងគ្រោះ បណ្តាលឲ្យស្លាប់តែម្តង ហើយក្រោយពីធ្វើសកម្មភាព ជនដៃដល់រូបនោះ បានរត់គេចខ្លួនបាត់ទៅ។
លោកអធិការបានបន្តទៀតថា បច្ចុប្បន្នជនល្មើស សមត្ថកិច្ចនគរបាលស្រុកស្ទឹងត្រង់ កំពុងធ្វើការស្រាវជ្រាវ តាមចាប់ខ្លួនយកមក ផ្តន្ទាទោសទៅតាមផ្លូវច្បាប់ ចំណែកសពស្រ្តីរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី៕
ផ្តល់សិទ្ធដោយ ដើមអម្ពិល
ឪពុកមាជីដូនមួយទិញដីពីក្មួយស្រីហើយ បាញ់ក្មួយស្រីស្លាប់ប្លន់យកលុយវិញ
ខេត្តកំពង់ចាម ៖ រឿងទំនាស់ដីចម្ការទំហំ៩ហិកតា ឪពុកមាជីដូនមួយបានក្លាយទៅជាឃាតករស្ទាក់បាញ់ប្រហារអស់ជិត១០គ្រាប់ មកលើក្មួយស្រីឈ្មោះណយ លឹមសេង អាយុ៣៨ឆ្នាំ រស់នៅភូមិស្រែរំដួល ស្រុកស្ទឹងត្រង់ត្រូវចំនួន៣គ្រាប់ចំដៃឆ្វេង ក្បាល និងទ្រូងស្លាប់ភ្លាមៗមួយរំពេច បន្ទាប់ពីទិញដីពីក្មួយស្រីហើយ តាមបាញ់ប្លន់យកលុយវិញ ។
ហេតុការណ៍នេះ បានកើតឡើងកាលពីវេលាម៉ោង៦ និង២០នាទីព្រឹកថ្ងៃទី២៣ ឧសភា ២០១២ ស្ថិតនៅត្រង់ចំណុចក្នុងភូមិជ្រៃហាយឃុំដងក្តារ ស្រុកស្ទឹងត្រង់ ពេលដែលស្ត្រីរង គ្រោះកំពុងតែជិះម៉ូតូទៅយកលុយថ្លៃលក់ដីតាមការណាត់ពីជនដៃដល់នៅខ្វះចំនួន៣.១០០ដុល្លារទៀត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
