អង់គ្លេស៖ ខ្សែការពាររបស់ក្លិបបិសាចក្រហម Manchester United គឺកីឡាករ Brandon Willaims បានក្លាយជាមុខសញ្ញាដែលក្លិប Newcastle ចង់បានតែក្លិបត្រូវការរូបគេក្នុងលក្ខខណ្ឌខ្ចីជើងប៉ុណ្ណោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យោងតាមសេចក្ដីរាយការណ៍ ក្លិប Newcastle ចង់បាន Williams ទៅចូលរួមជាមួយក្រុមពេលទីផ្សារដោះដូរកីឡាករខែមករាបើកទ្វារឡើងខណៈដែល ក្រុមដែលដឹកនាំដោយលោកគ្រូបង្វឹក Steve Bruce នេះកំពុងស្ថិតនៅលេខរៀងទី១៤និងមាន១៧ពិន្ទុក្នុងដៃ។
Newcastle ក៏ជាក្លិបមួយដែលទទួលរងវិបត្តិសេដ្ឋកិច្ចដោយសារវីរុសកូរ៉ូណាដែរដោយមិនបានទទួលប្រាក់ពីការលក់សំបុត្រចូលទស្សនាការប្រកួតឡើយទើបក្លិបមិនទាន់អាចមានសមត្ថភាពទិញផ្ដាច់យកកីឡាករណាម្នាក់បានប៉ុន្តែ Williams ជាជម្រើសចម្បងដែលពួកគេកំពុងសម្លឹងឃើញ។
Brandon Williams អាចនឹងត្រូវ Man UTD បើកភ្លើងខៀវអនុញ្ញាតឲ្យចាកចេញ ដោយសារតែនៅរដូវកាលនេះគេបង្ហាញខ្លួនបានតែ៥ប្រកួតគត់ និងមិនទាន់រកគ្រាប់បាល់បាននៅឡើយទេ ព្រោះឥលូវនេះលោកគ្រូបង្វឹក Ole Gunnar Solskjaer ចូលចិត្តដាក់ ខ្សែការពារ Alex Telles ដែលទើបផ្ទេរពី FC Porto កាលពីខែតុលាកន្លងទៅឲ្យចូលលេងជំនួសកន្លែង Williams ។
មិនមែនមានតែ Newcastle ទេដែលចាប់អារម្មណ៍លើ ខ្សែការពារវ័យ២០ឆ្នាំរូបនេះតែក្លិប Southampton ក៏កំពុងក្រវែលៗគេដែរ។
លោកគ្រូ Ole ធ្លាប់បានផ្ដល់បទសម្ភាសន៍ទាក់ទងនឹង Williams កាលពីដើមខែនេះថា៖
មានរឿងខ្លះដែលពួកយើងត្រូវតាមដាននៅខែមករាខាងមុខនេះ ប៉ុន្តែពួកយើងវាយតម្លៃ Brandon ខ្ពស់ណាស់ អ៊ីចឹងហើយបណ្ដាក្លិបដែលចង់បានរូបគេគឺមិនខុសទេ។ Brandon ធ្វើបានល្អណាស់តាំងពីគេចូលរួមជាមួយពួកយើង ប៉ុន្តែគេបង្ហាញទម្រង់លេងមិនសូវល្អទេពេលដើមរដូវកាលដោយសារហេតុផលច្រើនរួមបញ្ចូលគ្នា ។ ខ្ញុំគិតថាពេលនេះគេបានក្លាយជាខ្លួនគេពីមុនវិញហើយ។ ការពិតទៅខ្ញុំចូលចិត្ត Brandon នៅពេលដែលគេហ្វឹកហាត់ច្រើនជាង។
ប្រភព៖ thesun
Bong I.T