រាជធានីភ្នំពេញ ៖ ផលិតកម្ម M បានបង្កើតអស់រយៈពេលជាង៤ឆ្នាំមកហើយ ដោយផលិតកម្មនេះ ត្រូវបានគេទទួលស្គាល់ថា ល្អ ហើយថែមទាំងមានគោលជំហររឹងមាំទៀត ផងក្នុងការផលិតបទចម្រៀង និងដំណើរការអាជីវកម្មរបស់ខ្លួនខុសប្លែកពីផលិតកម្មមួយចំនួនដែលបានបង្កើតហើយក៏ឱ្យដួលរលំទៅវិញ ។
ទន្ទឹមនឹងនោះ ថ្មីៗនេះគេសង្កេតឃើញផលិតកម្មនេះ គឺមានតារាចម្រៀងល្បីៗជាច្រើននាក់ បានធ្វើដំណើរចាកចេញជាបន្តបន្ទាប់ ហើយច្រើនខុសប្លែកពីផលិតកម្មធំផ្សេងៗទៀត នៅក្នុងប្រទេសកម្ពុជា ។ ស្របពេលជាមួយគ្នានេះដែរស្រាប់តែមានប្រភពព័ត៌មានមួយចំនួនបាននិយាយថា ការចាកចេញពីផលិតកម្ម M របស់តារាចម្រៀងល្បីៗ ជាបន្តបន្ទាប់ដូច្នេះដោយសារតែមានទំនាស់ផ្ទៃក្នុងរវាងតារាចម្រៀង និងអ្នកគ្រប់គ្រង ជាពិសេសនោះ គេបានសង្កេតឃើញថា មួយរយៈមកនេះផលិតកម្ម M លើកតម្លើងតែកញ្ញាពេជ្រ សូលីកា និងលោកនីកូ ចំណែកឯតារាផ្សេងទៀតដូចជាលោកកូម៉ា លោកអាន វិសាល កញ្ញាសុខ ស៊ីឡាលី កញ្ញាតាក់ ម៉ា កញ្ញាអែននីតា និងតារាចម្រៀងផ្សេងៗទៀតបែរជាមិនសូវខ្វាយខ្វល់ដូចកាលពីមុននោះទេ ។
ទាក់ទិនទៅនឹងបញ្ហានេះអ្នកគ្រប់គ្រងនៅផលិតកម្ម M បានប្រាប់កោះសន្តិភាពឱ្យដឹងថា គ្រប់ផលិតកម្មទាំងអស់នៅក្នុងប្រទេសកម្ពុជា តែងតែមានតារាចម្រៀងចេញនឹងចូលវាគឺជារឿងធម្មតា មិនថាតែផលិតកម្ម M នោះទេ ហើយការចាកចេញរបស់តារាចម្រៀងនៅក្នុងផលិតកម្ម M នេះ គឺមានច្រើនករណីដូចជា ទី១ទាក់ទងទៅនឹងការផុតកុងត្រា ទី២ទាក់ទងនៅនឹងប្រាក់កម្រៃ ដោយមានតារាខ្លះទាមទារប្រាក់កម្រៃខ្ពស់ ប៉ុន្តែក្រុមហ៊ុនមិនបានផ្តល់ជូនទៅតាមសេចក្តីត្រូវការរបស់ពួកគេនោះទេ ដូច្នេះហើយពួកគេក៏ចាកចេញទៅរកផលិតកម្មផ្សេង ដែលទទួលបានប្រាក់កម្រៃខ្ពស់ជាងផលិតកម្មរបស់យើង ។
អ្នកគ្រប់គ្រងនៅផលិតកម្ម M បានបន្ថែមទៀតថា ជាធម្មតានៅក្នុងក្រុមហ៊ុននីមួយៗ តែងតែមានការខ្វែងគំនិតគ្នារវាងបុគ្គលម្នាក់ និងបុគ្គលម្នាក់នេះក៏ជាហេតុ ដែលធ្វើឱ្យតារាមួយចំនួនចាកចេញទៅដែរ ។ ដូច្នេះហើយពេលនេះយើងបានបង្កើតច្បាប់ថ្មីដើម្បីការពាររាល់បញ្ហាទាំងឡាយ ដែលកើតមានឡើងចំពោះតារាចម្រៀង និងក្រុមហ៊ុន ដើម្បីកុំឱ្យមានភាពរញ៉េរញៃដូចកាលពីមុនទៀត ។
ចំណែកឯបញ្ហាមួយទៀតដែលទាក់ទងទៅនឹងការលើកតម្កើនតារាថ្មីៗជាងតារាចាស់នោះ គឺជាធម្មតាយើងអាចនិយាយបានថា វាជាមុខរបររកស៊ី កាលណាមានសមាជិកថ្មីចូលមក យើងត្រូវឱ្យអ្នកគាំទ្រទទួលស្គាល់តារាថ្មីឱ្យបានច្រើន សិន ព្រោះតារាចាស់មានគេទទួលស្គាល់ច្រើនហើយ ដូច្នេះយើងត្រូវតែពង្រឹងតារាថ្មីឱ្យឈរនឹង ហើយមានភាពល្បីល្បាញដូចជាតារាចាស់ៗ ផងដែរ ។ យើងក៏មិនបានបោះបង់ចោលតារាចាស់ៗដែរហើយពេលនេះយើងកំពុងតែលើកស្ទួយពួកគាត់ (តារាចាស់ៗ) ឡើងវិញ ដើម្បីឱ្យក្រុមហ៊ុនដើរទៅមុខលូន និងស្មើភាពគ្នាចំពោះតារាចម្រៀងថ្មីនិងអាប់អោនជាងគឺមិនឱ្យអ្នកណាចាស់អ្នកណានោះទេ ។
គួរបញ្ជាក់ថា កន្លងមកថ្មីៗនេះផលិតកម្ម M មានតារាល្បីៗជាច្រើនបានចាកចេញជាបន្តបន្ទាប់ដូចជាកញ្ញាមាស សុខសោភា លោកកែវវាសនា លោកឆាយ វីរៈយុទ្ធ លោកអាង គុណកូឡា លោកណាំ ប៊ុណ្ណារ័ត្ន កញ្ញាអែន ជីឡា កញ្ញាលី អ៊ីវ៉ាធីណា និងលោកសូណូ ជាដើម ៕
ដកស្រង់ ពីគេហទំព័រ កោះសន្តិភាព
សូមមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
