មកដឹងពីការថែទាំស្បែកមុខ ទាំង១០ជំហាន តាមរបៀបកូរ៉េ!

ភ្នំពេញ៖ ការថែរក្សាស្បែកមុខ ជារឿងមួយដែលសំខាន់ និងចាំបាច់បំផុតសម្រាប់ស្រ្តី។ ជាក់ស្តែងថ្ងៃនេះ យើងនឹងនាំអ្នកទាំងអស់គ្នាមកដឹងពីការថែរក្សាស្បែកតាមរបៀបកូរ៉េ។ ដែលខាងក្រោមនេះជាជំហានទាំង១០ ដែលត្រូវបានណែនាំដោយអ្នកជំនាញផ្នែកសម្រស់របស់ជនជាតិកូរ៉េផ្ទាល់តែម្តងមានដូចជា៖

១. ប្រេងលាងសម្អាតមុខ (Oil Cleanser)

- ជំហានដំបូងតាមទម្លាប់របស់កូរ៉េ គឺត្រូវលាងមុខរបស់លោកអ្នកឲ្យបាន២ដង ហើយលើកទី១ លាងជាមួយនឹងប្រេង និងលើកទី២ត្រូវលាងជាមួយហ្វូម ឬសាប៊ូលាងមុខ។ ហេតុអ្វីចាំបាច់ត្រូវធ្វើបែបនេះ? ដោយសារតែផលិតផលលាងសម្អាតស្បែកមុខនីមួយៗ មានមុខងារខុសៗគ្នា។

ជាក់ស្តែង ដូចជាអ្នកដែលមានប្រភេទស្បែកមុខមានជាតិខ្លាញ់ច្រើនតែងតែគិតថា មិនគួរប្រើផលិតផលសម្អាតផ្ទៃមុខដែលមានជាតិប្រេង ព្រោះកាន់តែធ្វើឲ្យស្បែកមុខរបស់គាត់កាន់តែមានឡើងខ្លាញ់លើសដើម។ ប៉ុន្តែទាំងនេះជាការយល់ខុសតែប៉ុណ្ណោះ ហើយផ្ទុយទៅវិញវាថែមទាំងមានប្រសិទ្ធភាពខ្ពស់ សម្រាប់ស្បែករបស់លោកអ្នកទៀតផង។

២.  ហ្វូមលាងមុខ ឬក្រែមលាងមុខ

- សម្រាប់ជំហានទី២ លោកអ្នកអាចនឹងមានការភ្ញាក់ផ្អើលបន្តិច ព្រោះនេះជាអ្វីដែលយើងសូវជាមិនចាប់អារម្មណ៍ប៉ុន្មាននោះទេ។ ការពិតទៅគ្រប់ផលិតផល ដែលត្រូវប្រើប្រាស់នៅលើស្បែកមុខ ត្រូវតែមានកម្រិត pH ទាបបំផុត។ ជាទូទៅស្បែករបស់យើងមាន pH ស្ថិតនៅចន្លោះពី ៤.២ និង ៥.៦។ ប្រសិនបើទឹកលាងសម្អាតមុខមានកម្រិត pH ខ្ពស់ពេក អាចធ្វើស្បែកមុខរលាក មានមុន និងស្នាមជ្រួញជាដើម។

បើដូច្នេះ តើអ្វីទៅដែលបញ្ជាក់ថាផលិតផលដែលយើងប្រើមានកម្រិត pH​ ទាប?

