អង់គ្លេស៖ ម្ចាស់ជើងឯកក្របខណ្ឌ Premier League រដូវកាល ២០១៥-២០១៦ ក្លិប Leicester City បានប្រកាសជាផ្លូវការនូវសមាជិកថ្មីដែលនាំចូលជាមួយតម្លៃខ្លួនបំបែកឯតទគ្គកម្មក្លិប ៤០លានផោន (៥០លានដុល្លារ) គឺកីឡាករ Youri Tielmans ដែលផ្ទេរមកពីក្លិបបារាំង Monaco ជាមួយកុងត្រា ៤ឆ្នាំ។
ការប្រកាសជាកីឡាករផ្លូវការនេះ ធ្វើក្រោយពេលដែលខ្សែបម្រើរូបនេះបានចំណាយរយៈពេលកន្លះរដូវកាលជាមួយ Leicester City ក្នុងលក្ខខណ្ឌខ្ចីជើង។ រយៈពេលកន្លះរដូវកាល Youri Tielmans បង្ហាញខ្លួនលើវាលស្មៅបាន ១៣ដង រកគ្រាប់បាល់បាន ៣គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេចចំនួន ៤ដង។
Youri Tielmans គឺជាអតីតយុវជនរបស់ក្លិប Anderlecht មុននឹងត្រូវផ្លាស់ទៅបារាំងចូលរួមជាមួយ Monaco។ គេធ្លាប់បង្ហាញខ្លួនឲ្យជម្រើសជាតិប៊ែលហ្សិកចំនួន ២៣ដងក្នុងនាមជាខ្សែបម្រើ ហើយរូបគេក៏ជាម្នាក់ក្នុងចំណោមកីឡាករផ្សេងទៀតដែលជួយឲ្យប៊ែលហ្សិកទទួលបានចំណាត់ថ្នាក់លេខ ៣នៅព្រឹត្តិការណ៍ FIFA World Cup 2018 ក្នុងប្រទេសរុស៊្សី។
“វាជាអារម្មណ៍មួយយ៉ាងរំភើបដែលចុះកិច្ចសន្យាកុងត្រាជាមួយក្លិបនេះ។ តាំងពីខ្ញុំមកដល់ដំបូងក្នុងលក្ខខណ្ឌខ្ចីជើងកាលពីរដូវកាលុន កីឡាករទាំងអស់ ក្រុមការងារគ្រូបង្វឹក និងអ្នកគាំទ្រគឺពិតជាពិសេស និងអស្ចារ្យសម្រាប់ខ្ញុំ, ដូច្នេះខ្ញុំពិតជាសប្បាយចិត្តដែលអាចក្លាយខ្លួនជាកីឡាករម្នាក់របស់ Leicester City។” Youri Tielmans និយាយប្រាប់ទៅកាន់គេហទំព័ររបស់ក្លិបជុំវិញការមកចូលរួមជាមួយ Leicester។
គួរបញ្ជាក់ផងដែរថា Youri Tielmans គឺជាកីឡាករទីបីហើយដែល Leicester នាំចូលក្នុងទីផ្សារដោះដូរកីឡាករលើកនេះ បន្ទាប់ពីកីឡាករពីររូបមុនគឺ Ayoze Perez និង James Justin៕
ប្រភព៖ GOAL
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
