ក្រុងបាងកក៖ ថ្ងៃទី២៩ ខែតុលា ឆ្នាំ២០២០–ក្រុមហ៊ុន អេសស៊ីជី (SCG) បានចេញរបាយការណ៍ស្ដីពីលទ្ធផលប្រតិបត្តិការអាជីវកម្មរបស់ខ្លួនដោយបង្ហាញថា សម្រាប់ត្រីមាសទី៣ ឆ្នាំ២០២០នេះ ប្រាក់ចំណេញបានកើនឡើង ៥៧%
ធៀបនឹងរយៈពេលដូចគ្នានៃឆ្នាំទៅមិញ
ដោយសារការងើបឡើងវិញនៅក្នុងទីផ្សារសាកលនៃផលិតផលគីមី,
កំណើននៃអត្រាផលិតផលដែលមានតម្លៃបន្ថែមខ្ពស់ (HVA),
គំរូអាជីវកម្មរឹងមាំនៃវិស័យធុរកិច្ចវេចខ្ចប់,
និងកិច្ចប្រឹងប្រែងកែទម្រង់ធុរកិច្ចស៊ីម៉ងត៍និងគ្រឿងសំណង់
ដើម្បីបំពេញតម្រូវការអតិថិជនឲ្យបានកាន់តែប្រសើរឡើង។ អេសស៊ីជី ត្រៀមលក្ខណៈបានល្អដើម្បីសម្រេចបានកំណើនបន្ថែមទៀត
បើទោះបីប្រឈមមុខនឹងជំងឺរាតត្បាតកូវីដ-១៩ ក្ដី។
ក្រុមហ៊ុននឹងអភិវឌ្ឍជាបន្តនូវនវានុវត្តន៍ ផលិតផល
និងសេវាកម្មដែលមានតម្លៃបន្ថែមខ្ពស់ (HVA) និងដំណោះស្រាយជាកញ្ចប់
ដើម្បីត្រៀមខ្លួនសម្រាប់ស្ថានភាពទីផ្សារល្អប្រសើរឡើងវិញ
និងកសាងនូវកំណើនរយៈពេលវែង។
លោក Roongrote Rangsiyopash ប្រធាន និងអគ្គនាយក អេសស៊ីជី
បានប្រាប់ឲ្យដឹងយ៉ាងដូច្នេះថា៖
បើប្រៀបធៀបនឹងលទ្ធផលនៃឆ្នាំទៅមិញ ចំណូលពីការលក់បានធ្លាក់ចុះ ៩% ចំណែកឯប្រាក់ចំណេញវិញ សម្រាប់ត្រីមាសទី៣នេះ បានកើនឡើងដល់ទៅ ៥៧% ដោយសារលទ្ធផលល្អប្រសើរជាងមុននៅក្នុងអាជីវកម្មផលិតផលគីមី និងប្រសិទ្ធផលល្អជាងមុន នៅក្នុងធុរកិច្ចស៊ីម៉ងត៍-គ្រឿងសំណង់។
ចំពោះលទ្ធផលប្រតិបត្តិការសម្រាប់រយៈពេល ៩ខែនៃឆ្នាំ២០២០វិញ អេសស៊ីជី សម្រេចបានចំណូលពីការលក់ចំនួន ២៦.០១២ប៊ីលានរៀល (៩.៦០២លានដុល្លារអាមេរិក) ធ្លាក់ចុះ ៩% បើធៀបនឹងរយៈពេលដូចគ្នានៃឆ្នាំមុនដោយសារតែតម្លៃលក់ផលិតផលគីមីធ្លាក់ចុះស្របគ្នានឹងការធ្លាក់ចុះនៃតម្លៃប្រេង។ ប្រាក់ចំណេញសម្រាប់រយៈពេល ៩ខែនៃឆ្នាំ២០២០ សម្រេចបានសរុប ៣.