ប្អូនរាំ​​ជាន់ជើង​គ្នាបង្ក​​​ជាជម្លោះ​ បង​ទៅ​​ឃាត់​ត្រូវ​គេកាប់​របួស​ ដេរ​ជាង​១០​ថ្នេរ​

រាជធានីភ្នំពេញ ៖ យុវជនម្នាក់ត្រូវជនដៃដល់កាប់២កាំបិត បែកក្បាលហូរឈាមស្រោចពេញផ្ទៃ មុខរងរបួសធ្ងន់ ខណៈពេលទៅចូលរួមពិធីបង្កក់កូននៅជិតផ្ទះ ស្ថិតក្នុងភូមិបាយាប សង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង ១២និង ១២នាទីយប់រំលងអធ្រាត្រឈានចូលថ្ងៃទី២៧ តុលា ២០១៣ ។

ជនរងរបួសឈ្មោះរ៉ាត់ ភេទប្រុស អាយុ២៣ឆ្នាំ មុខរបរកម្មកររោងចក្រ ស្នាក់នៅភូមិបាយាប សង្កាត់ភ្នំពេញថ្មី ខណ្ឌសែនសុខ បានឱ្យដឹងថា មុនពេលកើតហេតុនៅជិតផ្ទះរបស់គេមាន ពិធីបង្កក់កូនជប់លៀងផឹកស៊ី រាំធុងបាស់ ។ ចំណែករូបគាត់មិនបានចូលរាំទេ នៅអង្គុយផឹក រីឯប្អូនៗរបស់គេមួយក្រុមមានគ្នា១០នាក់ បានចូលទៅរាំធុងបាស់ ហើយត្រូវយុវជនមួយក្រុមទៀត មានគ្នា១៥នាក់បានរាំជាន់ជើងគ្នាបង្កជា ការឈ្លោះប្រកែកគ្នានៅក្នុងវង់រាំនោះ ។ ពេលឮប្រកែកគ្នាបែបនេះ រូបគេជាបងបានចូលទៅជួយគ្នាត្រូវជនដៃដល់នាំគ្នាកាប់ ២កាំបិតបែកក្បាលហូរឈាមស្រោចពេញផ្ទៃមុខ និងទាត់ធាក់ជាំពេញខ្លួន ហើយជនដៃដល់នាំគ្នារត់គេចខ្លួនអស់។ ដោយឡែកក្រុមប្អូនៗរបស់គេឃើញជនដៃដល់ វាយទាត់ធាក់បងបែបនេះ ក៏នាំគ្នារត់ទៅអស់ដែរ ។

ក្រោយពេលកើតហេតុ ជនរងគ្រោះខំប្រឹងស្រវេស្រវាដើរទៅគោះទ្វារផ្ទះដែល នៅជិតនោះហៅសាច់ញាតិដឹកយក ទៅព្យាបាលនៅមន្ទីរពេទ្យព្រះកុសុមៈ ហើយគ្រូពេទ្យបានដេរជាង១០ថ្នេរ ៕