ខេត្តកំពង់ធំ ៖ គ្រោះថ្នាក់ចរាចរណ៍មួយគួរឱ្យរន្ធត់ បណ្តាលឱ្យមនុស្សចំនួន១៦នាក់រងគ្រោះ ក្នុងនោះ១៤នាក់របួសស្រាល និង២នាក់របួសធ្ងន់ ឯអ្នកស្លាប់នៅនឹងកន្លែងមាន៥នាក់ តែពេលបញ្ជូនមកកាន់មន្ទីរពេទ្យខេត្តកំពង់ធំ ត្រូវស្លាប់ម្នាក់ទៀត សរុបអ្នកស្លាប់មានចំនួន៦នាក់ ។
តាមប្រភពព័ត៌មានពីលោកហ៊ុន ហ៊ាត អធិការរងនគរបាលស្រុកស្ទោង ទទួលបន្ទុកផ្នែកចរាចរណ៍បានឱ្យដឹងថា គ្រោះថ្នាក់ដ៏គួរឱ្យរន្ធត់ នេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី៨ ឧសភា នៅលើផ្លូវជាតិលេខ៦ ស្ថិតក្នុងភូមិត្រាច ឃុំកំពង់ចិនជើង ស្រុកស្ទោង ដែលបង្កឡើងដោយរថយន្តមួយគ្រឿង ម៉ាកសាំយ៉ុង ពណ៌ស បើកបរដោយឈ្មោះណៃ ហុន ភេទប្រុស អាយុ៣៥ឆ្នាំ រស់នៅភូមិផ្សារក្រោលគោ ឃុំក្រោលគោ ស្រុកស្វាយជ្រំ ខេត្តស្វាយរៀង ។ ក្រោយពេលកើតហេតុ អ្នកបើកបររថយន្តបានរត់គេចខ្លួនបាត់ស្រមោល បន្សល់ទុកអ្នករងគ្រោះដេករដូករណែលលើទ្រូងថ្នល់ និងចិញ្ចើមថ្នល់ ដែលមានមនុស្សស្លាប់នៅនឹងកន្លែង៥នាក់ របួសធ្ងន់២នាក់ និងស្រាល១៤នាក់ ។
លោកហ៊ុន ហ៊ាត បានឱ្យដឹងថា បើតាមអ្នករបួសស្រាលនិយាយថា ពួកគេទាំងអស់គ្នាបានជួលរថយន្តខាងលើធ្វើដំណើរចេញពី ខេត្តស្វាយរៀងទៅកាន់ខេត្តសៀមរាប ក្នុងបំណងទៅការបងប្អូន ដោយក្រោកពីយប់ចេញដំណើរមក ។ លុះមកដល់ចំណុចខាងលើ រថយន្តបានផ្ទុះកង់ក្រោយផ្នែកខាងស្តាំអូសកង់ប្រមាណ ២០ម៉ែត្រ ហើយដោយសារអ្នកបើកបរមានស្មារតីមិននឹងន៎ ទើបបណ្តាលឱ្យរថយន្តក្រឡាប់។ ក្រោយពេលកើតហេតុ កម្លាំងសមត្ថកិច្ចប៉ូលិសដឹកនាំដោយរូបលោកផ្ទាល់បានជួយ សង្គ្រោះអ្នករងរបួសធ្ងន់-ស្រាលចំនួន១៦នាក់ ដឹកទៅកាន់មន្ទីរពេទ្យបង្អែកស្រុកស្ទោង ឯចំពោះអ្នកស្លាប់ដឹកយកមកតម្កល់ទុកនៅវត្តព្រះនាង ស្ថិតក្នុងភូមិកំពង់ក្តី ឃុំកំពង់ចិនត្បូង ស្រុកស្ទោង ។
