ផ្ទុះកំប៉ុងហ្គាស បង្កឲ្យឆាបឆេះ ៥បន្ទប់គ្មានសល់ (មានវីដេអូ)

ភ្នំពេញ៖ កាលពីវេលាម៉ោងប្រមាណជា ២និង៤៥នាទី នៅថ្ងៃទី២០ ខែឧសភានេះ មានករណីភ្លើងឆេះ បន្ទប់ជួលរបស់ពលរដ្ឋចំនួន ៥បន្ទប់គ្មានសល់ ស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

នៅក្នុងករណីផ្ទុះកំប៉ុងហ្គាសនេះ បានបង្កឲ្យភ្លើងឆាបឆេះ ពីបន្ទប់ទៅបន្ទប់មួយទៀតគ្មានសល់ ដែលបានកើតចេញពីផ្ទះរបស់លោក លាភ វាសនា អាយុ៤៥ឆ្នាំ ដែលមានមុខរបរស្តុកហ្គាស ទុកលក់បន្ត ទៅឲ្យអ្នកភូមិ មានស្រុកកំណើត នៅភូមិបឹងព្រះ ឃុំបឹងព្រះ ស្រុកបាភ្នំ ខេត្តព្រៃវែង ។

ហ្គាសដែលគាត់ស្តុកទុក សម្រាប់លក់បន្តនេះ មានប្រភេទហ្គាសកំប៉ុងតូចៗ និងហ្គាសធុង។ ការឆេះធ្វើឲ្យខូចខាតហ្គាសកំប៉ុងតូចចំនួន ១៥០កំប៉ុង និងហ្គាសប្រភេទធុង ដែលមានទំងន់១៥គីឡូប្រហែលជា ៣០ធុង។

នៅក្នុងនោះដែរគេសង្កេតឃើញមាន រថយន្តពន្លត់អគ្គីភ័យចំនួន ១០គ្រឿងបានមកពន្លត់ទាន់ពេលវេលា ដោយក្នុងនោះរថយន្តពន្លត់ភ្លើង របស់នគរបាលក្រុង មាន៧គ្រឿង។ ព្រមជាមួយនោះក៏មានកម្មករម្នាក់ បានដួលសន្លប់ហើយជួយទៅមន្ទីរ និងបានជួយសង្គ្រោះបានទាន់ពេលវេលា។

តាមការបំភ្លឺពីប្អូនប្រុសរបស់ឈ្មោះ លាភ វាសនា បានឲ្យដឹងថា ក្នុងពេលមានភ្លើងឆេះ នេះម្ចាស់ផ្ទះគឺមិនបានស្នាក់ក្នុងផ្ទះ ដោយជាប់រវល់ទៅធ្វើបុណ្យនៅតាមខេត្ត មូលហេតុដំបូងនាំឲ្យមានភ្លើងឆេះ ដោយសារការផ្ទុះសេខ្សែភ្លើង ហើយក៏បង្កឲ្យមានការឆេះ ជាបន្តបន្ទាប់តែម្តងទៅ ៕

ដោយ ៖ហេង សេងឡុង

ផ្តល់សិទ្ធដោយ ដើមអម្ពិល