ខេត្តសៀមរាប ៖ កម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការនគរបាលខេត្តសៀមរាបដឹកនាំដោយលោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាលនៃស្នងការខេត្ត បានឲ្យកម្លាំងការិយាល័យជំនាញសហការជាមួយនាយកដ្ឋាននគរបាលព្រហ្មទណ្ឌក្រសួងមហាផ្ទៃ ចុះធ្វើការឃាត់ខ្លួនបានជនជាតិចិនចំនួន២នាក់នៅរសៀលថ្ងៃទី១៨ ខែវិច្ឆិកា ឆ្នាំ២០១៩ ក្នុងទឹកដីខេត្តកណ្ដាល រួចប្រគល់ឱ្យទៅកម្លាំងនគរបាលជំនាញព្រហ្មទណ្ឌនៃស្នងការដ្ឋាននគរបាលខេត្តសៀមរាបវិញដើម្បីចាត់ការបន្ត បន្ទាប់ពីជនសង្ស័យទាំង២នាក់បានធ្វើសកម្មភាពលួចម៉ូតូ១គ្រឿងចេញពីក្នុងក្រុងសៀមរាបបានសម្រេចជិះទៅរាជធានីភ្នំពេញ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើតាមការអះអាងពីលោកវរសេនីយ៍ ឯក ហង្ស សូផាតភីរម្យ បានឱ្យដឹងនៅរសៀលថ្ងៃទី១៨ ខែវិច្ឆិកា ឆ្នាំ២០១៩ ថាករណីលួចយកម៉ូតូ០១គ្រឿងម៉ាកហុងដាឃ្លីក នៅថ្ងៃទី១៨ ខែវិច្ឆិកា ឆ្នាំ២០១៩ ស្ថិតនៅចំណុចបាយ័នប៊ូទិកអូតែល នៅភូមិបន្ទាយចាស់ សង្កាត់ស្លក្រាម ក្រុង/សៀមរាប ។
លោកបានបញ្ជាក់ថា មុនពេលកើតហេតុកាលពីព្រឹកថ្ងៃទី១៧ ខែវិច្ឆិកា ឆ្នាំ២០១៩ មានបុរសជនជាតិថៃម្នាក់បានមកជួលម៉ូតូមួយគ្រឿងម៉ាកហុងដាឃ្លីក ស៊េរីឆ្នាំ២០១២ ពណ៌ក្រហមលាយខ្មៅ ពាក់ផ្លាកលេខ បាត់ដំបង 1L-9343 ចំនួនពីរថ្ងៃក្នុងមួយថ្ងៃតម្លៃ10ដុល្លារដោយបុរសជនជាតិថៃនោះស្នាក់នៅបន្ទប់បាយ័នប៊ូទិកអូតែល ។
លុះព្រឹកឡើងថ្ងៃទី១៨ ខែវិច្ឆិកា ឆ្នាំ២០១៩ វេលាម៉ោង១០និង០០នាទីព្រឹក បុរសជនជាតិថៃ(ជនរងគ្រោះ)បានខលមកប្រាប់ម្ចាស់ក្រុមហ៊ុនដែលជួលម៉ូតូដល់ខ្លួន ថាម៉ូតូដែលគេបានជួលនោះត្រូវបានបាត់ទើបម្ចាស់ក្រុមហ៊ុនបានពិនិត្យមើលតាម GPS ដែលដាក់ជាប់នឹងម៉ូតូឃើញថា ម៉ូតូដែលចោរលួចនោះកំពុងធ្វើដំណើរទៅភ្នំពេញ ហើយទើបម្ចាស់ម៉ូតូប្តឹងសមត្ថកិច្ចតែម្តង ។
លោកវរសេនីយ៍ឯកបានបញ្ជាក់ទៀតថា បន្ទាប់ពីទទួលបានបណ្តឹងខាងជនរងគ្រោះមក កម្លាំងនគរបាលព្រហ្មទណ្ឌកម្រិតស្រាលរបស់ខេត្តសៀមរាប ដោយមានការបញ្ជាពីលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្ដាលយុត្តិធម៌ នៃស្នងការនគរបាលខេត្តសៀមរាបបានទំនាក់ទំនងសហការណ៍ជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃដើម្បីធ្វើការប្រមាញ់តាមចាប់ខ្លួនរហូតឈានដល់ធ្វើការឃាត់ខ្លួនបានជនសង្សយ័២នាក់ជាជនជាតិចិន និងម៉ូតូជាវត្ថុតាងរបស់ជនរងគ្រោះភ្លាមៗតែម្តង រួចនាំជនសង្ស័យយកទៅខេត្តសៀមរាបវិញដើម្បីកសាងសំណុំរឿងចាត់តាមនីតិវិធីច្បាប់ ។
លោកវរសេនីយ៍ឯក ហង្ស សូផាតភីរម្យ បានបញ្ជាក់បន្ថែមថា ក្រោយពេលចាប់ខ្លួនកម្លាំងសមត្ថកិច្ចបានឆែកឆេររកឃើញវត្ថុតាងរួមមានឧបករណ៍គាស់ទូរដែកមួយចំនួន, ឧបករណ៍កាច់សោរម៉ូតូមួយចំនួន និងខ្សែភ្លើងសម្រាប់ឆក់កាត់សោរផ្ទះមួយចំនួន ព្រមទាំងម៉ូតូរបស់ជនរងគ្រោះផងដែរ ។ បច្ចុប្បន្នជនសង្ស័យទាំង២នាក់ និងវត្ថុតាងត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការខេត្តដើម្បីចាត់ការបន្តទៅតាមផ្លូវច្បាប់ ។ ចំណែកម៉ូតូជនរងគ្រោះត្រូវបានសមត្ថកិច្ចជំនាញប្រគល់ជូនម្ចាស់ដើមវិញ ៕
ប្រភព៖ កោះសន្តិភាព