ខេត្តប៉ៃលិន ៖ ប្តី-ប្រពន្ធដែលរកស៊ីជួញដូរផ្លែឈើពីផ្សារថៃដឹកតាមម៉ូតូដើរ លក់ដូរនៅទឹកដីខ្មែរ លុះត្រឡប់មកវិញជិតដល់គោលដៅទៅហើយដល់ផ្លូវចុះចំណោត ម៉ូតូក៏ផ្ទុះកង់ក្រោយបណ្តាលឱ្យរេចង្កូតទប់មិនជាប់ដួលបោក ខ្លួនទៅលើថ្នល់រងរបួសធ្ងន់។ ប្តីដួលបោកខ្លួនទៅខាងស្តាំដៃបុកក្បាលនឹងចិញ្ចើមថ្នល់ដាច់ខ្សែ មួកការពារខ្ទាតចេញពីខ្លួនធ្វើឱ្យក្បាលទង្គិចនឹងដុំថ្ម បណ្តាលឱ្យបែកសៀតផ្កាផ្នែកខាងស្តាំរយះស្មា របួសដៃនិងជង្គង់ទាំងសងខាងសន្លប់បាត់ស្មារតីនៅនឹងកន្លែង ចំណែកប្រពន្ធដែលជិះពីក្រោយធ្លាក់ផ្កាប់មុខទៅលើថ្នល់រងរបួស បែកមាត់ បាក់ធ្មេញស្ទើរតែទាំងអស់ សន្លប់បាត់ស្មារតីដូចគ្នា។
ជនរងគ្រោះត្រូវអ្នករកស៊ីដឹកផ្លែឈើើលក់ ដូចគ្នាឃើញ ក៏ទូរស័ព្ទទៅប្រាប់ក្មួយប្រុសឈ្មោះឈុន ឆៃលី អាយុ១៥ឆ្នាំ យកម៉ូតូទៅដឹកយកទៅសម្រាកព្យាបាលនៅមន្ទីរពេទ្យបង្អែកខេត្ត ។ ជនរងគ្រោះជាប្តីឈ្មោះលៀម ហាក់ អាយុ៤៣ឆ្នាំ ចំណែកស្ត្រីជាប្រពន្ធឈ្មោះហ៊ុយ សាន អាយុ៣១ឆ្នាំ ជាអាជីវករ រស់នៅភូមិអូរតាប្រាង្គ សង្កាត់ប៉ៃលិន ក្រុងប៉ៃលិន។ ហេតុការណ៍នេះកើតឡើងកាលពីវេលាម៉ោង៧និង៣០នាទីព្រឹកថ្ងៃទី២៣ មេសា នៅលើផ្លូវជាតិលេខ៥៩ ស្ថិតនៅភូមិប៉ាងរលឹម សង្កាត់ប៉ៃលិន ក្រុងប៉ៃលិន ។
ស្ត្រីជាប្រពន្ធឱ្យដឹងថា ជារៀងរាល់ថ្ងៃពួកគេតែងតែងើបពីព្រលឹមនាំគ្នាចេញពីផ្ទះទៅទិញ ផ្លែឈើដូចជា ទុរេន មង្ឃុត សាវម៉ាវ អង្កាំ មៀន និងផ្លែឈើផ្សេងៗមួយចំនួនទៀតមកបោះឱ្យម៉ូយនៅតាមតូបលក់នៅក្នុង ផ្សារប៉ាងរលឹមដោយទិញផ្លែឈើទាំងអស់មិនតិចជាង១០០គីឡូក្រាមទេ ។ នៅថ្ងៃកើតហេតុពួកគេទាំងពីរនាក់ទិញផ្លែឈើចំនួន២កញ្ឆេ រួចយកមកចងកៀបដាក់សងខាងម៉ូតូផ្នែកខាងក្រោយ ដោយគាត់ជិះចំកណ្តាលដើម្បីទប់កុំឱ្យផ្លែឈើធ្លាក់ ។ ពេលជិះម៉ូតូចេញមកវិញដល់ចំណុចផ្លូវចុះចំណោតខ្លាំង ក្នុងល្បឿនលឿនក៏ផ្ទុះកង់ក្រោយ ។
ខណៈនោះប្តីគាត់បន្ថយល្បឿនឈប់ តែមិនអាចឈប់បានទេ ព្រោះម៉ូតូដឹកផ្លែឈើធ្ងន់ ក៏រេចង្កូតបណ្តាលឱ្យដួល។ ពេលម៉ូតូបែកកង់មានរថយន្តមួយគ្រឿងបើកមកពីក្រោយ មានចម្ងាយពីគ្នាប្រហែលជា៥០ម៉ែត្រ តែរថយន្តនោះមិនហ៊ានវ៉ាទៅមុខទេ ព្រោះខ្លាចម៉ូតូរេចង្កូតប៉ះក៏បើកយឺតៗនៅពីក្រោយ ។ប្រភពដដែលបន្តទៀតថា អ្នកបើករថយន្ត និងអ្នកជិះបានជួយរឹតពួកគេទាំងពីរនាក់ ហើយទើបបន្តដំណើរទៅមុខទៀត ៕
ដោយ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]