AT Madrid មានភាគរយខ្ពស់យកបាន ខ្សែការពារជួរមុខ ជម្រើសជាតិអង់គ្លេសម្នាក់ពី Spurs

បរទេស៖ ខ្សែការពារស្ដាំរបស់ក្រុមជម្រើសជាតិតោកំណាចអង់គ្លេស និងក្លិបមាន់ខ្នាយមាស Tottenham Hotspur កីឡាករ Kieran Trippier មានភាគរយខ្ពស់ក្នុងការផ្លាស់ទៅលេងនៅទឹកដីអេស្ប៉ាញជាមួយក្លិប Atletico Madrid ក្នុងតម្លៃខ្លួន ២០លានផោន។ 

ខ្សែការពារវ័យ ២៨ឆ្នាំ Trippier បានចូលរួមជាមួយ Spurs កាលពីឆ្នាំ២០១៥ ក្រោយផ្លាស់មកពី Burnley និងបានបង្ហាញខ្លួនឲ្យក្លិបដែលមានមូលដ្ឋាននៅទីក្រុងឡុងដ៍មួយនេះបានលើសពី ១០០ប្រកួត ខណៈដែលការបង្ហាញខ្លួនលើកចុងក្រោយរបស់គេ គឺការលេងក្នុងវគ្គផ្ដាច់ព្រ័ត្រ UEFA Champions League ក្នុងខែមិថុនា។

Trippier បានសារភាពថាខ្លួនមិនច្បាស់នោះទេចំពោះអនាគតខ្លួនជាមួយ Tottenham Hotspur ពោលគឺកំពុងស្ថិតនៅក្នុងភាពស្រពិចស្រពិល ខណៈពេលដែលកុងត្រារបស់គេ និងក្លិបមានសុពលភាពដល់ឆ្នាំ ២០២០ ឯណោះ។ 

Trippier ទំនងអាចជាកីឡាករខ្សែការពារទីបីដែលអ្នកចាត់ការទូទៅលោក Diego Simeone នាំចូលក្នុងរដូវកាលនេះ បន្ទាប់ពីកីឡាករខ្សែការពារកណ្ដាល Felipe ពី Porto និង ខ្សែការពារឆ្វេង Renan Lodi ពីក្លិបប្រេស៊ីល Athletico Peranaense។ 

ជាមួយការនាំយកខ្សែប្រយុទ្ធជម្រើសជាតិព័រទុយកាល់ Joao Felix ក្នុងតម្លៃខ្លួន ១១៣លានផោន និងខ្សែបម្រើ Marcos Llorente ពី Real Madrid ក្នុងតម្លៃខ្លួន ៣៦លានផោន បូករួមទាំងតម្លៃខ្លួនរបស់ Trippier ទៀត AT Madrid ចំណាយប្រាក់អស់ខ្ទង់ ១៧០លានផោនទៅហើយក្នុងទីផ្សារដោះដូរកីឡាកររដូវក្ដៅលើកនេះ។ 

យ៉ាងណាមិញ ជើងឯករងក្របខណ្ឌលីគកំពូលអេស្ប៉ាញ La Liga មួយនេះ ទើបតែទទួលបានទឹកប្រាប់ ១០៧.៧ លានផោន ក្នុងការលក់ខ្សែប្រយុទ្ធជម្រើសជាតិបារាំង Antoine Greizmann ទៅឲ្យក្លិបអ្នកមានបុណ្យ Barcelona។

ប្រភព៖ BBC