ខេត្តបន្ទាយមានជ័យ ៖ នារីវ័យក្មេងម្នាក់ទើបអាយុ១៦ឆ្នាំ ដែលបានលង់ខ្លួនជាមួយបុរសម្នាក់នៅផ្ទះសំណាក់១យប់ និងបាត់ខ្លួនបន្តជាច្រើនថ្ងៃពេលនេះបានត្រឡប់ទៅផ្ទះវិញហើយ ។ មន្ត្រីនគរបាលស្រុកថ្មពួកបានឲ្យដឹងថា យុវតីរូបនោះត្រូវម្តាយឪពុករកឃើញនៅស្រុកព្រះនេត្រព្រះកាលពីថ្ងៃទី៦ មេសាកន្លងមកនេះ។
មន្ត្រីនគរបាលស្រុកបានឲ្យដឹងថា តាមសម្តីរៀបរាប់របស់នាងរងគ្រោះបានប្រាប់សមត្ថកិច្ចថា រូបនាងនិងឈ្មោះប្រាក់ ប៊ុនយ៉ត អាយុ ២៨ឆ្នាំ នៅភូមិបន្ទាយឆ្មារខាងត្បូង បានស្គាល់គ្នា ខណៈពេលបុរសកំហូចរូបនោះធ្វើជាចៅមហានៅក្នុងពិធីមង្គលការបងស្រីជីដូនមួយរបស់នាង កាលពីថ្ងៃទី២៧ មីនា នៅភូមិអ្នកតា ឃុំថ្មពួក ស្រុកថ្មពួក ។ ពេលនោះនាងនិងប្រុសព្រានរូបនោះបានឲ្យលេខទូរស័ព្ទគ្នាទៅវិញទៅមក ជាការរាប់អានគ្នាធម្មតាប៉ុណ្ណោះ ។
តាមការរៀបរាប់បានបន្តថា នៅព្រឹកថ្ងៃទី២ មេសា ចៅមហាវ័យក្មេងឈ្មោះយ៉ត បានទូរស័ព្ទមករកនាង ហើយបបួលនាងជិះម៉ូតូដើរលេងទៅផ្សារតាប់ប្រាយ៉ា ប្រទេសថៃ ។ ពេលនោះនាងបានបបួលមិត្តភក្តិនាងម្នាក់ទៀតឈ្មោះរក្សា ទៅជាមួយ ។ ពេលទៅដល់ផ្សារថៃពួកនាងបាននាំគ្នាដើរទិញអីវ៉ាន់ទាំងអស់គ្នា។ ឯឈ្មោះយ៉ត បាន អង្គុយផឹកស្រាជាមួយសង្សារមិត្តភក្តិនាង ឯនាងនិងឈ្មោះរក្សា នាំគ្នាដើរទិញឥវ៉ាន់បន្ត ។ លុះ ដល់វេលាល្ងាចថ្ងៃដដែល ទើបឈ្មោះយ៉ត បានឌុបនាងត្រឡប់មកវិញ តាមផ្លូវភូមិស្រែល្អ ដោយនឹកស្មានថាប្រុសព្រាននោះឌុបមកផ្ទះ មែន ។ ពេលមកដល់ផ្សារថ្មី(ផ្សារថ្មពួក) មិត្តភក្តិនាងគេចុះទៅផ្ទះ ឯឈ្មោះយ៉ត ក៏ទៅអង្គុយផឹកស្រាបន្តឲ្យនាងអង្គុយចាំរហូតដល់ព្រលប់ៗនាងតឿនឲ្យឈ្មោះយ៉តឌុបទៅផ្ទះ ។
នាងរៀបរាប់ប្រាប់ប៉ូលិសបន្តទៀតថា ពេលនោះគេបើកម៉ូតូយ៉ាងលឿនសំដៅមកត្បូងវិញ លុះមកដល់ក្រុងសិរីសោភ័ណ គេបាននាំនាងមកដេកផ្ទះសំណាក់ម្កុដពេជ្រ ដោយគេនិយាយលួងលោមថា គេនឹងដណ្តឹងខ្ញុំយកធ្វើជាប្រពន្ធ ។ ចំណែកនាងមិនដឹងថា ប្រុសព្រានឈ្មោះយ៉តនោះមានប្រពន្ធឬអត់ទេ ។
នារីដែលលង់ប្រាណបានបន្តថា លុះព្រឹកឡើងថ្ងៃទី៣ ខែមេសា គេបានឌុបនាងត្រឡប់ទៅផ្ទះវិញ តែគេមិនបានឌុបនាងឲ្យដល់ផ្ទះនោះទេ គឺឌុបនាងមកដល់ត្រឹមផ្សារថ្មី ទុកនាងចោលហើយគេគេចខ្លួនបាត់ទៅ ។ ចំណែកនាងដោយមានការភ័យខ្លាចឪពុកម្តាយស្តីបន្ទោសវាយធ្វើបាប ព្រោះបាត់ខ្លួន១យប់ហើយ នាងបានគេចចេញពីផ្ទះមួយរយៈសិន ដោយរករថយន្តជិះមកផ្ទះឪពុកធំនៅភូមិចក្រី ឃុំជប់វ៉ារី ស្រុកព្រះនេត្រព្រះ ។ លុះដល់ថ្ងៃទី៦ ខែមេសា នាងក៏សម្រេចចិត្តផ្តល់ព័ត៌មានមកឪពុកម្តាយឱ្យមកយកនាងត្រឡប់ទៅវិញតាមរយៈមិត្តភក្តិរបស់នាង។
ទាក់ទិននឹងអំពើដ៏លាមករបស់ជនជាប់ចោទ ឪពុកម្តាយខាងនារីរងគ្រោះបានសំណូមពរដល់សមត្ថកិច្ចស្រាវជ្រាវរកជនល្មើសឈ្មោះប្រាក់ ប៊ុនយ៉ត ចាប់យកទៅផ្តន្ទាទោសតាមច្បាប់ ។ ជាមួយគ្នានេះដែរ លោកវរសេនីយ៍ត្រីយ៉ត រ៉ាយ អធិការនគរបាលស្រុកថ្មពួកបានឲ្យដឹងដែរថា ព្រាននារីរូបនេះត្រូវលោកកំពុងកសាងសំណុំរឿងបញ្ជូនតាមនិតិវិធីច្បាប់៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
