រាជធានីភ្នំពេញ ៖ ក្មេងប្រុស២នាក់ដែលជាសិស្សវិទ្យាល័យជម្ពូវ័ន ដែលបានធ្វើសកម្មភាពឆក់ ទូរស័ព្ទពីស្ត្រីជាកម្មការិនីរោងចក្រកកាត់ដេរម្នាក់បានសម្រេចពីក្នុងភូមិសាស្ត្រសង្កាត់ភ្លើងឆេះរទេះ ខណ្ឌកំបូល រួចហើយបានព្យាយាមជិះម៉ូតូរត់គេចខ្លួន។ ប៉ុន្តែរត់មិនរួចពេលទៅដល់ភូមិសាស្ត្រ សង្កាត់ប្រទះឡាង ខណ្ឌកំបូលដដែល ត្រូវបានកម្លាំងនគរបាលនៃអធិការដ្ឋានខណ្ឌដង្កោ ជួយស្ទាក់ចាប់បានភ្លាមៗ បន្ទាប់មកបាននាំទៅប្រគល់ជូននគរបាលដែលជាម្ចាស់ករណី ធ្វើការសាកសួរ និងកសាងសំណុំរឿង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ហេតុការណ៍នោះបានកើតឡើងកាលពីវេលាម៉ោង១១ និង១៥នាទីព្រឹក ថ្ងៃទី១៥ ខែវិច្ឆិកា ឆ្នាំ២០១៩ នៅតាមផ្លូវជាតិលេខ៣ ស្ថិតនៅសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។ ក្មេងប្រុសសង្ស័យទាំង២នាក់ខាងលើម្នាក់ឈ្មោះ អៀង ចាន់ដែន អាយុ១៣ឆ្នាំ មុខរបរសិស្សមានទីលំនៅ ក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងម្នាក់ទៀតឈ្មោះ សុខ សុផានិត អាយុ១៦ឆ្នាំ មុខរបរសិស្ស មានទីលំនៅក្នុងភូមិព្រៃព្រីងខាងត្បូង សង្កាត់ចោមចៅ៣ ខណ្ឌពោធិ៍សែនជ័យ ។ មិនតែប៉ុណ្ណោះក្រោយពេលនគរបាលឃាត់ខ្លួនវាយខ្នោះដៃក្មេងប្រុសសង្ស័យ អាយុ១៣ឆ្នាំនោះ បានស្រែកយំ និងបានសារភាពថា ខ្លួនទើបតែធ្វើសកម្មភាពជាលើកទី១ប៉ុណ្ណោះ ក៏ត្រូវនគរបាល ចាប់ខ្លួនបានតែម្ដង។
ដោយឡែកស្ត្រីដែលជាម្ចាស់ទូរស័ព្ទម៉ាក IPhone 6plus ដែលត្រូវក្មេងប្រុស ខាងលើឆក់នោះឈ្មោះ គង់ ចាន់ធឿន អាយុ២៨ឆ្នាំ មុខរបរកម្មកររោងចក្រកាត់ដេរ ស្នាក់នៅក្នុង ភូមិពងទឹក សង្កាត់ពងទឹក ខណ្ឌដង្កោ រាជធានីភ្នំពេញ។ នគរបាលបានឲ្យដឹងថា នៅមុនពេលកើតហេតុ ស្ត្រីម្ចាស់ទូរស័ព្ទបានជិះម៉ូតូ១គ្រឿង ធ្វើដំណើរតែម្នាក់ឯងតាមផ្លូវជាតិលេខ៣ ដោយជិះបណ្ដើរកាន់ទូរស័ព្ទនិយាយបណ្ដើរ។ លុះពេលទៅដល់ត្រង់ចំណុចកើតហេតុ ក៏ត្រូវបានក្មេងប្រុសសង្ស័យទាំង២នាក់ជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៥ ពណ៌ខ្មៅពាក់ស្លាកលេខភ្នំពេញ1CN-1742 តាមពីក្រោយរួចធ្វើសកម្មភាពឆក់យកទូរស័ព្ទតែម្ដង។
ប្រភពដដែលបានបន្តថា បន្ទាប់ពីឆក់បានសម្រេចក៏បាននាំគ្នាជិះម៉ូតូរត់គេចខ្លួន ហើយស្ត្រីម្ចាស់ ទូរស័ព្ទបានស្រែកថាចោរៗបង្កការភ្ញាក់ផ្អើលពេញដងផ្លូវ លុះពេលគេចទៅដល់ភូមិភា សង្កាត់ប្រទះឡាង ខណ្ឌកំបូល រាជធានីភ្នំពេញ។ ក៏ត្រូវបានកម្លាំងនគរបាលនៃអធិការដ្ឋានខណ្ឌដង្កោ ដឹកនាំ និងបញ្ជាដោយផ្ទាល់ពីសំណាក់ លោកវរៈសេនីយ៏ឯក ជឹម ស៊ីថា អធិការខណ្ឌដង្កោ ស្ទាក់ចាប់បានភ្លាមៗ។ បន្ទាប់មកបានបញ្ជូនក្មេងប្រុសសង្ស័យទាំង២នាក់នេះ ទៅឲ្យនគរបាល ប៉ុស្តិ៍រដ្ឋបាលសង្កាត់ ភ្លើងឆេះរទេះ ខណ្ឌកំបូល ដើម្បីសាកសួរ និងកសាងសំណុំរឿងចាត់ការបន្តទៀត ព្រោះទីតាំងកើតហេតុនៅទីនោះ៕
ប្រភព៖ កោះសន្តិភាព
Bong I.T