រាជធានីភ្នំពេញ ៖ គេនៅចាំបានថា អ្នកនាងគីង សូរិយា វ័យ៣៩ឆ្នាំ និងទម្ងន់ឡើងដល់ទៅ៧០គីឡូក្រាមនោះ គឺជាតារាចម្រៀងមានទឹកដមសំឡេងដូចអ្នកស្រីប៉ែន រ៉ន ។ បើគេគ្រាន់តែបានស្តាប់សំឡេងច្រៀងមិនបានឃើញរូបនោះ គេច្បាស់ជាយល់ច្រឡំថាជាសំឡេងរបស់អ្នកស្រីប៉ែន រ៉ន ជាមិនខាន តែការពិតគឺអ្នកនាងគីង សូរិយា ។ នាងគឺជាតារាចម្រៀងដែលល្បីឈ្មោះបោះសំឡេងតាមរយៈច្រៀងបទ របស់អ្នកស្រីប៉ែន រ៉ន ហើយមានទឹកដមសំឡេងពីរោះរណ្តំចិត្តដូចអ្នកស្រីប៉ែន រ៉ន ។ នាងបានបាត់ខ្លួនជាង១០ឆ្នាំមកហើយ ដោយទៅរស់នៅសហរដ្ឋអាមេរិក នៅរដ្ឋកាលីហ្វ័រនីញ៉ា ក្នុងទីក្រុងឡងប៊ិច ។
កាលពីថ្ងៃទី១៧ ឧសភា ២០១២ គេឃើញនាងនាំស្វាមីមកចូលរួមច្រៀង និងសម្ភាសន៍ក្នុងកម្មវិធីជីវិតសិល្បៈនៃស្ថានីយទូរទស្សន៍ខ្មែរ ប៉ុស្តិ៍លេខ៩ សម្រាប់ចាក់ផ្សាយនៅថ្ងៃទី២៧ ឧសភា ២០១២ ។ នៅចំពោះមុខអ្នកយកព័ត៌មានកោះសន្តិភាព អ្នកនាងគីង សូរិយា រៀបរាប់ឱ្យដឹងថា នាងមានស្រុកកំណើតនៅភ្នំពេញ ឪពុកឈ្មោះគីង សារុន ស្លាប់ ម្តាយឈ្មោះឯម វណ្ណា ហើយនាងមានបងប្អូន៦នាក់ ក្នុងនោះប្រុសម្នាក់ ឯនាងជាកូនច្បង ។ បងប្អូនរបស់នាងក្លាយជាអ្នកសិល្បៈចម្រៀង២នាក់ គឺរូបនាង និងប្អូនស្រីឈ្មោះគីង សូលីដែត ។ ពេលប្រទេសមានសង្គ្រាមឪពុកម្តាយនាងបាននាំនាងទៅរស់នៅក្នុង ជំរំជនភៀសខ្លួននៅតាមព្រំដែនកម្ពុជា-ថៃ ។ នាងធ្លាប់ហាត់ច្រៀងនៅជំរំជាមួយលោកគ្រូអ៊ុំ តារា និងលោកគ្រូអ្នកគ្រូជាច្រើនរូបទៀត ។ កាលពីនាងនៅជំរំនាងធ្លាប់ប្រឡងច្រៀងជាប់ចំណាត់ថ្នាក់លេខ ១។
ក្រោយពីចេញពីជំរំអ្នកនាងគីង សូរិយា បានថតសំឡេងចូលស៊ីឌីឱ្យផលិតកម្មទាំងក្រៅ និងក្នុងប្រទេសជាច្រើន ព្រមទាំងច្រៀងនៅតាមរង្គសាល និងភោជនីយដ្ឋានក្នុងទីក្រុងភ្នំពេញ តាំងពីឆ្នាំ១៩៩៦ មក ។ ដំបូងនាងថតសំឡេងឱ្យផលិតកម្ម S.K និងផលិតកម្មសាយណ្ហតារា ដោយលើកយកតែបទចម្រៀងរបស់អ្នកស្រីប៉ែន រ៉ន មកច្រៀងឡើងវិញរាប់រយបទ ។ ចំពោះបទថ្មីៗរបស់នាងដែលមានការគាំទ្រពីមហាជនអ្នកស្តាប់ច្រើន បំផុតនោះគឺបទ «កម្មករនារីកាត់ដេរ» និងបទ«រើសយកមួយណា» ។ ចំណែកបទរបស់អ្នកស្រីប៉ែន រ៉ន មានគេចាប់អារម្មណ៍ខ្លាំងគឺ «នឹកបងណាស់» ។ អ្នកនាងគីង សូរិយា បន្តថា នាងបានឃ្លាតឆ្ងាយពី មហាជនទូទាំងប្រទេសជាង១០ឆ្នាំ ហើយ គឺតាំងពីឆ្នាំ២០០០មក ប៉ុន្តែនាងបានមកលេងប្រទេសកំណើតបានចំនួន៥ដងមកហើយទាំង ពេលនេះ ។
