ខេត្តពោធិ៍សាត់ ៖ រថយន្តធុនធំមួយគ្រឿងបើកទៅបុករថយន្តធុនធំមួយគ្រឿងទៀត ដែលចតស្ងៀម បណ្តាលឱ្យដាច់ត្រឹមកាប៊ីន ឯរថយន្តចតស្ងៀមធ្លាក់ពីលើចិញ្ចើមថ្នល់ ។ គ្រោះថ្នាក់ចរាចរណ៍នេះកើតឡើងលើផ្លូវជាតិលេខ៥ក្នុង ភូមិអូរធំ ឃុំអន្សារចំបក់ ស្រុកក្រគរ កាលពីវេលាម៉ោង១១និង៣០នាទី ថ្ងៃទី៦ ឧសភា ២០១២ បណ្តាលឱ្យអ្នកបើកបរម្នាក់របួសធ្ងន់ និងរថយន្តទាំងពីរគ្រឿងខូចខាតស្ទើរទាំងស្រុង។
ប៉ូលិសប៉ុស្តិ៍អន្សារចំបក់ឱ្យដឹងថា រថយន្តទាំងពីរគ្រឿងនោះ មួយគ្រឿងម៉ាកអុីស៊ុយហ៊្សុយ ដឹកអីវ៉ាន់ពេញ បែកកង់ចតលើចិញ្ចើមថ្នល់បែរមុខទៅទិសខាងលិច និង១គ្រឿងទៀតម៉ាកហ៊្វុយហ្សូ សណ្តោងកុងតឺន័រធ្វើដំណើរពីភ្នំពេញទៅបន្ទាយមានជ័យ ។ ពេលទៅដល់ចំណុចកើតហេតុហ៊្វុយហ្សូ បានបុករថយន្តអុីស៊ុយហ៊្សុយ ដែលចតស្ងៀមពីចំហៀង បណ្តាលឱ្យដាច់ត្រឹមកាប៊ីនខ្លួនឯង រីឯរថយន្ត ដែលត្រូវគេបុកនោះធ្លាក់ទៅខាងជើងផ្លូវខូចខាតយ៉ាងដំណំ ។
គ្រោះថ្នាក់ចរាចរណ៍នេះ បណ្តាលឱ្យអ្នកបើករថយន្តហ៊្វុយហ្សូ រងរបួសធ្ងន់ ដោយពុំមានអ្នកណាស្គាល់ឈ្មោះទេ ហើយបានឡើងជិះរថយន្តផ្សេងទៅព្យាបាលនៅភ្នំពេញបាត់ ។ ចំណែកអ្នកបើករថយន្ត អ៊ីស៊ុយហ៊្សុយ ដែលបែកកង់ចតលើចិញ្ចើមថ្នល់ត្រូវគេបុកនោះពុំមានអ្នកណា ស្គាល់ទេ ព្រោះក្រោយកើតហេតុគេចខ្លួនបាត់ ។
ពុំមានអ្នកណាដឹងពីមូលហេតុនៃគ្រោះថ្នាក់ ចរាចរណ៍នេះទេ ប៉ុន្តែរថយន្តចតស្ងៀមបានដាក់រនាំងមុខក្រោយចម្ងាយពីរថយន្ត ប្រហែល១០០ម៉ែត្រ ដើម្បីជាសញ្ញា ។ ប៉ូលិសបានសន្និដ្ឋានថា គ្រោះថ្នាក់ចរាចរណ៍នេះ អាចបណ្តាលមកពីអ្នកបើករថយន្ត ហ៊្វុយហ្សូ ងងុយដេក ឬក៏ស្រវឹងស្រា បើកលឿនហួសកំណត់ ឬក៏ចាំងភ្លើងហ្វារថយន្តមកពីមុខមើលមិនឃើញផ្លូវ ។រថយន្តទាំងពីរគ្រឿង ត្រូវសមត្ថកិច្ចនាំទៅរក្សាទុកនៅអធិការដ្ឋាននគរបាលស្រុក ក្រគរ ដើម្បីរង់ចាំម្ចាស់ទៅដោះស្រាយតាមផ្លូវច្បាប់ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]