៣៨១ប៊ីលានរៀល (៨២៨លានដុល្លារអាមេរិក) កើនឡើង ៥% បើធៀបនឹងរយៈពេលដូចគ្នានៃឆ្នាំមុន ដោយសារតែកំណើនប្រាក់ចំណេញពីវិស័យធុរកិច្ចស៊ីម៉ងត៍-គ្រឿងសំណង់ និងធុរកិច្ចវេចខ្ចប់។ ស្ថានភាពអាជីវកម្មទូទៅនៅតែរក្សាបាននូវភាពបត់បែននិងឆ្លើយតបរហ័សទាន់សភាពការណ៍។ បច្ចេកវិទ្យាត្រូវបានប្រើប្រាស់ដើម្បីសម្រួលដល់ខ្សែចង្វាក់ផ្គត់ផ្គង់ទាំងមូល។
អេសស៊ីជី បានកែសម្រួលយុទ្ធសាស្ត្រសម្រាប់ផលិតផលនិងសេវាកម្ម HVA ដោយពង្រឹងលក្ខណវិនិច្ឆ័យដើម្បីបង្កើនភាពប្រកួតប្រជែងនៅក្នុងទីផ្សារសាកលលោក និងរក្សានូវភាពបត់បែនរហ័សដើម្បីឲ្យស្របទៅតាមតម្រូវការដែលប្រែប្រួលលឿន ដើម្បីសម្រេចបានផលចំណេញជាអតិបរមា។ នៅក្រោមបទដ្ឋានថ្មី ចំណូលពីការលក់ផលិតផលនិងសេវាកម្មដែលមានតម្លៃបន្ថែមខ្ពស់ (HVA) របស់ អេសស៊ីជី សម្រាប់រយៈពេល ៩ខែ នៃឆ្នាំ២០២០នេះ សម្រេចបាន ១២.១២៦ប៊ីលានរៀល (២.៩៦៩លានដុល្លារអាមេរិក) ឬស្មើនឹង ៣១% នៃចំណូលសរុបពីការលក់។
ក្រៅពីនេះ ចំណូលរបស់ អេសស៊ីជី ពីអាជីវកម្មនៅខាងក្រៅប្រទេសថៃ រួមបញ្ចូលទាំងការលក់នាំចេញពីប្រទេសថៃ សម្រាប់រយៈពេល ៩ខែនៃឆ្នាំ២០២០ សម្រេចបាន ១៦.៧០៥ប៊ីលានរៀល (៤.០៩០ដុល្លារអាមេរិក) ឬស្មើនឹង ៤៣% នៃចំណូលសរុបពីការលក់។ តួលេខនេះទាបជាងបន្តិចពីតួលេខនៅក្នុងឆ្នាំមុន។
អេសស៊ីជី នៅក្នុងអាស៊ាន (លើកលែងថៃ)
ចំពោះប្រតិបត្តិការរបស់
អេសស៊ីជី នៅក្នុងអាស៊ាន (លើកលែងប្រទេសថៃ) ចំណូលពីការលក់នៅក្នុងត្រីមាសទី៣
ឆ្នាំ២០២០ បានធ្លាក់ចុះ ១៥% បើធៀបនឹងរយៈពេលដូចគ្នានៃឆ្នាំមុន ដោយសម្រេចបាន
៣.២៩៥ប៊ីលានរៀល (៨០៤លានដុល្លារអាមេរិក) ដែលស្មើនឹង ២៥%
នៃចំណូលសរុបពីការលក់របស់ អេសស៊ីជី។ ចំណូលនេះរួមបញ្ចូលទាំងការលក់របស់ប្រតិបត្តិការអាជីវកម្មក្នុងស្រុកនៅក្នុងទីផ្សារអាស៊ាននីមួយៗ
និងទាំងការនាំចូលពីប្រតិបត្តិការនៅថៃផងដែរ។
គិតត្រឹមថ្ងៃទី៣០
ខែកញ្ញា ឆ្នាំ២០២០ ទ្រព្យសរុបរបស់ អេសស៊ីជី មានចំនួន ៩៣.៥១៤ប៊ីលានរៀល
