VJ រតនា រំភើបចិត្តនឹងភរិយាលើកពានឆ្នើមអន្តរជាតិ!

ថៃ៖ ក្នុងចំណោមអ្នកជំនួញឆ្នើមៗ ដែលលើកពាននៅក្នុងប្រទេសថៃ កាលពីថ្ងៃទី១១ ខែធ្នូ ឆ្នាំ២០១៩ កន្លងមកនេះ ក៏មានឈ្មោះភរិយាលោក VJ រតនា ដែលជាអតីតពិធីករនៅ MyTV ផងដែរ ខណៈដែលអ្នកនាង និងស្វាមី ត្រូវគេឃើញរីកមុខដូចគ្រាប់ជី ក្រោយពេលគណៈកម្មការប្រកាសឲ្យលើកពាន។ នេះជាពានឆ្នើមលើកដំបូង ដែលភរិយារបស់លោកបានទទួលចាប់តាំងពីមានឈ្មោះជាម្ចាស់ក្រុមហ៊ុនរយៈពេលជាង២ឆ្នាំ។

លោក VJ រតនា បានថ្លែងពីប្រទេសថៃមកថា លោកពិតជាមានអារម្មណ៍រំភើបយ៉ាងខ្លាំង ដែលភរិយារបស់លោក គឺអ្នកនាង លឹម លីសា ម្ចាស់ក្រុមហ៊ុន ZZana Cosmictic Co.,LTD ទទួលបានពានឆ្នើមជាលើកទី១ ប៉ុន្តែនៅក្នុងព្រឹត្តិការណ៍ធំ ដែលមានរហូតដល់ ៣៦ប្រទេស ចូលរួម។

លោកបានបន្ថែមទៀតថា ភរិយារបស់លោកទទួលបានពានរង្វាន់​ THE BEST OF ASAIN STAR AWARERS នៅទីក្រុង​បាងកក​ ប្រទេសថៃ​ ដែលជាកម្មវិធីប្រគល់ពាន the Best Healthy and Beauty products ដល់អ្នកឆ្នើមទាំង​ ៣៦ប្រទេស​ មកពីតំបន់អាស៊ី និងពិភពលោក។ នេះជាជោគជ័យមួយ​ ដែលលោក និងភរិយាខិតខំប្រឹងរយៈពេល​ជាង២​ឆ្នាំ​ ចាប់តាំងពីបាននាំចូលផ្ដាច់មុខផលិតផលក្រៅប្រទេសមកចរាចរណ៍ទីផ្សារ។ នេះជាក្ដីរំពឹងដែលលោក និងភរិយាទន្ទឹងចាំ។

ជាមួយនឹងអារម្មណ៍សប្បាយចិត្ត លោកថាក្រោយបញ្ចប់ការទទួលពាន លោក និងភរិយាមិនទាន់ត្រលប់មកស្រុកភ្លាមៗនោះទេ ដោយលោក និងភរិយានឹងបន្តដំណើរកម្សាន្តនៅក្នុងប្រទេសថៃខ្លះៗ និងពិភាក្សាពីរឿងផលិតផលជាមួយអ្នកឯកទេសថៃផង៕