អង់គ្លេស៖ ខ្សែបម្រើ Donny van de Beek ពិតជាចង់ចាកចេញពីក្លិបបិសាចក្រហម Manchester United ណាស់ ដោយគេចង់ផ្ទេរទៅលេងនៅ Barcelona នេះបើយោងតាមការរាយការណ៍ពីប្រភពនៅប្រទេសអេស្ប៉ាញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសារព័ត៌មាន Sport បានបង្ហើបថាភ្នាក់ងារតំណាងរបស់កីឡាកររូបនេះបានធ្វើការទាក់ទងទៅក្លិប Barcelona ដើម្បីសួរនាំថាអាចឲ្យ de Beek ទៅលេងនៅទឹកដី Camp Nou នៅរដូវកាលក្រោយ បានដែរឬទេ ដោយសារគេមិនសប្បាយចិត្តក្នុងការស្នាក់នៅទឹកដី Old Trafford។
Donny van de Beek ផ្ទេរពីក្លិប Ajax មក Manchester United នៅរដូវកាលមុនក្នុងតម្លៃខ្លួន៤០លានផោន(ស្មើនឹងប្រមាណ៥៦.៤លានដុល្លារ) ប៉ុន្តែបានជាប់ជម្រើស១១នាក់ដំបូងក្នុងការប្រកួតក្របខណ្ឌ Premier League តែ៤ប្រកួតគត់ ខណៈដែល លោកគ្រូ Ole Gunnar Solskjaer ចូលចិត្តដាក់ខ្សែបម្រើ Bruno Fernandes, Paul Pogba, Scott McTominay, Fred និង Nemanja Matic នៅក្នុងតំបន់បម្រើ។
de Beek ដឹងថាអនាគតរបស់គេជាមួយបិសាចក្រហមអាចមិនសូវភ្លឺស្វាងទើបចង់ផ្ទេរទៅលេងនៅ Barcelona បើទោះបីជាក្នុងលក្ខខណ្ឌខ្ចីជើងក៏ដោយស្របពេលក្លិបយក្សនៅតំបន់កាតាឡាន់មួយនេះក៏ត្រូវបានគេរាយការណ៍ថាចង់ទិញយកខ្សែបម្រើមកបន្ថែមបន្ទាប់ពីបរាជ័យក្នុងការនាំយក Georginio Wijnaldum ផងដែរ៕
ប្រភព៖ dailymail