អ្នកស្លាប់នៅនឹងកន្លែងមាន ១- ឈ្មោះ ងួន ឡូត ភេទស្រី អាយុ៧៣ឆ្នាំ រស់នៅភូមិខួច ឃុំក្រោលគោ ស្រុកស្វាយជ្រំ ខេត្តស្វាយរៀង ២- ឈ្មោះសូ រ៉ែម ភេទស្រី អាយុ៥៩ឆ្នាំ រស់នៅភូមិបន្លាស្អិត ឃុំក្រោលគោ ស្រុកស្វាយជ្រំ ៣- ឈ្មោះទុំ រឿន ភេទស្រី អាយុ៤៣ឆ្នាំ រស់នៅភូមិបន្លាស្អិត ឃុំក្រោលគោ ៤- ឈ្មោះសូ យាន ភេទស្រី អាយុ៤៣ឆ្នាំ រស់នៅភូមិបន្លាស្អិត ឃុំក្រោលគោ ៥- ឈ្មោះ វ៉ាន់ ភី ភេទប្រុស អាយុ៤៥ឆ្នាំ រស់នៅភូមិប្រស់ស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង ។ ចំណែកអ្នករងរបួសធ្ងន់និងស្រាលដែលបញ្ជូនទៅកាន់មន្ទីរ ពេទ្យបង្អែកស្រុកចំនួន១៦នាក់រួមមាន ១- ឈ្មោះឡាំ ស្រី ភេទស្រី អាយុ៤០ឆ្នាំ ២- ឈ្មោះកែន លន ភេទប្រុស អាយុ៥០ឆ្នាំ ៣- ប៉ែន ភាព ភេទស្រី អាយុ៤៨ឆ្នាំ ៤- ឈ្មោះសាន ជីម ភេទប្រុស អាយុ២៤ឆ្នាំ ៥- ឈ្មោះពៅ ពិន ភេទប្រុស អាយុ៦១ឆ្នាំ ៦- ឈ្មោះសែន ចាន់ធី ភេទស្រី អាយុ៤៥ឆ្នាំ ៧- ឈ្មោះកែន ធន់ ភេទស្រី អាយុ៥៥ឆ្នាំ ៨- ឈ្មោះសូ រ៉ន ភេទស្រី អាយុ៤៤ឆ្នាំ ៩- ឈ្មោះហុន សារុន ភេទប្រុស អាយុ៤១ឆ្នាំ ១០- ឈ្មោះសូ យ៉ែប ភេទស្រី អាយុ៧៥ឆ្នាំ ១១- ព្រះសង្ឃនាមអ៊ុត ចាយ ព្រះជន្ម១៩ឆ្នាំ ១២ - ឈ្មោះតុលា ភេទស្រី អាយុ៥៥ឆ្នាំ អ្នកទាំង១២នាក់នេះរស់នៅភូមិបន្លាស្អិត ឃុំក្រោលគោ ស្រុកស្វាយជ្រំ ខេត្តស្វាយរៀង ១៣- ឈ្មោះកុយ សាន ភេទស្រី អាយុ៥៥ឆ្នាំ នៅភូមិប្ញស្សីទទឹង ឃុំក្រោលគោ ស្រុកស្វាយជ្រំ ខេត្តស្វាយរៀង ១៤- ឈ្មោះប៉ុក យ៉ាន ភេទស្រី អាយុ៦៣ឆ្នាំ នៅភូមិប្រស់ស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង ១៥- ឈ្មោះកុយ ភិត ភេទប្រុស អាយុ៦៤ឆ្នាំ នៅភូមិប្ញស្សីទទឹង ឃុំក្រោលគោ ស្រុកស្វាយជ្រំ ខេត្តស្វាយរៀង និង១៦- ឈ្មោះខែម វ៉ាត់ ភេទប្រុស អាយុ២៩ឆ្នាំ នៅភូមិប្ញស្សីទទឹង ជាមួយឈ្មោះកុយ ភិត ។
លោកហុល ឈឿន អនុប្រធានមន្ទីរពេទ្យបង្អែកស្រុកស្ទោង បានឱ្យដឹងថា ចំពោះអ្នករងរបួសទាំង១៦នាក់ ដែលបានបញ្ជូនមកនេះរូបលោកនិងសហការីបានខិតខំយកចិត្តទុក ដាក់អស់ពីកម្លាំងកាយចិត្តជួយសង្គ្រោះ ក្នុងនោះមានអ្នករបួសធ្ងន់២នាក់ លោកបានបញ្ជូនទៅកាន់មន្ទីរពេទ្យខេត្តកំពង់ធំ ប៉ុន្តែដោយសាររបួសធ្ងន់ធ្ងរពេក ម្នាក់ទៀតក៏ត្រូវស្លាប់ពេលបញ្ជូនទៅ ដល់មន្ទីរពេទ្យខេត្ត សរុបអ្នកស្លាប់មានចំនួន៦នាក់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]