សោកស្ដាយណាស់!​ មកដឹងអំពីដើមចម នៃការស្លាប់របស់កូនសិស្សលោកគ្រូ ស៊ន អេលីត កីឡាករ អេលីត លីម៉ី

ភ្នំពេញ ៖  ប្រិយមិត្តប្រាកដជាបានជ្រាបនូវព័ត៌មានមួយចំនួនហើយ ដែលខាងគេហទំព័ររបស់យើងបានជម្រាបជូនដល់ប្រិយមិត្ត ទាក់ទងនឹងការស្លាប់របស់កីឡាករ អេលីត លីម៉ី ដែលជាកូនសិស្សរបស់លោកគ្រូ ស៊ន អេលីត ប៉ុន្តែនៅពេលនោះ យើងមិនទាន់ទទួលបានព័ត៌មានជាក់លាក់ណាមួយ ជុំវិញការស្លាប់របស់ លីម៉ី នៅឡើយទេ ។

ប៉ុន្តែឥឡូវនេះលោកគ្រូ ស៊ន អេលីត ដែលជាគ្រូធំនៃក្លឹបប៉ែនកាក់គុនខ្មែរ និងក្លិបនាយកដ្ឋានអង្គរក្ស បានបញ្ជាក់ថា មកទល់នឹងពេលនេះលោកមិនទាន់អាចកំណត់មូលហេតុជាក់លាក់ នៃការស្លាប់របស់កីឡាកររូបនេះបាននៅឡើយទេ។ សម្រាប់មូលហេតុ ដែលលោកដាក់ការសង្ស័យមានពីរករណី គឺទីមួយ ស្លាប់ដោយសារត្រូវខ្សែភ្លើងឆក់ និង ទីពីរ ធ្លាក់ពីលើជណ្តើរ។

លោកបន្តថា មុនពេលកើតហេតុ រូបលោក និងកូនសិស្ស បាននាំគ្នាបោសសម្អាត និងរៀបចំអំពូលភ្លើងនៅផ្នែកខាងក្រោយនៃក្លិប ។ នៅក្នុងការរៀបចំអំពូលភ្លើងនោះដែរ ជនរងគ្រោះខាងលើ បានឡើងជណ្តើរ ដើម្បីលើកអំពូលឱ្យខ្ពស់ជាងមុន ប៉ុន្តែត្រូវបានធ្លាក់រងរបួសក្បាលផ្នែកខាងក្រោយយ៉ាងដំណំ បន្ទាប់មកត្រូវបានបញ្ជូនទៅមន្ទីរកាល់ម៉ែត។ តែជាអកុសលគ្រូពេទ្យនៅទីនោះអះអាងថា ឈាមបានចូលកកក្នុងខួរក្បាល លីម៉ី បាត់ទៅហើយ ជាហេតុធ្វើឱ្យគេស្លាប់នៅទីនោះតែម្តង ។

ទន្ទឹមនឹងនេះផងដែរ លោកគ្រូ ស៊ន អេលីត បានបន្តថាទំហំ​នៃ​ការ​បោក​ក្បាល​ទំនង​មិន​គួរ​ឱ្យ​កូនសិស្ស​របស់​លោក​ឈាន​ដល់​មរណភាព​នោះ​ទេ ទើប​លោក​សង្ស័យ​ថា កូនសិស្ស​លោកត្រូវ​ឆក់​ខ្សែភ្លើង​ច្រើន​ជាង​ ស្លាប់ដោយសារធ្លាក់ពីលើជណ្តើរ ៕