ខ្លាំងមែន! បើទោះជាជួបបញ្ហារបួសកីឡាករសំខាន់ៗច្រើន ប៉ុន្តែ Liverpool នៅតែអាចលត់ Leicester យ៉ាងចាស់ដៃយប់មិញ (មានវីដេអូ)

អង់គ្លេស៖ បញ្ហារបួស​ និងការឆ្លងជំងឺកូវីដ១៩ បានធ្វើឲ្យ Liverpool ប្រកួតនៅក្របខ័ណ្ឌ Premier League កាលពីរាត្រីថ្ងៃអាទិត្យ ទី២៣ ខែវិច្ឆិកា កន្លងទៅ ដោយគ្មានវត្តមានកីឡាករសំខាន់ៗនោះទេ រួមមាន Mohamed Salah, Trent Alexander Arnold , Virgil van Dijk, Joe Gomez និង Thiago ជាដើម ប៉ុន្តែពួកគេនៅតែធ្វើបានល្អ ដោយបានលត់ក្រុមភ្ញៀវ Leicester City យ៉ាងចាស់ដៃ ក្នុងលទ្ធផលក្រាស់ក្រែល៣ទល់នឹង០។

គិតត្រឹមតង់ទី១ មានគ្រាប់បាល់កើតឡើងចំនួន២គ្រាប់ ដែលជាការភ្លាត់ធ្វើឲ្យចូលទីខ្លួនឯងរបស់ខ្សែការពារក្រុម Leicester កីឡាករ Jonny Evans និងការតែតរបស់ខ្សែប្រយុទ្ធចំណូលថ្មី Diego Jota។

លុះការប្រកួតអូសបន្លាយដល់ចុងតង់ទី២ នាទីទី៨៦ ទើបក្រុមលោក Jurgen Klopp បន្ថែមបានគ្រាប់ទី៣ រកបានតាមរយៈខ្សែប្រយុទ្ធឆ្នើមសញ្ជាតិប្រេស៊ីល កីឡាករ Roberto Firmino។

៣គ្រាប់កាលពីយប់មិញនេះ បានធានា៣ពិន្ទុសម្រាប់ក្រុម Liverpool ដោយជួយឲ្យពួកគេ បន្តឈរលេខ២ នៅសប្ដាហ៍ទី៩ មាន២០ពិន្ទុ ស្មើគ្នាជាមួយក្រុមកំពូលតារាង Tottenham Hotpsur ដែលទើបយកឈ្នះក្រុមមេឃខៀវ Manchester City ក្នុងដី ២-០ កាលពីថ្ងៃសៅរ៍ចុងសប្ដាហ៍មុន។

គួរបញ្ជាក់ដែរថា Jota តែងធ្វើបានល្អរាល់ពេលប៉ះជាមួយក្រុម Leicester ពោលក្នុងជំនួប៥ប្រកួតនៅក្របខ័ណ្ឌ Premier League ដែលលេងទល់នឹងក្រុមរហស្សនាមកញ្ជ្រៀងខៀវមួយនេះ គេរកបាន៤គ្រាប់៕

សូមទស្សនាវីដេអូសង្ខេបនៃការប្រកួតខាងក្រោម៖