ក្មេងស្ទាវជិត៣០នាក់ វាយកាប់ចាក់ ពេញស្ថានីយ៍សាំង

ភ្នំពេញៈ តាមសេចក្តី រាយការណ៍ ពីខណ្ឌដូនពេញ បានឲ្យដឹងថា នៅរសៀលម៉ោង ៤និង៣០នាទី ថ្ងៃទី៣ ខែឧសភា ឆ្នាំ២០១២នេះ ក្រុមក្មេងស្ទាវពីរក្រុម មានគ្នាជិត៣០នាក់ បានបង្កទំនាស់ឈ្លោះ ប្រកែកវាយកាប់ចាក់គ្នា ពេលស្ថានីយ៍សាំង កាល់តិច ជិតស្តុបពេទ្យចិន ផ្លូវមុនីវង្ស ក្នុងសង្កាត់ចតុមុខ ។

សេចក្តីរាយការណ៍ក៏បានឲ្យដឹងថា ក្រុមក្មេងស្ទាវទាំងនោះ បានវាយប្រតាយ ប្រតបគ្នា ដោយប្រើដប និងដាវសាមូរៃ ហើយទីបំផុតក៏ឈាន ដល់ផ្ទុះអាវុធមួយគ្រាប់ បន្ទាប់មកក្រុមក្មេងស្ទាវ ទាំងអស់នោះ ក៏នាំគ្នាត្រឡប់ចេញ ទៅវិញអស់ ដោយខ្លាចកម្លាំងសមត្ថកិច្ច បន្ទាប់ពីមានការផ្ទុះអាវុធ ។

សាក្សីនៅកន្លែងកើតហេតុបានឲ្យដឹងថា បន្ទាប់ពីឮស្នូរកាំភ្លើង កម្លាំងកងរាជអាវុធហត្ថ ខណ្ឌដូនពេញ ក៏បាននាំគ្នា ទៅដល់កន្លែងកើតហេតុ តែយឺតពេលបន្តិច ក៏ព្រោះតែក្រុមក្មេងស្ទាវ ទាំងអស់នោះ នាំគ្នាចាកចេញអស់ ហើយសមត្ថកិច្ច ក៏បានធ្វើការពិនិត្យ និងសាកសួរសាក្សី នៅកន្លែងកើតហេតុ ជុំវិញករណីនេះ ៕

ដោយ៖ គឹម ចន្ថា

ផ្តល់សិទ្ធដោយ ដើមអម្ពិល