(២២.៨៣៨លានដុល្លារអាមេរិក) ចំណែឯទ្រព្យសរុបរបស់ អេសស៊ីជី នៅក្នុងអាស៊ាន
(លើកលែងប្រទេសថៃ) មានចំនួន ៣៥.៣៤៧ប៊ីលានរៀល (៨.៦៣៣លានដុល្លារអាមេរិក) ដែលស្មើនឹង
៣៨% នៃទ្រព្យសរុបរួមទាំងអស់របស់
អេសស៊ីជី។
ផ្អែកតាមរបាយការណ៍ត្រីមាសទី៣
ឆ្នាំ២០២០ អេសស៊ីជី នៅកម្ពុជា មានទ្រព្យសរុបចំនួន ១.៥៥០ប៊ីលានរៀល
(៣៧៩លានដុល្លារអាមេរិក) ដែលកើនឡើង ៦% បើធៀបនឹងរយៈពេលដូចគ្នានៃឆ្នាំមុន។
ក្នុងត្រីមាសទី៣ ឆ្នាំ២០២០នេះ ក្រុមហ៊ុនសម្រេចបានចំណូលចំនួន ២៣៦ប៊ីលានរៀល
(៥៧,៦លានដុល្លារអាមេរិក) ពីអាជីវកម្ម
ផលិតស៊ីម៉ងត៍ និងអាជីវកម្មលក់គ្រឿងសំណង់។ តួលេខនេះ
ធ្លាក់ចុះ ៦,៦% បើធៀបនឹងរយៈពេលដូចគ្នានៃឆ្នាំមុន។ សម្រាប់រយៈពេល
៩ខែនៃឆ្នាំ២០២០ ទីផ្សារកម្ពុជារបស់ អេសស៊ីជី សម្រេចបានចំណូលពីការលក់ចំនួន
៧៨៨ប៊ីលានរៀល (១៩២,៥លានដុល្លារអាមេរិក)។
ក្នុងអំឡុងត្រីមាសទី៣ នៃឆ្នាំ២០២០ ជំងឺរាតត្បាតកូវីដ-១៩បានបង្កផលប៉ះពាល់ធ្ងន់ធ្ងរទៅលើវិស័យសំខាន់ៗរបស់ប្រទេសកម្ពុជា ព្រមទាំងវិស័យសំណង់និងអចលនទ្រព្យផងដែរ។ ប៉ុន្តែជាការរួមចំណែកលើកកម្ពស់គុណភាពនៃការរស់នៅរបស់ប្រជាជនកម្ពុជា អេសស៊ីជី បន្តផ្ដល់នូវផលិតផលគុណភាពប្រណីតដូចជា ស៊ីម៉ងត៍ Portland និងផលិតផលដែលមានតម្លៃបន្ថែមដូចជា ស៊ីម៉ងត៍បៀក និងបេតុងលាយស្រេចពិសេស។ លើសពីនេះទៀតសេវាកម្មបច្ចេកទេស ៣៦០ដឺក្រេ និងសេវាកម្មផ្អែកលើតម្លៃ អាចជួយដល់អតិថិជនរបស់យើងទទួលបាននូវសំណង់ដែលមានគុណភាពកាន់តែខ្ពស់។
ដើម្បីគាំទ្រដល់ការអភិវឌ្ឍធនធានមនុស្សនៅកម្ពុជា អេសស៊ីជី បានបរិច្ចាគស៊ីម៉ងត៍និងសម្ភារសាងសង់ដែលមានតម្លៃជាទឹកប្រាក់ប្រមាណជា ១ម៉ឺនដុល្លារអាមេរិក ទៅឲ្យវិទ្យាស្ថានបច្ចេកវិទ្យាកំពង់ស្ពឺ សម្រាប់ការប្រើប្រាស់សាងសង់ផ្សេងៗនៅក្នុងសាលា។
លោក Roongrote មានប្រសាសន៍ថា៖
