ផ្លូវការ! Arsenal យកបាន អតីតតារាឆ្នើម Chelsea រូបនេះ ក្នុងតម្លៃត្រឹម៥លាន

កីឡា៖ យោងតាមការបញ្ជាក់ជាផ្លូវការពីខាងក្លិបកាំភ្លើងធំ Arsenal បានប្រកាសឲ្យដឹងថា ក្លិបបានចុះហត្ថលេខា យកអ្នកចាំទី Kepa Arrizabalaga ពីក្លិបតោខៀវ Chelsea ហើយ។

ការផ្ទេរនេះគឺជាការផ្ទេរអចិន្ត្រៃយ៍ ពុំមែនជាការផ្ទេរបែបខ្ចីជើងនោះឡើយ ខណៈដែល Chelsea លក់ឲ្យភាគីលោក Mikel Arteta ត្រឹមតែ៥លានផោន(ស្មើនឹងប្រមាណ ៦.៨លានដុល្លារ)តែប៉ុណ្ណោះ ទាំងដែល Chelsea បានទិញអ្នកចាំទីសញ្ជាតិអេស្ប៉ាញរូបនេះពីក្លិប Athletic Bilbao កាលពីឆ្នាំ២០១៨ ក្នុងតម្លៃផ្ទេរដល់ទៅ ៩៧.៦លានដុល្លារឯណោះ។

Kepa បានបង្ហាញចំណាប់អារម្មណ៍ក្នុងការផ្ទេរមកទឹកដី Emirates ថា៖

"អារម្មណ៍របស់ខ្ញុំ នៅពេលដែលបានផ្ទេរមកក្លិបនេះ គឺពួកយើងជិតនឹងឈ្នះពានហើយ នេះគឺជាគម្រោងដែលខ្ញុំចង់បាន។"

គួរបញ្ជាក់ផងដែរថា Kepa Arrizabalaga នឹងចុះកុងត្រាចំនួនបីឆ្នាំក្នុងការស្នាក់នៅជាមួយក្លិបកាំភ្លើងធំ Arsenal ៕