រាជធានីភ្នំពេញ ៖ អ្នករត់ម៉ូតូឌុបម្នាក់បានស្លាប់នៅពេលបញ្ជូនទៅកាន់មន្ទីរ ពេទ្យកាល់ម៉ែត បន្ទាប់ពីជួបគ្រោះថ្នាក់ចរាចរណ៍ប៉ះជាមួយអ្នកដំណើរតាមផ្លូវ ហើយដួលបោកទៅលើថ្នល់ក៏ត្រូវរថយន្តម៉ាកកាមរីឆ្លាម ពណ៌ស្ករ មួយគ្រឿងបើកមកដល់ជាន់ហ្វ្រាំងមិនទាន់កិនអូសជាប់ពីក្រោម រថយន្តប្រមាណជិត១គីឡូម៉ែត្រ ទើបរបូតហើយរថយន្តក៏បើករត់គេចចូលផ្ទះបាត់ ។
ទោះបីជាយ៉ាងណា រថយន្តដែលកិនមនុស្សអូសរត់តាមផ្លូវនោះត្រូវប៉ូលិសការិយាល័យ ចរាចរណ៍ផ្លូវគោកសហការជាមួយប៉ូលិសប៉ុស្តិ៍ទួលសង្កែដឹកនាំដោយ ព្រះរាជ្ញារង លោកមាស ច័ន្ទពិសិដ្ឋ ចុះទៅឆែកឆេរលំនៅឋាន និងដកហូតរថយន្តកាលពីព្រឹកថ្ងៃទី១៦ ឧសភា ។ គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង៨ និង៣០នាទីយប់ថ្ងៃទី១៥ ឧសភា នៅតាមផ្លូវជាតិលេខ៥ មុខផ្ទះលេខ១៦៥២ ក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។ ចំណែកជនរងគ្រោះពុំត្រូវគេស្គាល់អត្តសញ្ញាណឡើយ បន្ទាប់ពីបញ្ជូនទៅកាន់មន្ទីរពេទ្យបានតែប៉ុន្មានម៉ោងក៏ត្រូវ ស្លាប់បាត់បង់ជីវិត ។
តាមព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ អ្នករត់ម៉ូតូឌុបរូបនោះបានជិះម៉ូតូធុនសេ១០០សង់កូរ៉េ ពណ៌ក្រហម បើកតាមផ្លូវជាតិលេខ៥ ក្នុងទិសដៅពីត្បូងទៅជើង ។ ពេលធ្វើដំណើរមកដល់កន្លែងកើតហេតុ ក៏បានប៉ះជាមួយអ្នកដំណើរម្នាក់បណ្តាលឱ្យដួលម៉ូតូ ខណៈនោះក៏មានរថយន្តម៉ាកកាមរីឆ្លាម ពណ៌ស្ករ មួយគ្រឿងបើកមកពីត្បូងមកដល់ជាន់ហ្វ្រាំងមិនទាន់ក៏កិនលើ ជាប់ក្រោមរថយនុ្តអូសតាមដងផ្លូវតែម្តង ។
តាមព័ត៌មានបន្តថា នៅពេលបើកអូសប្រមាណជិត១គីឡូម៉ែត្រមកដល់កែងផ្លូវលេខ៦៨ផ្លូវ ចូលផ្សារទួលសង្កែទើបរបូត ហើយរថយន្តព្យាយាមបើកគេចចូលក្នុងផ្ទះលេខសេ២៦ ផ្លូវលេខ១៨ ក្រុមទី២ ភូមិទួលគោក សង្កាត់ទួលសង្កែ ខណ្ឌឫស្សីកែវ ដោយមានប្រជាពលរដ្ឋ និងសមត្ថកិច្ចតាមដល់ផ្ទះ ។ ជនរងគ្រោះស្ថិតក្នុងស្ថានភាពធ្ងន់ធ្ងរ ដោយរថយន្តអូសនឹងថ្នល់របួសធ្ងន់ធ្ងរ ភ្លាមៗត្រូវបានបញ្ជូនទៅកាន់មន្ទីរពេទ្យ ក្រោយមកក៏បានស្លាប់បាត់បង់ជីវិត ។ នៅព្រឹកថ្ងៃទី១៦ ឧសភា សមត្ថកិច្ចចម្រុះដឹកនាំដោយលោកព្រះរាជអាជ្ញារងមាស ច័ន្ទពិសិដ្ឋ ចុះទៅឆែកឆេរលំនៅឋាន ហើយដកហូតរថយន្តដែលកិនមនុស្សអូសយកទៅកាន់ការិយាល័យចរាចរណ៍ជើង គោក ។
ចំណែកអ្នកបើកបរត្រវម្ចាស់ផ្ទះឈ្មោះប៉ាវ បូរី ភេទស្រី អាយុ៣៧ឆ្នាំ ប្រាប់ថា បានរត់គេចខ្លួនបាត់ហើយ។ គេនិយាយថា ប្រសិនបើរថយន្តកិនជាប់ហើយឈប់ភ្លាមនោះអ្នករត់ម៉ូតូឌុបមិន ស្លាប់នោះទេ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