ជំងឺកូវីដ-១៩ បានបង្កផលប៉ះពាល់សេដ្ឋកិច្ចក្នុងកម្រិតមួយដ៏ធំធេងបំផុត។ ថ្វីត្បិតតែប្រតិបត្តិការអាជីវកម្មរបស់យើងនៅមានភាពរឹងមាំក៏ដោយ អេសស៊ីជី ក៏នៅតែមានការព្រួយបារម្ភអំពីស្ថានភាពនេះដែរ។ ដូច្នេះហើយទើបក្រុមហ៊ុនបានចូលរួមនៅក្នុងការជួយដល់សាធារណជន។ ថ្មីៗនេះ អេសស៊ីជី បានបំពេញតួនាទីមួយដើម្បីសម្របសម្រួលកិច្ចសហប្រតិបត្តិការរវាងរាជរដ្ឋាភិបាលថៃ សាកលវិទ្យាល័យ Oxford និង AstraZeneca ដើម្បីបង្កើតវ៉ាក់សាំងកូវីដ-១៩ សម្រាប់ប្រទេសថៃនិងតំបន់អាស៊ីអាគ្នេយ និងដើម្បីធានាថា ប្រជាជនថៃនឹងទទួលបានវ៉ាក់សាំងកូវីដ-១៩ដំបូងៗ នៅឆមាសទីមួយនៃឆ្នាំក្រោយ។ កិច្ចការនេះគឺដើម្បីជួយបង្កើនទំនុកចិត្តនិងស្ដារសេដ្ឋកិច្ចថៃឡើងវិញ។ មូលនិធិ អេសស៊ីជី បានបរិច្ចាគថវិកា ១០០លានបាត ដល់ការងារអភិវឌ្ឍស្រាវជ្រាវវ៉ាក់សាំងកូវីដ-១៩ នៅក្នុងស្រុក។ អេសស៊ីជី ក៏បានចាប់ដៃគូជាមួយបណ្ដាញនានាផងដែរ ដើម្បីរក្សាសុវត្ថិភាពបុគ្គលិកវេជ្ជសាស្ត្រនិងប្រជាជន តាមរយៈការផ្ដល់បរិក្ខារបង្ការកូវីដ-១៩ ដូចជា Modular Swab Unit និងឧបករណ៍ដាក់អ្នកជំងឺដាច់ដោយឡែក (patient isolation capsule) ដល់មន្ទីរពេទ្យ និងអង្គភាពគាំពារសុខភាព ជាង ១០០០កន្លែង នៅទូទាំងប្រទេស។
អាជីវកម្មស៊ីម៉ងត៍-គ្រឿងសំណង់ សម្រេចបានកំណើនជាបន្តជាមួយនឹងការផ្ដល់ដំណោះស្រាយជាកញ្ចប់។ ក្នុងចំណោមដំណោះស្រាយទាំងនោះ រួមមាន ដំណោះស្រាយសំណង់ CPAC ដែលប្រើប្រាស់បច្ចេកវិទ្យាទំនើប ព្រមទាំងផលិតផលនិងជំនាញគុណភាពខ្ពស់របស់ អេសស៊ីជី ដើម្បីផ្ដល់ដំណោះស្រាយផ្នែកសំណង់ជាកញ្ចប់ ដែលឆ្លើយតបទៅនឹងតម្រូវការរបស់អតិថិជន។ សមិទ្ធផលលេចធ្លោមួយក្នុងចំណោមសមិទ្ធផលលេចធ្លោជាច្រើន គឺគម្រោងចាក់បេតុងគ្រឹះបាតខ្នាតធំមួយសម្រាប់គម្រោងអចលនទ្រព្យ One Bangkok ដែលប្រើបេតុងសរុប ២៧.៣០០ម៉ែត្រគូប ដែលជាការងារចាក់បេតុងគ្រឹះបាតជាប់គ្នាដ៏ធំជាងគេបំផុតនៅក្នុងប្រទេសថៃ និងនៅតំបន់អាស៊ីអាគ្នេយ៍។ ដំណោះស្រាយមួយទៀត គឺ ដំណោះស្រាយមួយជីវិត ដែលសម្របសម្រួលសេវាកម្មថែទាំនិងជួសជុលអគារ និងហេដ្ឋារចនាសម្ព័ន្ធគ្រប់ជ្រុងជ្រោយ។ សេវាកម្មនេះ ក៏នឹងត្រូវពង្រីកទៅកាន់អាស៊ានទាំងមូលផងដែរ ។
