រាជធានីភ្នំពេញ ៖ មន្ដ្រីនគរបាលប៉ុស្ដិ៍រដ្ឋបាលសង្កាត់បឹងសាឡាង ខណ្ឌទួលគោកម្នាក់ ដែលញៀនថ្នាំឡើងង៉ាងរហូតគ្រប់គ្រងអារម្មណ៍ខ្លួនឯងលែងបាន ហើយទាញកាំភ្លើងអាកាបាញ់បុរសម្នាក់ជាអ្នកជិតខាងបណ្ដាលឱ្យរបួស ត្រូវបាននគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ បញ្ជូនទៅសាលាដំបូងកាលពីថ្ងៃទី៤ ធ្នូ ជាប់ចោទពីបទប៉ុនប៉ងឃាតកម្ម និងបទកាន់កាប់អាវុធដោយគ្មានការអនុញ្ញាត ។ ខណៈពេលនេះ ជនជាប់សង្ស័យមិនទាន់បាត់ង៉ាងថ្នាំញៀននៅឡើយទេ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
គួរបញ្ជាក់ថា កាលពីវេលាម៉ោងប្រមាណ៧និង៣០នាទីព្រឹក ថ្ងៃទី២ ធ្នូ នៅចំណុចផ្លូវលេខ២៧១ហ្សេត ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ លោក សុង ពិសិដ្ឋ ជាមន្ត្រីនគរបាលប៉ុស្តិ៍បឹងសាឡាង មានឋានន្តរស័ក្តិព្រឹទ្ធបាលឯក ជាប៉ូលិសចូលថ្មី ស្នាក់នៅផ្ទះជួលក្បែរកន្លែងកើតហេតុ បានផ្ទុះអាវុធចំនួន៣គ្រាប់ បណ្តាលឲ្យត្រូវជនរងគ្រោះឈ្មោះ សឹង សុផល ភេទប្រុស អាយុ៥២ឆ្នាំ ជាអ្នកម៉ៅការសំណង់ ស្នាក់នៅផ្ទះលេខ៥៧ រងរបួសខ្នង ត្រូវបានសាច់ញាតិដឹកទៅសម្រាកព្យាបាលនៅមន្ទីរពេទ្យមិត្តភាពកម្ពុជាសូវៀត ។
ស្ត្រីម្នាក់ឈ្មោះ សឹង សុធី អាយុ២៣ឆ្នាំ ជាកូនជនរងគ្រោះបានប្រាប់សមត្ថកិច្ចថា មុនពេលកើតហេតុ មន្ត្រីនគរបាលនោះបានកាន់កាំភ្លើងអាកាមួយដើម ក្នុងសម្លៀកបំពាក់ឈុតជានគរបាលជាតិ បានដើរទៅផ្លូវលំហើយស្រែកថា អាហ៊ាងអ្ហែងនៅណា ? ស្រែកជាច្រើនដង ហើយ បានអាម៉េបញ្ជូលគ្រាប់បាញ់ឡើងលើមួយគ្រាប់ ។
ភ្លាមនោះ ឪពុកនាងឃើញទំនងមិនស្រូលក៍ទាញម៉ូតូបម្រុងជិះចេញ តែត្រូវបានមន្ត្រីនគរបាលរូបនោះស្នាក់ផ្លូវ ហើយតម្រង់បាញ់ចំនួន២គ្រាប់ផ្ទួនៗគ្នាក្នុងចម្ងាយជិតបំផុត បណ្តាលឲ្យគាត់ត្រូវ១គ្រាប់បញ្ឆិតខ្នងដោយសារតែឪពុកនាងគាត់អោនផុត និងជិះម៉ូតូគេចខ្លួនទៅ ។ បន្ទាប់ពីមានករណីផ្ទុះអាវុធបណ្តាលឲ្យមានរបួសអ្នកដ៏ទៃនោះ សមត្ថកិច្ចបានចុះទៅឃាត់ខ្លួន និងវាយខ្នោះមន្ត្រីនគរបាលប៉ុស្តិ៍ង៉ាងថ្នាំ បញ្ជូនទៅកាន់ការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ ហើយនៅកន្លែងកើតហេតុសមត្ថកិច្ចរើសបានសំបកគ្រាប់កាំភ្លើងអាកាចំនួន៣ផងដែរ ។
គិតមកដល់ពេលនេះ២យប់៣ថ្ងៃ លោក សុង ពិសិដ្ឋ ជាមន្ត្រីនគរបាលប៉ុស្តិ៍រដ្ឋបាលសង្កាត់បឹងសាឡាង ខ័ណ្ឌទួលគោក នៅមិនទាន់មានស្មារតីគ្រប់គ្រាន់ ដឹងខុសត្រូវនៅឡើយទេ សូម្បីចម្លើយនៅសមត្ថកិច្ច ក៏គេនៅឆ្លើយរបៀបញៀនថ្នាំមិនទាន់បាត់នៅឡើយ គឺគ្រប់គ្រងខ្លួនឯងលែងបាន៕
ប្រភព៖ កោះសន្តិភាព
Bong I.T