ករណីស្ត្រីបរទេសដែលបាត់ខ្លួន ត្រូវបានរកឃើញថាស្លាប់នៅលើកោះសាមុយប្រទេសថៃ

ថៃ៖ មន្រ្តីប៉ូលីសបាននិយាយថា សាកសពស្ត្រីជនជាតិអ៊ុយក្រែនម្នាក់ដែលបានបាត់ខ្លួនត្រូវបានរកឃើញនៅក្នុងប្រឡាយមួយនៅរមណីយដ្ឋានលើកោះ Samui កាលពីថ្ងៃអាទិត្យ។

លោក Supot Khaokhwan អ្នកស៊ើបអង្កេតនៃអធិការដ្ឋានប៉ូលីស Bo Phut បាននិយាយថា ស្ត្រីដែលបានស្លាប់ត្រូវបានរកឃើញដោយលោក Uthen Ruangnon អាយុ ៤៧ ឆ្នាំជាបុគ្គលិកសណ្ឋាគារ។

លោក Uthen បាននិយាយថា កាលពីថ្ងៃសុក្រលោកបានចេញទៅស្វែងរកផ្សិតនៅក្នុងតំបន់មួយដែលនៅជិតផ្លូវលំប្រហែល ៣០ ម៉ែត្រពីផ្លូវក្នុងតំបន់ដែលតភ្ជាប់ពីភូមិ Lamai និងភូមិ Mae Nam ។ គាត់បានកត់សម្គាល់ ក្លិនមិនល្អនៅពេលបានដើរទៅប្រឡាយក្បែរនោះ ហើយឃើញមានអ្វីដូចជាជើងមនុស្សនៅក្នុងទឹកតែមិនហ៊ានមើលអោយជិត។

គាត់បានត្រឡប់ទៅផ្ទះវិញហើយប្រាប់ប្រពន្ធ និងមិត្តភក្តិរបស់គាត់នូវអ្វីដែលគាត់បានឃើញ។ កាលពីថ្ងៃអាទិត្យពួកគេបានទៅកន្លែងជាមួយគ្នាដើម្បីមើលឲ្យកាន់តែច្បាស់។ ពួកគេបានរកឃើញថាវាជាសាកសពរបស់ស្ត្រីដែលស្លាប់។

លោក Supot បានមានប្រសាសន៍ថាមន្ត្រីប៉ូលីសលោក Yuthana Sirisombat បានដឹកនាំប៉ូលីសទៅកាន់កន្លែងកើតហេតុ។

ពួកគេបានរកឃើញរាងកាយរលួយមួយដែលមានឆ្អឹងខ្លះអាចមើលឃើញដោយផ្នែក។ ស្ត្រីរូបនេះត្រូវបានគេប៉ាន់ស្មានថា បានស្លាប់រយៈពេល ១៥-១៧ ថ្ងៃ។ កាបូបស្ពាយមួយត្រូវបានគេរកឃើញនៅក្បែរខ្លួនដែលមានសាច់ប្រាក់ចំនួន ៧០០ បាត ថ្នាំមួយចំនួន និងឧបករណ៍សាកទូរស័ព្ទនិងកាសស្តាប់ត្រចៀក។

មិនយូរប៉ុន្មានបុរសជនជាតិអ៊ុយក្រែនម្នាក់ឈ្មោះ Dimas Frolova អាយុ ៤០ ឆ្នាំជាអ្នកថតរូបបានមើលសាកសព ហើយបញ្ជាក់ថានេះជាប្រពន្ធរបស់គាត់ឈ្មោះ Olha Frolova អាយុ ៣២ ឆ្នាំដែលបានបាត់ខ្លួនតាំងពីថ្ងៃទី ២៥ ឧសភា។

ថ្លែងតាមរយៈអ្នកបកប្រែផ្ទាល់មាត់លោក Frolova បាននិយាយថាគាត់ និង Olha បានរៀបការជាមួយគ្នាអស់រយៈពេល ១២ ឆ្នាំហើយមានកូនប្រុសម្នាក់។ ពួកគេបានរស់នៅលើកោះ Samui ប្រហែលប្រាំឆ្នាំ។ ក្នុងឆ្នាំកន្លងទៅប្រពន្ធរបស់គាត់បានជួបបុរសបរទេសម្នាក់ទៀត។ កាលពីពីរខែមុននាងបានចាកចេញពីគាត់ ហើយបានទៅស្នាក់នៅជាមួយមិត្តប្រុសថ្មីរបស់នាងដោយនាំកូនប្រុសរបស់ពួកគេទៅជាមួយ។ លោកបាននិយាយថា Olha បានទាក់ទងមេធាវីហើយពួកគេកំពុងរៀបចំឯកសារដើម្បីដាក់ពាក្យលែងលះ។

ក្នុងអំឡុងពេលពីរខែកន្លងមកនាងបានមកលេងគាត់ច្រើនដង។ ជួនកាលនាងបានទុកកូនប្រុសរបស់ពួកគេជាមួយគាត់។ នៅថ្ងៃទី ២៥ ឧសភា នាងបានមកលេងគាត់ហើយទុកកូនប្រុសឱ្យគេមើលថែដោយនិយាយថា នាងនឹងត្រលប់មកទទួលគាត់នៅពេលក្រោយ។

លោក Frolova បាននិយាយថា គាត់បានរង់ចាំរហូតដល់ថ្ងៃទី ២៩ ខែឧសភា។ នាងនៅតែមិនទាន់ វិលត្រឡប់មកវិញ ដូច្នេះគាត់បានធ្វើរបាយការណ៍មនុស្សដែលបាត់ខ្លួនជាមួយប៉ូលីស Bo Phut ហើយបានស្នើសុំឱ្យពួកគេស្វែងរកនាង។

លោក Supot បាននិយាយថា មរណភាពរបស់ស្ត្រីត្រូវបានគេរាយការណ៍ទៅស្ថានទូតអ៊ុយក្រែន។ សាកសពត្រូវបានបញ្ជូនទៅមន្ទីរពេទ្យកោះសាមុយដើម្បីធ្វើកោសល្យវិច័យ។ លោកបាននិយាយថាប៉ូលីសកំពុងស៊ើបអង្កេតការស្លាប់របស់នាង។

លោក Frolova និងអ្នកដែលបានស្គាល់ប្តីប្រពន្ធនេះនឹងត្រូវបានសាកសួរហើយការថតសំឡេងកាមេរ៉ាពីតំបន់នោះ នឹងត្រូវបានពិនិត្យរកមើលតម្រុយ៕

ប្រភព៖ Bangkok Post