ស្ងាត់ៗ Man UTD ត្រៀមបោះលុយ ៥០លានទិញកីឡាករមួយរូប កំពុងលេចធ្លោនៅ PL

អង់គ្លេស៖ Manchester United បានដាក់ការចង់បានមកលើខ្សែប្រយុទ្ធជួរមុខរបស់ Everton កីឡាករ Dominic Calvert-Lewin ដោយគ្រោងនឹងចរចានាំយកមកកាន់កីឡដ្ឋាន Old Trafford នៅទីផ្សាររដូវក្ដៅខាងមុខ។

បិសាចក្រហមបានខកខានឱកាសក្នុងការនាំចូលខ្សែប្រយុទ្ធរបស់ Red Bull Salzburg កីឡាករ Erling Braut-Haaland ក្រោយកីឡាករវ័យក្មេងរូបនេះបានសម្រេចចិត្តទៅចូលរួមជាមួយ Borussia Dortmund។ ជាលទ្ធផល ក្រោយបរាជ័យក្នុងការនាំយក Haaland ម្ចាស់ពានលីគកំពូលអង់គ្លេស២០សម័យកាលមួយនេះបានបង្វែរទិសដៅផ្សេងទៅរក Jadon Sancho និង Dominic Calvert-Lewin នេះបើតាមការចុះផ្សាយរបស់ The Sun។

ប្រភពដដែលបានបន្តឲ្យដឹងថា ក្រុមរបស់លោក Ole Gunnar Solskjaer បានត្រៀមរួចរាល់ក្នុងការចំណាយលុយ ៥០លានផោនសម្រាប់នាំយកខ្សែប្រយុទ្ធវ័យ២២ឆ្នាំ Dominic Calvert-Lewin។ Calvert-Lewin កំពុងទទួលបានការចាប់អារម្មណ៍នៅរដូវកាលនេះ ក្រោយរកបាន១០គ្រាប់ ពីការបង្ហាញខ្លួន១៨ប្រកួតឲ្យស្ករគ្រាប់ Everton ក្នុងក្របខណ្ឌ Premier League។

ក្រោយចប់ការប្រកួតកាលពីថ្ងៃសៅរ៍កន្លងទៅ អ្នកចាត់ការទូទៅថ្មីរបស់ Everton លោក Carlo Ancelotti បានពន្លយឲ្យដឹងថាខ្សែប្រយុទ្ធសញ្ជាតិអង់គ្លេសរូបនេះនឹងក្លាយជាខ្សែប្រយុទ្ធដែលមានសក្ដានុពលមួយរូបក្នុងបាល់ទាត់អឺរ៉ុបនាពេលអនាគត។ ខណៈកុងត្រារវាងគេនៅកីឡដ្ឋាន Goodison Park នឹងអស់សុពលភាពនៅបំណាច់រដូវកាល ២០២២-២០២៣៕

ប្រភព៖ SportsMole