រយៈពេលត្រឹមតែជាង១ខែសោះ! ចម្រៀងមួយបទរបស់ រ៉េត ស៊ូហ្សាណា មានអ្នកទស្សនាកើនឡើងដល់...

ភ្នំពេញ៖ តារាចម្រៀងស្រីវ័យក្មេង រ៉េត ស៊ូហ្សាណា ដែលប្រិយមិត្តជាច្រើនបានស្គាល់តាមរយៈកម្មវិធីប្រលងចម្រៀង The Voice Cambodia  រដូវកាលទី២ ពេលនេះកញ្ញាកំពុងតែមានសន្ទុះការគាំទ្រខ្លាំងឡើងៗតាមរយៈបទចម្រៀងមួយបទក្រោមចំណងជើងថា “សង្ស័យ” ដែលបទនេះជាស្នាដៃនិពន្ធ បទភ្លេងដោយលោក មាស សុគន្ធ និងនិពន្ធទំនុកច្រៀងដោយលោក អ៊ីនុ។

អ្វីដែលគួរឱ្យកត់សម្គាល់ បទចម្រៀងមួយបទនេះ ដែលបង្ហោះជាផ្លូវការដោយផលិតកម្មរស្មីហង្សមាសត្រឹមរយៈពេលប្រមាណជាង ១ខែប៉ុណ្ណោះ ប៉ុន្តែបើងាកទៅមើលការទស្សនាលើបណ្តាញសង្គម Youtube វិញ Audio ចេញដំបូងមានអ្នកទស្សនារហូតដល់ 5.9M ( ជាង ៥,៩០០,០០០ ដង)  រីឯ MV វិញមានអ្នកទស្សនារហូតដល់ 7M (ជាង ៧លានដង) គិតមកត្រឹមថ្ងៃនេះ។ មិនតែប៉ុណ្ណោះ បទចម្រៀង “សង្ស័យ” ក៏ក្លាយជាបទចម្រៀងមួយបទដែលមានការ Cover ច្រៀងលេងក្នុង Tik Tok រហូតដល់ 347.9K វីដេអូ ដែលអាចរាប់បានថាជាតួលេខមួយដ៏ខ្ពស់ក្នុងចំណោមបទចម្រៀងខ្មែរល្បីៗលើកម្មវិធី TIk Tok ផងដែរ។

ដោយមើលឃើញពីការគាំទ្រដ៏ច្រើនបែបនេះហើយ ទើបមានមតិខ្លះបានលើកឡើងថា រ៉េត ស៊ូហ្សាណា មិនមែនត្រឹមតែជាតារាចម្រៀងដែលច្រៀងពីរោះបានតែបទបរទេសនោះទេ ប៉ុន្តែផ្ទុយទៅវិញ តារាស្រី វ័យ ២០ឆ្នាំរូបនេះក៏បានសាងកេរ្តិ៍ឈ្មោះឱ្យល្បីល្បាញតាមរយៈបទចម្រៀងមនោសញ្ចេតនាជាភាសាជាតិបានច្រើនមកហើយដែរ ដូចជាបទ “ឈប់” “ត្រូវការកម្លាំងចិត្ត” និងបទ “ប្រយោគស្នេហ៍” ជាដើម៕

សូមទស្សនារូបភាពដូចខាងក្រោម៖