ខេត្តស្ទឹងត្រែង ៖ មនុស្ស២នាក់ស្លាប់ និង១៦នាក់ទៀតរងរបួសធ្ងន់ និងស្រាល ដេកដួលរដូករណែលពេញផ្លូវ ខណៈជួបគ្រោះថ្នាក់ចរាចរណ៍កាលពីវេលាម៉ោង៣និង១៥នាទីរសៀលថ្ងៃទី ១៣ ឧសភា ស្ថិតនៅចំណុចឡូតិ៍លេខ២ ផ្លូវជាតិលេខ៧៨អា ថ្មី ក្នុងដែនដីខេត្តមណ្ឌលគិរី ។
លោកល្លត ម៉ារ៉ន នាយប៉ុស្តិ៍ឃុំក្បាលរមាស ឱ្យដឹងថា ក្នុងរថយន្តមានមនុស្សជិះចំនួន១៨នាក់ រួមទាំងអ្នកបើក ក្នុងនោះមានប្រុស៦នាក់ ស្រី៦នាក់ និងក្មេង៦នាក់។ ជនរងគ្រោះធ្វើដំណើរដោយរថយន្តម៉ាកស្តារិច បើកដោយឈ្មោះណយ ផល្លា ភេទប្រុស អាយុ៣២ឆ្នាំ ។ ពួកគាត់រស់នៅភូមិចំការឪឡឹក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។
លោកនាយប៉ុស្តិ៍បន្តថា ជនរងគ្រោះមានចំនួន១៨នាក់ ស្លាប់ចំនួន២នាក់ ឈ្មោះហេង រី ភេទស្រី អាយុ៥៣ឆ្នាំ និងឈ្មោះហំ ភិន ភេទស្រីអាយុ៧០ឆ្នាំ និង១៦នាក់ទៀតរងរបួសធ្ងន់ និងស្រាល បញ្ជូនទៅសង្គ្រោះនៅមន្ទីរពេទ្យខេត្តស្ទឹងត្រែង ។
លោកណយ ផល្លា អ្នកបើករថយន្តបានប្រាប់កោះសន្តិភាពថា រថយន្តរបស់លោកចេញដំណើរពីភ្នំពេញនាំក្រុមគ្រួសារទៅធ្វើ បុណ្យនៅខេត្តរតនគិរី ។ រថយន្តបែកកង់ក្រោយខាងស្តាំ ក៏បណ្តាលឱ្យគ្រវីចង្កូតរេទប់អត់ឈ្នះ ទើបបណ្តាលឱ្យក្រឡាប់ជាច្រើនត្រឡប់ និងបង្កឱ្យសមាជិកគ្រួសាររបស់លោកទទួលមរណភាព និងរបួសច្រើននាក់បែបនេះ ។
ស្ត្រីរងគ្រោះម្នាក់ទៀតនិយាយថា ពួកគាត់ធ្វើដំណើរទៅខេត្តរតនគិរី ដើម្បីចូលរួមធ្វើបុណ្យ និងចង់ស្គាល់ខេត្តរតនគិរីផង ។ ការធ្វើដំណើរទៅនេះ មានរថយន្តជាង២០គ្រឿងឯណោះ តែរថយន្តរបស់គាត់បើកក្រោយគេ ។ ក្រោយពេលរថយន្តក្រឡាប់ហើយនោះ អ្នកដែលមានរបួសស្រាលបានជួយយកអ្នករបួសធ្ងន់ចេញពីក្នុងរថយន្ត ពេលនោះឃើញស្ត្រីឈ្មោះហេង រី ស្លាប់បាត់ទៅហើយ ។ ចំណែកស្ត្រីឈ្មោះហំ ភិន នៅដឹងខ្លួននៅឡើយ តែដោយសារគាត់មានជំងឺខ្សោយបេះដូង និងជំងឺលើសឈាម ព្រមទាំងមានការតក់ស្លុតផងនោះ ក៏បានទទួលមរណភាព ក្រោយបន្តិចមក ។
ក្រោយពេលជួបគ្រោះអកុសលនេះអស់រយៈពេលជាងបី ម៉ោង ទើបសពស្ត្រីទាំង២នាក់ ត្រូវដឹកបញ្ជូនទៅធ្វើបុណ្យនៅរាជធានីភ្នំពេញវិញ ។ ចំណែកអ្នករងរបួសធ្ងន់ និងស្រាលបានវិលត្រឡប់ទៅភ្នំពេញវិញជាមួយគ្នាដែរ ។ រីឯរថយន្តម្ចាស់ប្រគល់ឱ្យសមត្ថកិច្ចស្ទូចយកទៅរក្សាទុកបណ្តោះ អាសន្នសិនរង់ចាំរៀបចំពិធីបុណ្យឱ្យក្រុមគ្រួសារចប់ទើបមក ទទួលយកទៅជួសជុល៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]