ខេត្តកំពង់ចាម ៖ ប៉ូលិសសម្ងាត់ក្រសួងមហាផ្ទៃមួយក្រុមចេញប្រតិបត្តិការតាមចាប់ឃាតកម្នាក់ដែលអារ.កសម្លាប់បុគ្គលិកទស្សនាវដ្តី VIRTUS Group បានសម្រេចហើយកាលពីវេលាម៉ោង៤និង៣០នាទីរសៀលថ្ងៃទី២៣ មករា ២០១២ នៅចំណុចចម្ការកោះ ភូមិផ្ទះវាល ឃុំព្រែកដំបូក ស្រុកស្រីសន្ធរ បន្ទាប់ពីដឹងថា ឃាតកម្នាក់នេះលាក់ខ្លួននៅទីនោះយ៉ាងត្រជាក់ល្ហឹមរយៈពេលមួយសប្តាហ៍ ហើយកិច្ចប្រតិបត្តិការនេះបានចាប់ផ្តើមឡើងកាលពីវេលាម៉ោង២រសៀលថ្ងៃទី២៣ មករា ២០១២ មកម៉្លេះ។
តាមប្រភពព័ត៌មានបានឱ្យដឹងថា ជាការពិតណាស់បងប្រុសរបស់ជនរងគ្រោះបានទទួលដំណឹងថា ឃាតកលាក់ខ្លួននៅឃុំព្រែកដំបូក ហើយត្រូវគេប្រទះឃើញ... លុះពេលហៅបូ៉លិសទៅដល់ទីនោះ ស្រាប់តែឃាតកម្នាក់នោះគេចខ្លួនបាត់ហាក់ដូចជាមានអ្នកណាផ្តល់ដំណឹង... ហើយពេលនោះប៉ូលិសកំពុងតែតាមប្រមាញ់បន្ត ដោយដឹងថា ឃាតកមិនទាន់រត់ទៅណាឆ្ងាយទេ ។ សំណាញ់ច្បាប់ពិតជាស្វិតមែន ឃាតករត់ទៅណាមិនរួចក៏ធ្លាក់ចូលអន្ទាក់ប៉ូលិស ហើយត្រូវចាប់ខ្លួនរយៈពេលប៉ុន្មានម៉ោងក្រោយមក ។
ឃាតកម្នាក់នេះឈ្មោះជួន សំផាត អាយុ២៤ឆ្នាំ រស់នៅភូមិទ្រាស ឃុំខ្នារស ស្រុកស្រីសន្ធរ ត្រូវជាមិត្តភក្តិជនរងគ្រោះដែលខ្លួនអារ.កសម្លាប់ ។ ជួន សំផាត ដែលប្រព្រឹត្តអំពើឃោរឃៅម្នាក់នេះបានសារភាពថា ខ្លួនសម្លាប់មិត្តភក្តិ ព្រោះតែប្លន់យកម៉ូតូស៊េរីទំនើប ។
លោកវរសេនីយ៍ឯក ជឹម សេងហុង ស្នងការរងនគរបាលខេត្តបានឱ្យដឹងថា ការឈានទៅចាប់ឃាតកបានបែបនេះ គឺដោយសារមានកិច្ចសហការល្អរវាងប៉ូលិសក្រសួងមហាផ្ទៃជាមួយប៉ូលិសស្រុកស្រីសន្ធរ ហើយនេះក៏ជាការបង្ហាញពីការយកចិត្តទុកដាក់របស់សមត្ថកិច្ចផងដែរ គឺមិនទុកឱ្យជនដៃដល់ជនឧក្រិដ្ឋសោយសុខនោះទេ ។
គួររំលឹកថា សពយុវជនម្នាក់ត្រូវក្រុមអ្នករើសអេតចាយប្រទះឃើញនៅក្នុងប្រឡាយបង្ហូរទឹកក្បែរអតីតទីលានចាក់សំរាម ស្ទឹងមានជ័យ ស្ថិតក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ កាលពីព្រឹកថ្ងៃទី១៧ មករា ។ សពយុវជនរូបនេះត្រូវឃាតកដៃដល់អារ.កស្ទើរតែដាច់ទៅហើយ ។ តាមការសន្និដ្ឋានជំហានដំបូងថា ជនរងគ្រោះមិនមែនត្រូវគេសម្លាប់នៅកន្លែងនោះទេ តែជាការសម្លាប់នៅកន្លែងផ្សេង ហើយដឹកយកទៅប្លុងចោលនៅទីនោះ ។
ទោះបីជាបែបណាក្តី សពយុវជននោះត្រូវគេស្គាល់ឈ្មោះព្រាប សបា្តហ៍ អាយុ២៨ឆ្នាំ ជាបុគ្គលិកក្រុមហ៊ុនទស្សនាវដ្តី VIRTUS Group រស់នៅផ្ទះជួលក្នុងភូមិត្នោតជ្រុំ សង្កាត់បឹងទំពុន និងមានអាសយដ្ឋានពិតប្រាកដនៅភូមិតាងូវ សង្កាត់និរោធ ខណ្ឌមានជ័យ ។
តាមប្រភពព័ត៌មានមិនផ្លូវការមួយនិយាយថា គេបានឃើញរថយន្តប៉ាហ្សេរ៉ូបើកក្នុងល្បឿនលឿនចូលទៅចំណុចប្រទះឃើញសព ហើយប្រញាប់ប្រញាល់ចេញវិញនៅវេលាទៀបភ្លឺ ។ តាមការពិនិត្យជាក់ស្តែង សពត្រូវឃាតកអារ.កស្ទើរជិតដាច់ក្បាលចេញពីដងខ្លួន ។
អ្នកភូមិរស់នៅក្បែរតំបន់កើតហេតុ និយាយថា ក្នុងភូមិសាស្ត្រនោះមានសភាពស្ងប់ស្ងាត់ខ្លាំងណាស់ នៅពេលយប់ដោយសារដាច់ស្រយាលពីលំនៅឋាន ប្រជាពលរដ្ឋ ។ សពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី បន្ទាប់ពីការពិនិត្យរបស់សមត្ថកិច្ចរួចហើយ ។
លោកសេង សាញ់ ចៅសង្កាត់ស្ទឹងមានជ័យក៏បានទៅចូលរួមពិនិត្យសពជាមួយក្រុមសមត្ថកិច្ច និងជួយចាត់ចែងក្នុងការធ្វើកោសល្យវិច័យសាកសពដែរ ៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]