ខេត្តស្ទឹងត្រែង ៖ រថយន្តឡិចស៊ីស RX300 ពណ៌ស្ករ មួយគ្រឿងបានបោះពួយពីត្បូងទៅជើងក្នុងល្បឿនលឿន រួចបត់ទៅលិចបំណងចូលក្រុងស្ទឹងត្រែង តែដោយសារអ្នកបើកបរទាញចង្កូតមិនទាន់ ក៏ជ្រុលរអិលធ្លាក់ពីលើផ្លូវជាតិក្រឡាប់ជាច្រើនត្រឡប់ តែសំណាងល្អ មិនធ្វើឱ្យអ្នកនៅក្នុងរថយន្តរងរបួសទេ។ហេតុការណ៍នេះបានកើតឡើងកាលពី វេលាម៉ោង១១ និង៣០នាទីថ្ងៃត្រង់ ថ្ងៃទី១១ មេសា ២០១២ នៅចំណុចផ្លូវបំបែកចូលក្រុងស្ទឹងត្រែង ស្ថិតនៅភូមិលើ សង្កាត់ស្រះឫស្សី ក្រុងស្ទឹងត្រែង។
នគរបាលចរាចរបានឱ្យដឹងថា រថយន្តដែលក្រឡាប់ម៉ាកឡិចស៊ីស RX300 ពណ៌ស្ករ ជារបស់ឈ្មោះសាន ភេទប្រុស អាយុជាង៣០ឆ្នាំ ជាជាងទង រស់នៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ជិះក្នុងរថយន្ត និងម្នាក់ទៀត ឈ្មោះនួស សុភួន ភេទប្រុស អាយុ២៣ឆ្នាំ ជាកូនជាងទងរស់នៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ជាអ្នកបើករថយន្តអ្នកទាំង២មិនមានរបួសអ្វីធ្ងន់ធ្ងរទេ គ្រាន់តែរលាត់ដៃបន្តិចបន្តួច ។ ក្រោយពីកើតហេតុម្ចាស់រថយន្តបានសុំនគរបាលចរាចរស្ទូចរថយន្តដឹកទៅ ធ្វើការជុសជុល។
តាមការឱ្យដឹងពីម្ចាស់រថយន្តឈ្មោះសាន ថា មុនកើតហេតុពួកគាត់ទាំង២នាក់បានដឹកក្មួយទៅខេត្តក្រចេះ ហើយក៏ត្រឡប់មកវិញ ដោយកូនជាងរបស់គាត់ជាអ្នកបើកបរជំនួសដោយសារគាត់អស់កម្លាំងពេក ។ លុះដល់កន្លែងកើតហេតុមិនដឹងមូលហេតុអ្វីបានជាអ្នកបើកបរច្រឡំជើងថា ជាន់ហ្វ្រាំង បែរជាជាន់ហ្គែរធ្វើឱ្យរថយន្តរបស់គាត់យកចង្កូតមិនអស់ជ្រុលធ្លាក់ពី លើផ្លូវជាតិក្រឡាប់ជាច្រើនត្រឡប់រងការខូចខាតស្ទើរតែទាំងស្រុងតែម្តង ៕
ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
