ខេត្ត​ព្រះ​សីហ​នុ ៖ សេចក្តីរាយការណ៍​បឋម លោក ហាក់ សាន់ មេឃុំ​ទឹកល្អក​ក៏​ដូច​ជា មន្ត្រី​មូលដ្ឋាន​ឃុំ ដែល​នៅ​លើ​ផ្លូវជាតិ​៣ ក្នុង​ទឹកដី​ស្រុក​ព្រៃ​នប់​បាន​ឲ្យ​ដឹង​ថា ចាប់តាំងពី​ព្រឹក​ព្រលឹម ថ្ងៃ​ទី​០៣ ខែធ្នូ​នេះ រហូត​មក​ដល់​ថ្ងៃ​ទី​០៤ ខែធ្នូ​នេះ បណ្តា​ឃុំ​មួយ​ចំនួន​ក្នុងស្រុក​ព្រៃ​នប់ តាម​បណ្តោយ​ផ្លូវជាតិ​លេខ​៣ ពី​វាល​រេញ​-​កំពត កំពុង​ទទួល​រង​នូវ​ឥទ្ធិពល​ខ្យល់ព្យុះ​រដូវ​បោកបក់​មក​ពី​ជើងភ្នំ​កំចាយ​បូកគោ ។

ដោយ​បណ្តា​ឃុំ​ដែល​រង​ប៉ះពាល់​មាន​ឃុំ​វាល​រេញ ឃុំ​សាមគ្គី ឃុំ​ទឹកល្អក ឃុំ​ទឹកថ្លា និង​បណ្តា​ឃុំ​ខ្លះ​ទៀត នៅ​ក្នុង​ខេត្តកំពត​ដែល​នៅ​ក្បែរ​គ្នា​ក៏​ទទួល​រង​ឥទ្ធិពល​ព្យុះ​រដូវ​នេះ​ដែរ ។ ត្រឹម​រយៈពេល​២​ថ្ងៃនេះ​មានផ្ទះ​ពលរដ្ឋ​ច្រើន​រាប់រយ​ខ្នង​រង​ការ​ខូចខាត​ក្នុង​នោះ​តាម​របាយការណ៍​បឋម​ពី​មន្ត្រី​មូលដ្ឋាន​គិត​ត្រឹម​យប់​ថ្ងៃ​ទី​០៣ ខែធ្នូ មានផ្ទះ​ពលរដ្ឋ​ជាង​៦០០​ខ្នង បាន​រង​ការ​ខូចខាត​ដូច​ជា របើក​ដំបូល និង​របើក​ជញ្ជាំង​ជាដើម ហើយ​នៅ​ថ្ងៃ​ទី​០៤ ធ្នូ ខ្យល់​នៅ​តែ​ធ្លាក់​បន្ត​ដែល​ធ្វើ​ឲ្យ​ចំនួន​លំនៅ​ដ្ឋា​ន​ពលរដ្ឋ​បាន​រង​ការ​ខូចខាត​កើនឡើង​បន្ថែម​ទៀត ។

បើ​ខ្យល់​នៅ​តែ​បន្ត​ធ្លាក់​ច្រើន​ថ្ងៃ​ទៀត តាម​ការ​សន្និដ្ឋាន​សរុប​ផ្ទះ​ពលរដ្ឋ​ដែល​រង​ការ​ខូចខាត​អាច​ឡើង​ដល់​ជិត​១០០០​ខ្នង ក្នុង​នោះ​មាន​ផលដំណាំ​មួយ​ចំនួន​ទៀត​រង​ការ​ខូចខាត​ដែរ ប៉ុន្តែ​មិន​មាន​មនុស្ស​រងគ្រោះថ្នាក់​ទេ ។

សូម​បញ្ជាក់​ថា បណ្តា​ឃុំ​ជាប់​ផ្លូវជាតិ​លេខ​៣ វាល​រេញ​- កំពត តែងតែ​ទទួល​រង​នូវ​ឥទ្ធិពល​ខ្យល់ព្យុះ​រដូវ​ដែល​បោកបក់​មក​ពី​ភ្នំ​កំចាយ​បូកគោ​នេះ​ជា​រៀង​រាល់​ឆ្នាំ មិន​ដែល​អាក់ខាន​ឡើយ​ភាគច្រើន​នៅ​ពេល​ចុងឆ្នាំ​ដោយ​គ្រាន់តែ​ឆ្នាំ​ខ្លះ​មាន​ទំហំ​ធំ​ប៉ះពាល់​ខូចខាត​ច្រើន និង​ឆ្នាំ​ខ្លះ​ប៉ះពាល់​តិចតួច ហើយ​ថា បាតុភូត​ធម្មជាតិ​នេះ​បាន​កើតឡើង​តាំងពី​សម​យ័​បុរាណ​យូរលង់​ណាស់​មក​ហើយ មិនមែន​ទើបតែ​កើត​មាន​ថ្មី​ៗ​នេះ​ទេ​អាច​និយាយ​បាន​ថា អ្នក​ភូមិ​នៅ​តំបន់​នោះ​បាន​ទម្លាប់​ជាមួយ​ខ្យល់ព្យុះ​រដូវ​នេះ​ត​កូន ត​ចៅ មិន​មាន​អ្វី​ប្លែក​ឡើយ ៕

ប្រភព​​​៖ កោះសន្តិភាព

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