ខេត្តកំពត ៖ ចោរប្រុស-ស្រីមានគ្នាចំនួន៤នាក់ បានធ្វើសកម្មភាពបន្លំលួចយកមាសពីក្នុងទូ ដែលដាក់តាំងលក់នៅក្នុងផ្ទះអស់មាសជាគ្រឿងអលង្ការមាន ផ្លាកដៃ និងចិញ្ចៀនជាច្រើនតម្លឹង រួចគេចខ្លួនបាត់ដោយសុវត្ថិភាព ធ្វើឱ្យមានការភ្ញាក់ផ្អើលឆោឡោយ៉ាងខ្លាំងដល់ប្រជាពលរដ្ឋ និងសមត្ថកិច្ចនៅផ្សារក្រុងកំពត ។
ហេតុការណ៍នេះបានកើតឡើងនៅវេលាម៉ោង ៩និង៤៥នាទីព្រឹកថ្ងៃទី១១ ឧសភា នៅជួរផ្ទះល្វែងខាងលិចផ្សារក្រុងកំពតស្ថិតក្នុងភូមិ កំពង់បាយខាងជើង សង្កាត់កំពង់បាយ ក្រុងកំពត ។
យោងតាមស្ត្រីម្ចាស់ផ្ទះជាអាជីវករលក់ មាសឱ្យដឹងថា នៅមុនពេលកើតហេតុ គាត់បានឃើញស្ត្រី២នាក់ជិះម៉ូតូឌុបគ្នាមកឈប់នៅមុខ ផ្ទះ ហើយម្នាក់បានចុះពីលើម៉ូតូ រីឯម្នាក់ទៀតនៅ អង្គុយលើម៉ូតូរួចសុំដូរលុយពីររយដុល្លារ ។ ពេលឮភ្ញៀវប្រាប់ដូច្នេះគាត់ក៏រាប់លុយខ្មែរគ្រប់ ចំនួនទឹកប្រាក់២០០ដុល្លារ កាន់ដើរចេញពីទូមាសក្នុងផ្ទះមកឱ្យភ្ញៀវដែលអង្គុយនៅលើ ម៉ូតូ លុះពេលត្រឡប់ចូលផ្ទះវិញក្រឡេកមើលទៅក្នុងទូមាសទើបដឹងថា បាត់គ្រឿងអលង្ការផ្លាកដៃ ខ្សែដៃ និងចិញ្ចៀនអស់ជាច្រើនខ្សែ និងជាច្រើនវង់ តែពុំទាន់ដឹងពិតប្រាកដថាប៉ុន្មានតម្លឹងនោះទេ ។ ស្ត្រីអាជីវករនិយាយទៀតថា ខណៈពេលយកប្រាក់ប្រគល់ឱ្យស្ត្រីអង្គុយលើម៉ូតូនោះ គាត់ពុំបានចាប់អារម្មណ៍ពីចោរស្រីម្នាក់ដែលចូលធ្វើ សកម្មភាពទេ គឺឃើញក្រោយហេតុការណ៍កើតឡើងដោយយករូបភាពតាមកាមេរ៉ា មកពិនិត្យមើលទើបដឹងថា ពួកចោរបន្លំចូលខណៈពេលគាត់យកលុយមកឱ្យអ្នកអង្គុយលើ ម៉ូតូរួចគេចខ្លួនចេញបាត់មុនអ្នកជិះម៉ូតូចេញទៅទៀត គឺរហ័សដូចផ្លេកបន្ទោរ ។
ចំណែកប្រភពពីសាក្សីដែលលក់គ្រឿងទេសនៅ ជាប់គ្នាឱ្យដឹងថា ស្របពេលដែលស្ត្រីពីរនាក់ជិះម៉ូតូឌុបគ្នាមកឈប់ មុខផ្ទះលក់មាសនេះ គាត់ឃើញមានម៉ូតូមួយគ្រឿងទៀតមិនចាំម៉ាកឌុបគ្នាពីរនាក់ ដែរ តែប្រុសម្នាក់ ស្រីម្នាក់មកឈប់នៅមុខផ្ទះរបស់គាត់ ។ បុរស-ស្ត្រីពីរនាក់នេះបានចូលមកតថ្លៃទិញបាល់តែតថ្លៃមិន ត្រូវគ្នា ដោយអ្នកទាំងពីរនោះម្តងតប៉ុណ្ណេះ ម្តងតប៉ុណ្ណោះ ធ្វើឱ្យគាត់ជាអ្នកលក់មានការសង្ស័យជាខ្លាំង លុះមួយសន្ទុះក្រោយមកទើបឮអ្នកផ្ទះលក់មាសប្រាប់គាត់ថា «អស់រលីងហើយៗ» ។ ពេលនោះគាត់ក៏រត់មកផ្ទះកើតហេតុ លុះងាកមើលអ្នកតថ្លៃបាល់ទាំងពីរនាក់ក៏ឃើញជិះម៉ូតូចេញមក ទិសខាងត្បូងផ្សារបាត់ទៅដែរ ។
ហេតុការណ៍ខាងលើបើតាមសមត្ថកិច្ចក៏ដូចជា សាក្សីអាចសន្និដ្ឋានថា ក្រុមចោរដែលចូលបន្លំធ្វើសកម្មភាពលួចយកមាស អស់ជាច្រើនតម្លឹងនេះ ពុំមែនមានគ្នាតែពីរនាក់ទេ អាចមានគ្នា៤នាក់រួមគ្នាបន្លំដើម្បីធ្វើសកម្មភាព។ ក្រោយពីហេតុការណ៍កើតឡើង សមត្ថកិច្ចបានដាក់កម្លាំងស្រាវជ្រាវគ្រប់ច្រកល្ហកដើម្បី ពិនិត្យភិនភាគមនុស្សដែលកាមេរ៉ាចាប់បាន ងាយស្រួលក្នុងការតាមប្រមាញ់ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