អ្នកនាងគីង សូរិយា ប្រាប់ថានាងមកដល់ស្រុកខ្មែរយើងលើកទី៥នេះ កាលពីថ្ងៃទី២៤ មេសា ២០១២ ហើយវិលត្រឡប់ទៅសហរដ្ឋអាមេរិកវិញថ្ងៃទី១៩ ឧសភា ២០១២ ។ នាងសន្យាថា ប្រមាណ៥ខែទៀត នឹងវិលមករស់នៅក្នុងប្រទេសកម្ពុជា និងប្រកបអាជីពជាអ្នកចម្រៀងថតវិញ។ ចំពោះការរស់នៅសហរដ្ឋអាមេរិកដំបូងនាងច្រៀងផង ធ្វើការនៅកាស៊ីណូផង ព្រោះថានៅទីនោះច្រៀងបានតែ៣ថ្ងៃ ប៉ុណ្ណោះគឺថ្ងៃសុក្រ សៅរ៍ និងអាទិត្យ ។ ពេលទំនេរពីច្រៀង៣ថ្ងៃនោះ នាងទៅធ្វើការនៅកាស៊ីណូ ។
អ្នកនាងគីង សូរិយា ពេលដើរកម្សាន្តនៅតាមតំបន់ទេសចរណ៍ធម្មជាតិ និងប្រាសាទបុរាណស្ទើរតែគ្រប់ខេត្ត-ក្រុង កត់សម្គាល់ឃើញថា ប្រទេសជាតិមានការរីកចម្រើនខ្លាំងណាស់ ។ នាងឃើញមានអគារធំខ្ពស់ៗច្រើន មានស្ពាន ផ្លូវជាតិខ្វាត់ខ្វែងនៅទូទាំងប្រទេស ងាយស្រួលទៅមក។ ដូច្នេះហើយទើបនាងចង់មករស់នៅក្នុងប្រទេសជាទីស្រឡាញ់វិញ ។ អ្នកនាងគីង សូរិយា ប្រាប់ថា នាងធ្លាប់រៀបការមុនក្លាយជាអ្នកចម្រៀង កាលពីនៅជំរំ តែរស់នៅជាមួយគ្នាបានកូនប្រុសម្នាក់ ក៏បែកគ្នាក្នុងអំឡុងឆ្នាំ១៩៩៥។ នៅឆ្នាំ២០០៥ ពេលនាងរស់នៅសហរដ្ឋអាមេរិកក៏រៀបការម្តងទៀត ជាមួយលោកពេជ្រ គង់ ជាជាងជួសជុលរថយន្តក្រុង ហើយមកដល់ពេលនេះមានកូនស្រីម្នាក់ ។
ចំពោះស្វាមីនាងនិយាយថា លោកស្រឡាញ់នាងគីង សូរិយា បំផុតគឺសំឡេង និងបន្ទាប់មកក្នាញ់សាច់ធាត់ទ្រលុកទ្រលន់របស់នាង ។ លោកបន្តថា «មួយវិញទៀតខ្ញុំស្រឡាញ់គាត់កាន់តែខ្លាំងនោះគឺដោយសារគាត់ បង្ហាត់ឱ្យខ្ញុំចេះច្រៀងបានចំនួន១០បទក្នុងរយៈពេល៤ ឆ្នាំ គឺខ្ញុំអាចច្រៀងឱ្យគាត់ស្តាប់ ច្រៀងបទឆ្លើយឆ្លងជាមួយគាត់បាន »។ លោកគង់ កើតនៅឆ្នាំ១៩៧១ និងចេញទៅសហរដ្ឋអាមេរិកនាឆ្នាំ១៩៨៥ ។ នេះជាលើកទី១ហើយ ដែលលោកមកលេងស្រុកខ្មែរជួបម្តាយ ឪពុក ក្រោយពីបែកអស់រយៈពេលជាច្រើនឆ្នាំ គឺតាំងពីលោកមានអាយុ៨ឆ្នាំ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