ធុរកិច្ចវេចខ្ចប់ នៅតែមានភាពរឹងមាំជាបន្ត។ នាថ្ងៃទី២២ ខែតុលា ឆ្នាំ២០២០ SCGP បានបើកសម្ពោធការលក់ភាគហ៊ុននៅលើផ្សារមូលបត្រថៃ (SET) និងនៅពេលបិទការលក់នៅថ្ងៃនោះ ហ៊ុនរបស់ SCGP មានតម្លៃ ៣៥បាត ដែលនេះជាសមិទ្ធផលដ៏ធំមួយរបស់ SCGP ក្នុងនាមជាក្រុមហ៊ុនសាធារណៈ ដែលនឹងជួយពង្រឹងស្ថានភាពហិរញ្ញវត្ថុទូទៅរបស់ SCG សម្រាប់ការពង្រីកអាជីវកម្មនាពេលអនាគត។ ក្រៅពីនេះ SCGP កំពុងស្ថិតក្នុងដំណើរការទិញយកហ៊ុនភាគច្រើននៅក្នុងក្រុមហ៊ុន Bien Hoa Packaging Joint Stock Company (SOVI) នៅវៀតណាម ដើម្បីពង្រឹងជំហរនិងភាពប្រកួតប្រជែងរបស់ខ្លួននៅក្នុងអាស៊ាន និងបំពេញតម្រូវការរបស់អតិថិជនឲ្យបានកាន់តែពេញលេញ។ កិច្ចការនេះត្រូវគេរំពឹងថា នឹងបញ្ចប់ជាស្ថាពរនៅខែធ្នូ ឆ្នាំនេះ។ SCGP ប្ដេជ្ញាចិត្តបង្កើនផលិតផលបរិស្ថានមេត្រី ដោយផ្ដល់នូវជម្រើសទីផ្សារបន្ថែមដូចជា OptiSorb-X ដើម្បីរក្សាគុណភាព និងបង្កើនអាយុប្រើប្រាស់នៃទំនិញដែលច្រកវេចខ្ចប់។
អេសស៊ីជី និងដៃគូនានា
នឹងរៀបចំសន្និសីទ SD ឆ្នាំ២០២០-សេដ្ឋកិច្ចវិលជុំ
: សកម្មភាពដើម្បីអនាគតប្រកបដោយចិរភាព ដើម្បីជំរុញល្បឿននៃអន្តរកាលទៅរកសេដ្ឋកិច្ចវិលជុំ (circular economy) ដោយផ្ដោតសំខាន់លើវិស័យប្រសិទ្ធផលធនធានចំនួន
៤ ៖
១) ការច្នៃប្រើប្រាស់ទឹក
២)
ការលើកកម្ពស់ផលិតភាពកសិកម្មដោយប្រើបច្ចេកវិទ្យា
៣) ការគ្រប់គ្រងសំណល់ និង
៤)
ឧស្សាហកម្មសំណង់។
ការណែនាំសម្រាប់ការអនុវត្ត
នឹងត្រូវបង្ហាញជូននៅឯសន្និសីទអនឡាញ នៅថ្ងៃទី៩ ខែវិច្ឆិកា ឆ្នាំ២០២០
វេលាម៉ោង ១៣ និង ៣០នាទី ដល់ម៉ោង ១៥ និង ៣០នាទី (ម៉ោង GMT +7) តាមរយៈគេហទំព័រ www.sdsymposium2020.com ៕