ខេត្តពោធិ៍សាត់ ៖ ប៉ូលិសស្រុកបាកានបានឃាត់ខ្លួនបុរសម្នាក់ពីបទប្រើ អំពើហិង្សាវាយប្រពន្ធបែកក្បាល ព្រោះតែរឿងទំនាស់ពាក្យសម្តីគ្នាបន្តិចបន្តួច កាលពីថ្ងៃទី៣១ មីនា ២០១២ មកម៉្លេះ វេលាម៉ោង១១យប់ នៅភូមិឆ្នាលមាន់ ឃុំតាលោ ស្រុកបាកាន ប៉ុន្តែទើបតែឃាត់ខ្លួននៅថ្ងៃទី៧ មេសា ២០១២ តាមពាក្យបណ្តឹងរបស់ស្ត្រីជាប្រពន្ធ ។
ប៉ូលិសប៉ុស្តិ៍តាលោ ឱ្យដឹងថា ជនសង្ស័យឈ្មោះ នួន ស៊ីណាត ហៅម៉ៅ អាយុ៣៣ឆ្នាំ និងប្រពន្ធជាជនរងគ្រោះឈ្មោះ ស សាមី អាយុ២៧ឆ្នាំ មានកូន២នាក់ ។ ប្តីប្រពន្ធទាំង២នាក់នេះបានឈ្លោះប្រកែកគ្នាតាំងពីយប់ ថ្ងៃទី ៣១ មីនា ២០១២ ដោយសារទាស់ពាក្យសម្តីគ្នាបន្តិចបន្តួច រហូតដល់បុរសជាប្តីខឹងទប់ចិត្តមិនបានឈានដល់ប្រើអំពើ ហិង្សាវាយក្បាលប្រពន្ធមួយដងរែកបែកចិញ្ចើមខាង ស្តាំបណ្តាលឱ្យហូរឈាមជោកខ្លួន ។ ក្រោយមករំលងបានមួយសប្តាហ៍ ប្រពន្ធបានដាក់ពាក្យបណ្តឹង ទើបសមត្ថកិច្ចឃាត់ខ្លួនបុរសជាប្តី ។
នៅចំពោះមុខសមត្ថកិច្ចជនសង្ស័យបានសារភាព ថា ខ្លួនពិតជាបានវាយប្រពន្ធមួយដងរែកមែន ដោយសារតែខឹងនឹងប្រពន្ធចូលចិត្តទៅអង្គុយលេងផ្ទះ គេមិនគិតការងារផ្ទះ ។ ជាក់ស្តែង កាលពីថ្ងៃកើតហេតុ កូនមកពីរៀនបើកឆ្នាំងមិនទាន់ដាំបាយហូប ពេលដើររកស្រាប់តែឃើញប្រពន្ធនៅអង្គុយជជែកគ្នាលេង ផ្ទះគេឯណោះ ។ ខណៈនោះខ្លួនក៏មិនថាអ្វីដែរ លុះដល់ពេលយប់ខ្លួនក៏និយាយអប់រំណែនាំក្នុងនាមជាប្តី ថា កុំឱ្យដើរលេងផ្ទះគេពេកគិតគូរការងារផ្ទះ និងកូនៗផងព្រោះ យើងមិនមែននៅលីវទៀតទេ មានប្តីមានកូនអស់ហើយ មើលបងប្អូនជិតខាង គេមេម៉ាយផងគេចេះរកស៊ីមើលថែកូនបានល្អណាស់មិន ដូចយើងទេ ។ ភ្លាមនោះ ប្រពន្ធក៏តបវិញថា «បើបងប្អូនឯងល្អម៉េចមិនទៅយកវាធ្វើប្រពន្ធទៅ» ការឆ្លើយបែបនេះ ក៏បណ្តាលឱ្យតឹងសរសៃក ទ្រាំមិនបានក៏វាយតែម្តង ៕
បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
