ឆ្មាមួយក្បាលនេះ ក្លាយជាសន្ដិសុខក្នុងមន្ទីរពេទ្យ និងមានកាតសម្គាល់ខ្លួនយ៉ាងត្រឹមត្រូវ ដោយសារហេតុផលមួយនេះ

អូស្ត្រាលី៖ ឆ្មាមួយក្បាល មានឈ្មោះថា អេលវូដ បានក្លាយជាសន្ដិសុខក្នុងមន្ទីរពេទ្យ Epworth ដែលមានទីតាំងស្ថិតនៅទីក្រុង Richmond ប្រទេសអូស្ត្រាលី។

ប្រភពព័ត៌មានបានឲ្យដឹងថា ដំបូងឡើយ ឆ្មាអេលវូដ ត្រូវបានខាងមន្ទីរពេទ្យគិតថា វាជាឆ្មាអនាថា ដែលតែងតែឃើញវាដើរទៅដើរមកនៅបរិវេណមន្ទីរពេទ្យជារៀងរាល់ថ្ងៃ ចាប់តាំងពីឆ្នាំ២០១៩មកម៉្លេះ។ ឃើញដូច្នេះ ខាងមន្ទីរពេទ្យ បានធ្វើកាតសម្គាល់ខ្លួនមួយ ដែលមានឈ្មោះ មុខតំណែង និងឈ្មោះមន្ទីរពេទ្យយ៉ាងត្រឹមត្រូវ ដោយដាក់ជាប់ទៅនឹងក្រឡៅក.របស់វា។ ហើយទើបតែថ្មីៗនេះប៉ុណ្ណោះ ខាងមន្ទីរពេទ្យដឹងថា វាមិនមែនជាឆ្មាអនាថាឡើយ តែវាគឺជាឆ្មារបស់ពលរដ្ឋម្នាក់ ដែលរស់នៅក្បែរៗនោះ។

បើទោះជាយ៉ាងណាក៏ដោយ ឆ្មាអេលវូដ នៅតែបន្ដមកធ្វើការក្នុងមន្ទីរពេទ្យដូចសព្វដង ហើយវាតែងតែឈប់ស្ងៀមមួយកន្លែង នៅពេលដែលមានមនុស្សអង្អែលក្បាល ឬដងខ្លួនរបស់វា ហើយបន្ទាប់មកទៀត វានឹងបន្ដការដើរល្បាត។

យ៉ាងណាមិញ ឥឡូវនេះ ឆ្មាអេលវូដ ទទួលបានប្រជាប្រិយភាពយ៉ាងខ្លាំងពីសំណាក់អ្នកជំងឺក្នុងមន្ទីរពេទ្យ ហើយវាក៏ត្រូវបានគេស្គាល់ឈ្មោះយ៉ាងច្បាស់ផងដែរ៕

សូមទស្សនារូបភាពខាងក្រោម៖