ខេត្តបាត់ដំបង ៖ បើសេចក្ដីរាយការណ៍ពីសមត្ថកិច្ចបានឲ្យដឹងថា យ៉ាងហោចណាស់មនុស្ស៣នាក់ ដែលស្ថិតក្នុងគ្រួសារតែមួយបានស្លាប់ជាបន្តបន្ទាប់ នៅក្នុងឧប្បត្តិហេតុគ្រោះថ្នាក់ចរាចរណ៍ដ៏រន្ធត់មួយ រវាងរថយន្តជាមួយអ្នកជិះម៉ូតូ កាលពីម៉ោង៨និង៤០នាទីយប់ ថ្ងៃទី០៩ វិច្ឆិកា ឆ្នាំ២០១៩ នៅលើផ្លូវជាតិលេខ៥៩ ត្រង់ចំណុចភូមិថ្មី ឃុំត្រាង ស្រុកកំរៀង ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីរាយការណ៍បន្តថា ពាក់ព័ន្ធនឹងករណីគ្រោះថ្នាក់ចរាចរណ៍ខាងលើនេះ គេមិនទាន់ដឹងអំពីមូលហេតុនៃឧប្បត្តិហេតុនេះនៅឡើយទេ។ ដោយឡែកជនរងគ្រោះទាំងអស់ ក៏គេមិនទាន់ស្គាល់អត្តសញ្ញាណភ្លាមដែរ។ តែគេគ្រាន់តែដឹងថា ជនរងគ្រោះទាំង៣នាក់នោះ ត្រូវជាឪពុក កូនប្រុស និងកូនស្រី។ នេះបើយោងតាមព័ត៌មានបឋមរបស់សមត្ថកិច្ច។
ប្រភពដដែលបានបញ្ជាក់ទៀតថា ឧប្បត្តិហេតុគ្រោះថ្នាក់ចរាចរណ៍នេះ បានកើតឡើងរវាងរថយន្តបុកជាមួយអ្នកជិះម៉ូតូ ហើយជនរងគ្រោះ២នាក់ឪពុកនិងកូនប្រុសបានស្លាប់ភ្លាមៗនៅចំណុចកើតហេតុ រីឯកូនស្រីបានស្លាប់ពេលបញ្ជូនដល់មន្ទីរពេទ្យ។
ទោះយ៉ាងណា ពេលនេះសមត្ថកិច្ចជំនាញបាននិងកំពុងបន្តធ្វើការពិនិត្យកន្លែងកើតហេតុហើយ ដើម្បីស្វែងរកមូលហេតុដែលនាំឲ្យមានគ្រោះថ្នាក់យ៉ាងធ្ងន់ធ្ងរយ៉ាងរន្ធត់នេះ៕
ប្រភព៖ កោះសន្តិភាព