លោកអ្នកអាចសង្កេតបានដោយវិធីងាយៗ គឺបន្ទាប់ពីលាងសម្អាតមុខជាមួយហ្វូមរួច ប្រសិនបើមានអារម្មណ៍ថា ស្បែកមុខតឹងខុសធម្មតា មានន័យថាផលិតផលដែលអ្នកកំពុងប្រើ គឺមានកម្រិត pH​ ខ្ពស់ ហើយអ្នកគួរតែស្វែងរកផលិតផលណា ដែលមានកម្រិត pH​ ត្រូវនឹងប្រភេទស្បែក។

៣. ទឹក Toner

- ទឹក Toner ​ប្រៀបដូចជាស្រទាប់ស្តើង ដែលធ្វើស្បែករបស់លោកអ្នកទន់រលោង និងការពារស្បែករបស់លោកអ្នក ពីការរងផលប៉ះពាល់ ពេលប្រើប្រាស់ផលិតផលផ្សេងៗទៀត។

៤. Essence

- ជួយការពារស្បែកពីស្រទាប់ខាងក្នុង។

៥. Emulsion

- សម្រាប់ការប្រើប្រាស់ Emulsion​ លោកអ្នកត្រូវតែដឹងច្បាស់ពីប្រភេទស្បែកមុខរបស់ខ្លួន។ ឧទាហរណ៍ ប្រសិនបើស្បែកមុខរបស់អ្នកមានជាតិខ្លាញ់ច្រើន ពេលប្រើ Emulsion នឹងកាន់តែធ្វើឲ្យស្បែករបស់អ្នករលោង និងមើលទៅមានជាតិខ្លាញ់ជាងមុនថែមទៀត។

៦.​ សេរ៉ូម

- តាមពិតទៅសម្រាប់សេរ៉ូម មិនសូវសំខាន់ប៉ុន្មាននោះទេ ម្យ៉ាងវិញទៀត ប្រសិនបើស្បែករបស់អ្នកមានសុខភាពល្អហើយ អាចរំលងចំណុចនេះបាន។

៧. ម៉ាសបិទមុខ

- ជាទូទៅម៉ាសបិទមុខ តែងមានជាតិសេរ៉ូមនៅក្នុងជាស្រេច ប៉ុន្តែគ្រប់ប្រភេទក៏មិនមែនសុទ្ធតែដូចគ្នាទាំងអស់ដែរ។

៨. ក្រែមលាបភ្នែក

- ក្រែមលាបការពារបរិវេណភ្នែក ត្រូវបានផលិតយ៉ាងយកចិត្តទុកដាក់ សម្រាប់ការពារស្បែកដែលនៅជុំវិញរង្វង់ភ្នែកជាពិសេស។

៩.​ ក្រែមការពារស្បែក

- ជាក្រែមដែលការពារ និងផ្តល់សំណើមដល់ស្បែក ជាពិសេសអ្នកដែលមានស្បែកមុខខ្លាញ់ គួរគប្បីប្រើក្រែមប្រភេទនេះ ​ដែលមានសាច់ស្តើង ដើម្បីជៀសវាងការស្ទះរន្ធញើស។

១០. ឡេការពារកម្តៅថ្ងៃ

- នៅពេលថ្ងៃ លោកអ្នកគួរតែលាបឡេការពារកម្តៅថ្ងៃ ជារៀងរាល់ថ្ងៃ ដើម្បីការពារកាំរស្មីយូវីដែលជះមកលើស្បែក។ ចំណែកឯពេលយប់វិញ អ្នកត្រូវប្រើ Sleep Mask ដើម្បីជួយការពារស្បែក បន្ថែមមួយកម្រិតទៀត។​

សម្រាប់អ្នកដែលមិនមានពេលវេលាគ្រប់គ្រាន់ ដើម្បីអនុវត្តន៍តាមជំហានទាំងអស់ អ្នកក៏អាចរំលងចំណុចមួយចំនួនដូចជា ចំណុចទី១ ទី៤ ទី៥ ទី៦ ទី៧ និងទី៨ បាន។ សម្រាប់ចំណុចដែលនៅសល់ ត្រូវតែអនុវត្តន៍ឲ្យបានទៀតទាត់ ដើម្បីទទួលបានស្បែកស្អាត។

ឥឡូវនេះ លោកអ្នកក៏អាចតាមដានផលិតផលថែរក្សាសម្រស់នានាតាមរយៈហ្វេសប៊ុក ៖ https://l192.com/download និងតាមដាន Page 123 beauty នៅលើហ្វេសប៊ុក៖ https://www.facebook.com/123beautyKH/៕