ខេត្តកំពង់ធំ ៖ បើតាមសេចក្តីរាយការណ៍បឋមបានឱ្យដឹងថា ស្ត្រីម្នាក់ត្រូវបានកម្លាំងសមត្ថកិច្ចចាប់ខ្លួនបាន ក្រោយពីចាប់ពង្រត់ក្មេងស្រីរងគ្រោះម្នាក់នៅភ្នំពេញ ហើយយកទៅលក់នៅខេត្តកំពត រួចជិះរថយន្តមកជួបមិត្តប្រុសស្គាល់តាមហ្វេសប៊ុកនៅមុខផ្សារស្ទោង បង្កឱ្យមានការភ្ញាក់ផ្អើលកាលពីកាលពីម៉ោង៥និង៣០នាទីល្ងាច ថ្ងៃទី១៦ ខែវិច្ឆិកា ឆ្នាំ២០១៩ នៅមុខផ្សារស្ទោង ខេត្តកំពង់ធំ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើតាមលោកអធិការរងនគរបាលស្រុកស្ទោង បានប្រាប់នាព្រឹកថ្ងៃទី១៧ ខែវិច្ឆិកានេះថា ជនសង្ស័យខាងលើឈ្មោះ ធុន ថុនា ភេទស្រី អាយុ៣០ឆ្នាំ មានទីលំនៅភូមិត្នោត ឃុំច្រេះ ស្រុកកំពង់រោទ៍ ខេត្តស្វាយរៀង ត្រូវបានឃាត់ខ្លួនកាលពីម៉ោង៥និង៣០នាទៅល្ងាច ថ្ងៃទី១៦ វិច្ឆិកា នៅចំណុចមុខផ្សារស្ទោង ពីបទចាប់ពង្រត់ក្មេងស្រីរងគ្រោះឈ្មោះ ប៊ុន ថាសុពីន អាយុ១ឆ្នាំ១០ខែ ដែលប្រព្រឹត្តកាលពីព្រឹកថ្ងៃទី១៥ វិច្ឆិកានៅសង្កាត់កំបូល ខណ្ឌសែនសុខ រាជធានីភ្នំពេញ ។
លោកអធិការរងបន្តថា នៅចំពោះចំពោះមុខសមត្ថកិច្ច ជនសង្ស័យសារភាពថា «រូបគេបានទៅរស់នៅជាមួយនឹងម្តាយឪពុកកុមារីរងគ្រោះ ដោយធ្វើជាអ្នកបំរើ និងមើលកូនឲ្យគេ បានប្រាក់ខែ ដោយក្នុង១ខែ៣០ម៉ឺនរៀល ហើយរស់នៅមិនបាន១ខែផង នាងក៏ស្គាល់មិត្តប្រុសម្នាក់តាមហ្វេសប៊ុក ។
ពេលនោះនាងក៏លួចយកកូនក្មេងដែលនាងមើលថែនោះទៅលក់ឲ្យគេនៅឯខេត្តកំពត រួចជិះរថយន្តមកផ្សារស្ទោង ដើម្បីជួបមិត្តប្រុសដែលនាងមិនដែលស្គាល់មុខផងនោះ គឺគ្រាន់តែស្គាល់តាម Facbook ដែលបានណាត់គ្នា ប៉ុន្តែមិនទាន់បានជួបមិត្តប្រុសផង ស្រាប់តែត្រូវសមត្ថកិច្ចចាប់ខ្លួនបាន យកមកសាកសួរ រួចបញ្ជូនទៅកាន់ស្នងការនគរបាលខេត្តភ្លាមៗនៅថ្ងៃដដែល។
ពាក់ព័ន្ធករណីខាងលើនេះ អ្នកស្រីស្នងការរងនគរបាលខេត្តកំពង់ធំ ទទួលបន្ទុកខាងជួញដូរមនុស្ស បានប្រាប់ថា នៅពេលដែលកម្លាំងសមត្ថកិច្ចឃាត់ខ្លួនជនសង្ស័យខាងលើនេះ បានបញ្ជូនមកកាន់ស្នងការខេត្តនៅព្រឹកថ្ងៃទី១៧ វិច្ឆិកា អ្នកស្រីក៏បញ្ជូនទៅកាន់ស្នងការរាជធានីភ្នំពេញវិញ ដោយសារតែខាងជនរងគ្រោះគាត់រស់នៅភ្នំពេញ ហើយគាត់បានដាក់ពាក្យបណ្តឹងនៅទីនោះផងដែរ។
ក្រោយមកសមត្ថកិច្ចក៏បាននាំខ្លួនជនសង្ស័យទៅដល់ស្រុកអង្គរជ័យ ខេត្តកំពត ដែលជាកន្លែងដែលជនសង្ស័យបានយកក្មេងស្រីរងគ្រោះទៅលក់ឲ្យគេក្នុងតម្លៃ២០០ដុល្លារ។
អ្នកស្រីស្នងការងបញ្ជាក់ទៀតថា ឥឡូវនេះ ខាងកម្លាំងសមត្ថកិច្ចបានជួយក្មេងស្រីរងគ្រោះបានហើយ គឺនាងមានសុខភាពល្អជាធម្មតាទេ។ (កែសម្រួលដោយ ៖ បុប្ផា)
ប្រភព៖ កោះសន្តិភាព