ទីបំផុតអគារប្លែកគ្មានពីរ ដ៏ធំស្កឹមស្កៃរបស់ផលិតកម្ម YG បើកដំណើរការហើយ

កូរ៉េខាងត្បូង ៖ កាលពីថ្ងៃទី ២៣ ខែកញ្ញា ខាងផលិតកម្ម YG Entertainment បានបញ្ជាក់ប្រាប់បណ្តាញសារព័ត៌មានថា អគារក្រុមហ៊ុនថ្មីរបស់ខ្លួន បានបញ្ចប់ជាស្ថាពរ បន្ទាប់ពីបានសាងសង់ អស់រយៈពេល ៨ ឆ្នាំ ហើយបុគ្គលិក ក៏បានចាប់ផ្តើមផ្លាស់ប្តូរ និងបានប្រើប្រាស់តាំងពីថ្ងៃទី ១៦ ខែកញ្ញាមក។

គួរបញ្ជាក់ផងដែរថា អគារថ្មីរបស់ផលិតកម្ម YG Entertainment មានទីតាំងស្ថិតនៅជាប់នឹងអគារចាស់របស់ក្រុមហ៊ុនផ្ទាល់តែម្តង គឺនៅតំបន់ Hapjeong-dong នៃទីក្រុងសេអ៊ូល ដែលអគារថ្មីនឹងត្រូវបានភ្ជាប់ទៅកាន់អគារចាស់ឆាប់ៗនេះ តាមរយៈស្ពានអាកាស ដើម្បីងាយស្រួលក្នុងការធ្វើដំណើរ។

លក្ខណៈពិសេសនៃអគារដែលមានតម្លៃ ៤១លានដុល្លារនេះ គឺមានកម្ពស់ ១៤ ជាន់ ក្រោមដី ៥ ជាន់ និង ៩ជាន់ឡើងទៅលើ។ អគារនេះមានបន្ទប់ហាត់សមរាំ ខ្នាតធំចំនួន ៧ ស្ទូឌីយោថតសំឡេងខ្នាតធំចំនួន ៧ និងស្ទូឌីយោជាលក្ខណៈឯកជនចំនួន ៣០ បើកសម្រាប់សិល្បករ និងផលិតករ។

ខណៈឯជាន់ដទៃទៀតនៃអគារថ្មីមួយនេះ មានភោជនីដ្ឋានទំនើប មានសាលប្រជុំខ្នាតធំមួយ នឹងការិយាល័យផ្សេងៗទៀត ចំណែកឯដែលជាន់ក្រោមដី មានកន្លែងហាត់ប្រាណលំដាប់ជាន់ខ្ពស់ កន្លែងសម្រាកលំហែកាយ។

ជាមួយគ្នានេះដែរផលិតកម្ម YG Entertainment ជាទ្រនំ របស់សិល្បករ K-Pop ល្បីៗជាច្រើនរូប រួមមាន Big Bang WINNER iKON BLACKPINK  AKMU  TREASURE និងមានសិល្បករច្រើនទៀត៕

សូមទស្សនារូបខាងក្រោម ៖