Mourinho ចូលខ្លួនមកប្រជែង Man UTD និង Arsenal ក្នុងការនាំយកកីឡាករម្នាក់របស់ Juventus

អង់គ្លេស៖ បើតាមសេចក្ដីរាយការណ៍បានឲ្យដឹងថា ក្លិបមាន់ខ្នាយមាស Tottenham Hotspur បានចូលខ្លួនមកប្រជែងជាមួយក្លិបអង់គ្លេសពីរផ្សេងទៀត ដើម្បីនាំយកខ្សែការពាររបស់ Juventus កីឡាករ Merih Demiral នៅទីផ្សារដោះដូរកីឡាករនាខែមករាខាងមុខ។

កីឡាករវ័យ២១ឆ្នាំ Demiral បានផ្លាស់ទៅចូលរួមជាមួយក្លិបមានមូលដ្ឋាននៅទីក្រុង Turin កាលពីទីផ្សាររដូវក្ដៅកន្លងទៅ ប៉ុន្តែកំពុងមានព័ត៌មានថាគេអាចចាកចេញវិញ ក្រោយបង្ហាញខ្លួនបានត្រឹម ១ប្រកួតប៉ុណ្ណោះនៅក្នុងក្របខណ្ឌ Serie A រដូវកាលនេះ។ ខណៈក្លិប Manchester United និង Arsenal សុទ្ធតែចាប់អារម្មណ៍ចង់នាំយករូបគេមកលេងនៅទឹកដីអង់គ្លេស។

បើតាមការចុះផ្សាយរបស់កាសែតកីឡាល្បីឈ្មោះមួយនៅអង់គ្លេសបានចុះផ្សាយថា លោក Jose Mourinho អាចនឹងទិញយក Demiral ជាកីឡាករដំបូងរបស់ខ្លួនក្នុងនាមជាអ្នកចាត់ការទូទៅរបស់ Spurs បន្ទាប់ពីក្លិបមានមូលដ្ឋាននៅទីក្រុងឡុងដ៍មួយនេះបានធ្វើការទាក់ទងជាមួយនឹងភ្នាក់ងាររបស់កីឡាកររួចរាល់ហើយ។ ចំពោះតម្លៃខ្លួនរបស់ខ្សែការពារជម្រើសជាតិតួកគីរូបនេះគឺប្រមាណជា ១៥លានផោន។

យ៉ាងណាក៏ដោយ Spurs កំពុងសម្លឹងមើលឱកាសនាំចូលកីឡាករបន្ថែមទៀតមកពង្រឹងតំបន់ខាងក្រោម ខណៈខ្សែការពារចាស់វស្សា Toby Alderweireld បានសម្រេចចិត្តចាកចេញពីក្លិប ក្រោយកុងត្រារវាងគេ និងក្លិប ត្រូវផុតកំណត់នៅទីផ្សារដោះដូរកីឡាកររដូវក្ដៅលើកក្រោយ៕

ប្រភព៖ SportsMole