ខួបកំណើត២៩ឆ្នាំ Selena Gomez រៀបចំខ្នាតតូចជាមួយមិត្តភក្ដិពីរបីនាក់ ក៏មើលទៅសប្បាយ

បរទេស៖ កាលពីថ្ងៃទី ២២ ខែកក្កដា កន្លងទៅ តារាចម្រៀងប៉ុបអាមេរិក Selena Gomez បានរៀបចំពិធីជប់លៀងញ៉ាំសាច់អាំង និងជប់លៀងក្នុងអាងហែលទឹកនៅផ្ទះរបស់នាង យ៉ាងសប្បាយរីករាយជាមួយនឹងមិត្តភក្ដិពីរបីនាក់ ដើម្បីអបអរថ្ងៃខួបកំណើតគម្រប់ អាយុ ២៩ឆ្នាំរបស់នាង។ 

ដោយក្នុងពិធីនោះ យើងឃើញថា តារាស្រីរូបនេះ បានរៀបចំជាលក្ខណៈសាមញ្ញៗតូចតាចធម្មតាប៉ុណ្ណោះ ដោយមានត្រឹមការតុបតែងប៉េងប៉ោងដែលមានពាក្យថារីករាយថ្ងៃកំណើត និងប៉េងប៉ោងជាច្រើនទៀត មើលទៅពិតជាមិនសូវធំដុំអ្វីប៉ុន្មាននោះឡើយ ប៉ុន្តែ Selena ក៏ទទួលបានភាពសប្បាយរីករាយខ្លាំង ព្រមនឹងពាក្យជូនពរពីមិត្តភក្ដិ និងបណ្ដាហ្វេនៗជាច្រើនយ៉ាងកក់ក្ដៅតែម្ដង។

ជាពិសេស បើយោងតាមប្រភពបរទេសបានឲ្យដឹងថា ឆ្លៀតឪកាសដដែលនោះ Selena ក៏បានអំពាវនាវឲ្យមហាជន ក៏ដូចជាហ្វេនៗជួយបរិច្ចាគទៅមូលនិធិនានា ដើម្បីជួយដល់ស្ថានភាពលំបាកក្នុងកំឡុងពេលជំងឺរាតត្បាត Covid-19 ថែមទៀតផងដែរ៕

ប្រភព៖ Zing news