អង់គ្លេស៖ ក្លិបស្ករគ្រាប់ Everton បានសម្រេចចែកផ្លូវគ្នាជាមួយនឹងអ្នកចាត់ការទូទៅសញ្ជាតិព័រទុយហ្កាល់លោក Marco Silva កាលពីល្ងាចថ្ងៃព្រហស្បតិ៍ម្សិលមិញ បន្ទាប់ពីលោកដឹកនាំក្រុមទទួលលទ្ធផលមិនល្អក្នុងរដូវកាលនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្លិប Everton បានចេញសេចក្ដីថ្លែងការមួយនៅលើគេហទំព័រផ្លូវការរបស់ខ្លួនកាលពីម្សិលមិញថា៖
"ក្លិប Everton សូមប្រកាសបញ្ជាក់ថាលោក Marco Silva បានចាកចេញពីក្លិបហើយ។ម្ចាស់ភាគហ៊ុនធំរបស់ក្លិបលោក Farhad Moshiri និងលោកប្រធានក្លិប Bill Kenwright រួមជាមួយក្រុមប្រឹក្សាភិបាលរបស់ក្លិបទាំងអស់ សូមថ្លែងអំណរគុណយ៉ាងជ្រាលជ្រៅទៅដល់លោក Marco ដែលបានខិតខំប្រឹងប្រែងដឹកនាំក្រុមរយៈពេល១៨ខែកន្លងមកនេះ។ ក្លិបសូមជូនពរលោកជួបសំណាងល្អនាពេលអនាគត។"
គួរបញ្ជាក់ផងដែរថាលោក Marco បានដឹកនាំក្រុមទទួលបរាជ័យយ៉ាងធ្ងន់ធ្ងរក្រោមថ្វីជើងក្រុម Liverpool ក្នុងលទ្ធផល៥-២ កាលពីរាត្រីថ្ងៃពុធ កន្លងទៅនេះ ជាហេតុធ្វើឲ្យក្រុម Everton ធ្លាក់មកឈរចំណាត់ថ្នាក់លេខ១៨ មាន១៤ពិន្ទុក្នុងដៃ គិតត្រឹម ១៥ប្រកួត ក្នុងតារាង Premier League ដែលកំពុងស្ថិតក្នុងតំបន់ដែលត្រូវគេកាត់ចោលទៅលេងក្របខណ្ឌ Championship ៕
ប្រភព៖ evertonfc
Bong I.T